ព័ត៌មានអន្ដរជាតិ

ច្បាប់ចរាចរណ៍វៀតណាមថ្មី ផាកពិន័យអ្នកល្មើសភ្លើងក្រហម ពី ១៥៧-២៣៦ ដុល្លារអាមេរិក

បានផុស

៣ សប្តាហ៍ មុន

នៅ

ថ្ងៃពុធ ១៥ មករា ២០២៥

ដោយ

រដ្ឋាភិបាលវៀតណាមបានពង្រឹងច្បាប់ចរាចរណ៍ជាថ្មី ដោយបង្កើនការផាកពិន័យខ្ពស់កប់ពពកចំពោះអ្នកល្មើសច្បាប់ចរាចរណ៍ ចំពេលដែលអាជ្ញាធរប្រឹងទប់ស្កាត់គ្រោះថ្នាក់ចរាចរណ៍ ដែលឆក់យកជីវិតប្រជាជនជាង ១១ ៥០០ នាក់ ក្នុងមួយឆ្នាំៗ។ នេះបើតាមការចុះផ្សាយរបស់កាសែត VnExpress។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ច្បាប់ដ៏តឹងរុឹងថ្មី ដែលចូលជាធរមានកាលពីដើមខែមករានេះ បានកំណត់ដំឡើងការផាកពិន័យលើករណីល្មើសច្បាប់ចំនួន ២៦។ ការល្មើសច្បាប់តិចតួចដូចជាបើកហួសភ្លើងក្រហម ឬបើកបរខុសផ្លូវ នឹងរងការពិន័យចន្លោះពី ១៥៧-២៣៦ ដុល្លារ ខណៈការល្មើសធ្ងន់ធ្ងរដូចជាការបើកបរមិនប្រុងប្រយ័ត្នបណ្ដាលឱ្យគ្រោះថ្នាក់ ឬប្រណាំងប្រជែងគ្នាខុសច្បាប់ នឹងរងការពិន័យចន្លោះពី ១ ៥៧៥ – ១៩៧០ ដុល្លារ។

អ្នកបើកបររថយន្ត ដែលបង្កគ្រោះថ្នាក់ពេលបើកទ្វាររថយន្តមិនប្រយ័ត្ន នឹងត្រូវពិន័យជាប្រាក់ពីចន្លោះពី ៧៨៦-៨៦៥ ដុល្លារ។ អ្នកបើកបរក្នុងស្ថានភាពស្រវឹង ឬបដិសេធមិនព្រមផ្លុំជាតិអាកុលឱ្យប៉ូលិស នឹងត្រូវពិន័យប្រាក់ជាង ១ ៥០០ ដុល្លារ។

ថ្ងៃដំបូងនៃការអនុវត្តច្បាប់នេះ អាជ្ញាធរវៀតណាមចាប់បានអ្នកល្មើសច្បាប់ប្រមាណ ១៣ ០០០ នាក់ និងប្រមូលប្រាក់ពិន័យបានជាង ១,១ លានដុល្លារ។

តំណាងអង្គការសុខភាពពិភពលោក ប្រចាំទីក្រុងហាណូយ លោកស្រី Angela Pratt បានស្វាគមន៍ចំពោះវិធានការថ្មីនេះ ហើយបាននិយាយថា ច្បាប់នេះមានការពិភាក្សាគ្នាយ៉ាងទូលំទូលាយដោយអ្នកដំណើរក្នុងប្រទេសវៀតណាម។ លោកស្រីបន្តថា រដ្ឋាភិបាលអាចកាត់បន្ថយចំនួនអ្នកស្លាប់ដោយគ្រោះថ្នាក់ចរាចរណ៍រហូតដល់ ៤០ ភាគរយ ចន្លោះពីឆ្នាំ ២០១០ ដល់ឆ្នាំ២០២១ តាមរយៈការអនុវត្តច្បាប់តឹងរុឹង ជាពិសេសការដំឡើងការផាកពិន័យយ៉ាងដូច្នេះ។

ទោះបីជាយ៉ាងណាក៏ដោយ មានការលើកឡើងថា ការដំឡើងការផាកពិន័យធ្ងន់កដូច្នេះ អាចប៉ះពាល់ខ្លាំងដល់ប្រជាជនដែលមានប្រាក់ចំណូលទាប ជាជាងអ្នកមានប្រាក់ចំណូលច្រើន។ យោងតាមការិយាល័យស្ថិតិទូទៅ ប្រាក់ចំណូលជាមធ្យមសម្រាប់មនុស្សម្នាក់ក្នុងឆ្នាំ ២០២៣ នៅវៀតណាម គឺ ៤ ០១០ ដុល្លារ ឬ ៣៣៥ ដុល្លារ/ខែ។ ដូច្នេះការផាកពិន័យចន្លោះពី ១៥៧-២៣៦ ដុល្លារ គឺស្មើនឹង ៥៩ ភាគរយ នៃប្រាក់ចំណូលប្រចាំខែជាមធ្យមរបស់ពលរដ្ឋបាត់ទៅហើយ។

ច្បាប់ផាកពិន័យថ្មីរបស់វៀតណាម ធ្វើឱ្យវៀតណាមក្លាយជាប្រទេសមានការផាកពិន័យខ្ពស់បំផុតជាងគេទី២នៅអាស៊ីអាគ្នេយ៍ បន្ទាប់ពីសិង្ហបុរី ដែលពិន័យប្រាក់ ៣០០ ដុល្លារអាមេរិក ចំពោះអ្នកជិះម៉ូតូបំពានភ្លើងស្តុបក្រហម។

ជុំវិញបញ្ហានេះ អ្នកជំនាញលើកឡើងថា ការដំឡើងការផាកពិន័យតែមួយមុខមិនគ្រប់គ្រាន់ ដើម្បីប្រយុទ្ធប្រឆាំងនឹងគ្រោះថ្នាក់ចរាចរណ៍នោះទេ ក៏ប៉ុន្តែ វានឹងផ្លាស់ប្ដូរអាកប្បកិរិយារបស់អ្នកបើកបរ៕