អ្នកវិភាគ​ និងតំណាងវិស័យឯកជន ៖ សេដ្ឋកិច្ច​កម្ពុជាអាចសម្រេចបានក្នុងរង្វ​ង់៦%ក្នុងឆ្នាំ​២០២៤ និង ​នឹងកើនជាង៦%នៅឆ្នាំ២០២៥នេះ

កំណើនសេដ្ឋកិច្ច​របស់កម្ពុជាអាចសម្រេចបានក្នុងអត្រា៦%កាលពីឆ្នាំ២០២៤ តាមការព្យាករណ៍​របស់​រាជរដ្ឋាភិបាល និងបណ្តាស្ថាប័នហិរញ្ញវត្ថុអន្តរជាតិនានា ដោយសារតែកំណើនខ្ពស់​នៃការនាំចេញផលិតផលសម្លៀកបំពាក់កាត់ដេរ ស្បែកជើង​ និងផលិតផលអ្នកធ្វើដំណើរ ការនាំចេញផលិតផលកសិកម្ម និងកំណើនខ្ពស់​នៃវិស័យទេសចរណ៍។​នេះបើយោងតាមការលើកឡើងពីតំណាងវិស័យឯកជន និងអ្នកវិភាគសេដ្ឋកិច្ចឯករាជ្យ​។

ការព្យាករណ៍របស់រដ្ឋាភិបាល

កាលពីចុងខែវិច្ឆិកាកន្លងទៅនេះ លោក អូន ព័ន្ធមុនីរ័ត្ន ឧបនាយករដ្ឋមន្រ្តី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានវាយតម្លៃថា កំណើនសេដ្ឋកិ​ច្ចរបស់កម្ពុជានឹងសម្រេចបានអត្រា៦%នៅឆ្នាំ២០២៤​ គាំទ្រពីការហក់ស្ទុះងើបឡើងវិញនៃវិស័យនាំចេញ ជាពិសេសការនាំចេញសម្លៀកបំពាក់កាត់ដេរ វាយនភ័ណ្ឌ ស្បែកជើង និងផលិតផលសម្រាប់អ្នកដំណើរ។

ស្ថានភាពល្អប្រសើរសេដ្ឋកិច្ច​តំបន់ និងសកលធ្វើឱ្យមានតម្រូវខ្ពស់ ទោះមានវិបត្តិ​ភូមសាស្រ្ត​នយោបាយ

ថ្លែងមកកាន់កម្ពុជាថ្មីនៅថ្ងៃទី១៣ ខែមករានេះ លោក លឹម ហេង អនុប្រធានសភាពាណិជ្ជកម្ម​កម្ពុជាថា ផ្អែកលើតួលេខ​ពីអគ្គនាយដ្ឋានគយ និងរដ្ឋាករកម្ពុជាចេញផ្សាយកាលពីពេលថ្មីៗ​នេះ ការនាំចេញរបស់កម្ពុជា​មានកំណើនជាង១០% ជាមួយគ្នានោះដែរផលិតផលសំខាន់ៗ​ដែល​​រួមមាន ការនាំចេញផលិតផលសម្លៀកបំពាក់កាត់ដេរ ស្បែកជើង​ និងផលិតផលអ្នក​ធ្វើដំណើរ ការនាំចេញផលិតផលកសិកម្ម និងកំណើនខ្ពស់នៃវិស័យទេសចរណ៍ បានកើនឡើងខ្ពស់កាលពីឆ្នាំមុនដែលជាកត្តាគន្លឹះគាំទ្រ​ដល់កំណើនសេដ្ឋកិច្ចទាំងមូល។

លោកបាថ្លែងថា៖«បើយើងមើលតាមតួលេខរបស់គយ ការនាំចេញរបស់យើងមាន​ការកើនឡើងជាង១០% ខណៈស្ថានភាពកាន់តែប្រសើរនៃវិស័យទេសចរណ៍ក៏​បាន​ចូលរួមចំណែកគាំទ្រដល់កំណើនសេដ្ឋកិច្ចរបស់យើងខ្ពស់ផងដែរ។ ជាមួយគ្នានេះដែរ យើងក៏សង្កេតឃើញថា​យើងក៏ទទួលបានកំណើននាំចេញគ្នាជាមួយបណ្តាប្រទេស​ដៃគូរក្នុងតំបន់តាមរយៈកិច្ចព្រមព្រៀងពាណិជ្ជកម្មសេរីទាំងទ្វេភាគី និងពហុភាគីផងដែរ»។

