កម្ពុជាកំពុងជំរុញការតភ្ជាប់ជើងហោះហើរត្រង់ទៅគោលដៅថ្មីៗ

ក្រសួងទេសចរណ៍ និងក្រុមហ៊ុនអាកាសយានដ្ឋានកម្ពុជា​បានឯកភាពគ្នាបន្តជំរុញកិច្ច​សហ​ប្រតិបត្តិ​ការលើវិស័យទេសចរណ៍ឱ្យកាន់តែមានប្រសិទ្ធភាពខ្ពស់​ ដើម្បីទាក់ទាញភ្ញៀវទេសចរអន្តរជាតិចូលមកទស្សនាកាន់តែច្រើនបន្ថែមទៀត។​

ការបញ្ជាក់នេះ បានធ្វើឡើងក្នុងជំនូបពិភាក្សាការងាររវាងលោក ហួត ហាក់ រដ្ឋមន្ត្រី​ក្រសួង​ទេសច​រណ៍ ជាមួយលោក Emmanuel MENANTEAU សមាជិក​គណៈកម្មាធិ​ការប្រតិបត្តិ​នៃអាកាស​យាន​ដ្ឋាន VINCI និងជានាយកទទួល​បន្ទុកតំបន់សហរដ្ឋអាមេរិក អឺរ៉ុបខាងជើង និងខាងកើត និងអាស៊ីអាគ្នេយ៍ និងសហការី នៅថ្ងៃទី ០៩ ខែមករា ឆ្នាំ ២០២៥។

លោករដ្ឋមន្ត្រី ហួត ហាក់ បានលើកឡើងអំពីគោលនយោបាយរបស់រាជរដ្ឋាភិបាលកម្ពុជា ដែលបានយកចិត្តទុកដាក់ និងចាត់ទុកវិស័យទេសចរណ៍ជាមាសបៃតង ដែលបាន​ចូល​រួមជំរុញការអភិវឌ្ឍសេដ្ឋកិច្ចជាតិយ៉ាងសំខាន់។

ក្រសួងទេសចរណ៍ក៏កំពុងធ្វើការទំនាក់ទំនង ​និងលើកទឹកចិត្តដល់វិស័យ​ឯកជនក្នុងវិស័យ​ទេសចរណ៍ និងវិស័យអាកាសចរណ៍ ដើម្បីជំរុញឱ្យមានការតភ្ជាប់ជើងហោះហើរត្រង់ និងជើងហោះហើរជួលរវាងគោលដៅកម្ពុជាជាមួយគោលដៅបណ្ដាប្រទេស តំបន់ និងទីក្រុងផ្សេងៗនៅក្រៅប្រទេស។

លោក រដ្ឋមន្ត្រី និងភាគីក្រុមហ៊ុន បានឯកភាពគ្នាបន្តជំរុញកិច្ចសហប្រតិបត្តិការ​លើវិស័យទេសចរឱ្យកាន់តែមានប្រសិទ្ធភាព សំដៅរួមចំណែកកំណើនក្នុង​វិស័យ​ទេសចរណ៍កម្ពុជា។

យោងតាមរដ្ឋលេខាធិការដ្ឋានអាកាស​ចរណ៍ស៊ីវិល គិតចាប់ពីខែមករា ដល់ខែតុលា ឆ្នាំ ២០២៤ កម្ពុជា ទទួលបានអ្នកដំណើរតាមជើងហោះហើរជិត ៥ លាននាក់ (៤ ៩៧៨ ៦៦៣) មានការ​កើន​ឡើង ២១ ភាគរយ បើធៀបនឹងរយៈ​ពេលដូច​គ្នា​នៅ​ឆ្នាំ ២០២៣៕