លោកក៏បានលើកឡើងផងដែរ អំពីស្ថានភាពល្អ​ប្រសើរនៃកំណើនសេដ្ឋកិច្ច​នៅក្នុងតំបន់ និងសកលលោក ទោះបីជាមានភាពតានតឹងផ្នែកភូមិសាស្រ្តនយោបាយនៅតែបន្ត។ លោកថា៖«អ្វីដែលគួរឱ្យ​កត់សម្គាល់នាឆ្នាំកន្លងមកនោះគឺ យើងឃើញមានតម្រូវការ​ខ្ពស់ពីបណ្តាប្រទេសគោលដៅនាំចេញរបស់កម្ពុជាយើង ដែលរួមមានទាំងទីផ្សារអាមេរិក និងអឺរ៉ុបទោះបីជាមានភាពតានតឹង​ផ្នែកភូមិសាស្រ្តនយោបាយ។ ការណ៍នេះហើយដែលមាន​តម្រូវការខ្ពស់លើផលិតផលរបស់កម្ពុជាយើង។

លោក​បណ្ឌិត ហុង វណ្ណៈ អ្នកវិភាគនិង​ជា​អ្នកជំនាញ​សេដ្ឋកិច្ចនៃ​រាជ​បណ្ឌិត្យសភា​កម្ពុជា​បានថ្លែងមកកាន់កម្ពុជាថ្មីថា ក្នុងឆ្នាំ២០២៤កន្លងទៅនេះ ស្ថានភាពសេដ្ឋកិច្ច​សកលនិងតំបន់ហាក់មានភាពល្អប្រសើរ ដែលផ្តល់ឱកាសល្អដល់ការនាំចេញរបស់កម្ពុជា។ លើសពីនោះទៅទៀត ការអនុវត្តនូវកិច្ច​ព្រមព្រៀងពាណិជ្ជក​ម្ម​សេរីទាំងទ្វេភាគី និងពហុភាគីក៏បានចូលរួមចំណែកដល់ការផ្តល់លទ្ធភាពបន្ថែមដល់កម្ពុជាបង្កើនការនាំចេញដែរ។​

លោកបានលើកឡើងថា៖«ខ្ញុំយល់ឃើញថា ចំពោះកំណើនសេដ្ឋកិច្ចរបស់យើងកាលពីឆ្នាំ​២០២៤គឺអាចសម្រេចបានក្នុងអត្រា៦%ដូចដែលអ្វីដែលរដ្ឋាភិបាលបានព្យាករណ៍កន្លងមក។​ ជាមួយគ្នា ភាពអំណោយផលនៃទីផ្សារនាំចេញដូចជានៅអឺរ៉ុប​និងអាមេរិកក៏បាន​ចូលរួម​ចំណែក​ដ៏សំខាន់មកលើផលិតផលរបស់កម្ពុជាយើងផងដែរ។ អ្វីដែលគួរឱ្យ​កត់​សម្គាល់នោះ យើងក៏បាននាំចេញច្រើនទៅកាន់ដៃគូរនាំចេញនៅក្នុងតំបន់ដែលមានដូចជាចិន ជប៉ុន និងប្រទេសដៃគូរនៅអាស៊ានផងដែរ»។

កត្តាសន្តិភាព សណ្តាប់ធ្នាប់សង្គម សុវត្ថិភាព និង​ស្ថិរភាពនយោបាយជាមូលដ្ឋានគ្រឹះដ៏រឹងមាំ ប្រទេសកម្ពុជាបានរក្សាបាននូវកំណើនខ្ពស់

លោក អូន ព័ន្ធមុនីរ័ត្នថា  ជាមួយនឹងសន្តិភាព សណ្តាប់ធ្នាប់សង្គម សុវត្ថិភាព និងសន្តិសុខប្រកបដោយនិរន្តរភាព និងស្ថិរភាពនយោបាយជាមូលដ្ឋានគ្រឹះដ៏រឹងមាំ ប្រទេសកម្ពុជាបានរក្សាបាននូវកំណើនខ្ពស់ជាបន្តបន្ទាប់ ដែលនាំទៅដល់ការអភិវឌ្ឍន៍សេដ្ឋកិច្ចគួរឱ្យកត់សម្គាល់ ការកាត់បន្ថយភាពក្រីក្រ និងបានក្លាយជាប្រទេសមានចំណូលមធ្យមកម្រិតទាបក្នុងឆ្នាំ ២០១៥។

​លោកថា៖«សម្រាប់ឆ្នាំ ២០២៤ និង ២០២៥ សេដ្ឋកិច្ចកម្ពុជាត្រូវបានព្យាករណ៍ថានឹងកើនឡើងក្នុងរង្វង់​៦% និង ៦,៣% រៀងៗខ្លួន ដែលត្រូវបានគាំទ្រការស្ទុះងើបឡើងជាបន្តបន្ទាប់នៅក្នុងវិស័យ​នាំចេញ ជាពិសេសវិស័យកាត់ដេរ»។

​លោកបានថ្លែងបញ្ជាក់ថាសម្រាប់វិស័យការស្នាក់នៅ និងវិស័យគាំទ្រផ្សេងទៀត (ទេសចរណ៍) ត្រូវបានគេរំពឹងថានឹងបន្តនិន្នាការកើនឡើង និងឆ្ពោះទៅរកកម្រិតមុនការរាតត្បាតជំងឺកូវីដ១៩។ ទន្ទឹមនឹងនោះ សន្ទុះនៃភាពធន់នៅក្នុងវិស័យមិនមែនកាត់ដេរនឹងរក្សាបានជាមួយនឹងឧស្សាហកម្មផលិតកម្មដែលទើបនឹងកើតថ្មី ជាពិសេសគ្រឿងបង្គុំរថយន្ត ការផលិតម្ហូបអាហារ និងភេសជ្ជៈ។

«សម្រាប់អតិផរណានៅឆ្នាំ ២០២៤ និង ២០២៥ ត្រូវបានគេរំពឹងថានឹងមានអត្រា ២,៧% និង ២,៥% រៀងគ្នា។ ទោះជាយ៉ាងណាក៏ដោយដោយសារការអនុវត្តបច្ចុប្បន្ន អតិផរណានៅឆ្នាំ ២០២៤ ត្រូវបានគេរំពឹងថានឹងទាបជាងការរំពឹងទុក»។ នេះបើយោងតាមលោក​​ អូន ព័ន្ធមុនីរ័ត្ន។

ការព្យាករណ៍របស់ធនាគារអភិវឌ្ឍន៍អាស៊ី (ADB)

កាលពីខែកញ្ញា ​ADB​ បានរក្សាការព្យាករកំណើនសេដ្ឋកិច្ចរបស់ខ្លួនសម្រាប់កម្ពុជា នៅកម្រិត ៥,៨% សម្រាប់ឆ្នាំ ២០២៤ ឆ្លុះបញ្ចាំងពីការកើនឡើងតិចតួចនៃថ្លៃម្ហូបអាហារ និង ការធ្លាក់ចុះនៃថ្លៃប្រេងឥន្ធនៈនៅក្នុងឆមាសទី១ ឆ្នាំ ២០២៤។

ADB ក៏បានកាត់បន្ថយការព្យាករ អតិផរណាពីមុនរបស់ខ្លួនពី ២,0% មក ០,៥% សម្រាប់ឆ្នាំ ២០២៤។ ជាមួយគ្នានេះដែរ ADB ក៏បានព្យាករណ៍ថា សម្រាប់កំណើនសេដ្ឋកិច្ចកម្ពុជានឹងសម្រេចបាន ៦,0% សម្រាប់ឆ្នាំ ២០២៥។

លោកស្រី Jyotsana Varma នាយិកា ធនាគារអភិវឌ្ឍន៍អាស៊ីប្រចាំកម្ពុជា មានប្រសាសន៍ថា ​ការស្ទុះងើបឡើងវិញនៃវិស័យវាយនភណ្ឌ ជាពិសេសសម្លៀកបំពាក់ ស្បែកជើង និងទំនិញធ្វើដំណើរកំពុង ជំរុញកំណើនសេដ្ឋកិច្ចប្រទេសកម្ពុជា។ វិស័យកសិកម្ម និងទេសចរណ៍កំពុងបន្តកើនឡើង ខណៈការបន្ត ហូរចូលនៃការវិនិយោគផ្ទាល់ពីបរទេស កំពុងជួយជំរុញល្បឿនសេដ្ឋកិច្ចកម្ពុជា។

លោកស្រីថា៖«ជារួម កម្លាំងចលករ ទាំងនេះ កំពុងនាំមកនូវស្ថានភាពល្អប្រសើរសម្រាប់ឆ្នាំ ២០២៤ ព្រមទាំងពង្រឹងមូលដ្ឋាន សម្រាប់កំណើន រឹងមាំនៅឆ្នាំ ២០២៥ និងឆ្នាំបន្តបន្ទាប់ទៀត»។

ការដោះដូរទំនិញអន្តរជាតិរបស់កម្ពុជា សម្រេចបាននូវទំហំទឹកប្រាក់ជាង ៥៤,៧៤ ពាន់លានដុល្លារ នៅក្នុងឆ្នាំ ២០២៤ មានការកើនឡើង ១៦,៩% ធៀបនឹងឆ្នាំ ២០២៣ ដែលសម្រេចបាន ៤៦,៨២ ពាន់លានដុល្លារ។ នេះ​បើយោង​តាម​​ទិន្ន​​ន័យ​របស់អគ្គនាយកដ្ឋាន​គយ និង​រដ្ឋាករ​កម្ពុជា ​(GDCE) ចេញផ្សាយនៅថ្ងៃទី ១០ ខែមករា ឆ្នាំ ២០២៥។

ទិន្នន័យរបស់ GDCE បង្ហាញថា ការនាំចេញទំនិញ​របស់​កម្ពុជា ​​មានទំហំទឹកប្រាក់ ២៦,១៩ ពាន់លានដុល្លារ កើនឡើង ១៥,៧% ចំណែកឯការនាំទំនិញចូល​មកវិញមាន​ទំហំ​ទឹកប្រាក់ ២៨,៥៤ ពាន់លានដុល្លារ កើន ១៨%។ ទិន្នន័យរបស់ GDCE បង្ហាញថា កម្ពុជាមានឱនភាពពាណិជ្ជកម្មជាង ២,៣៤ ពាន់លានដុល្លារ៕