ព័ត៌មានអន្ដរជាតិ

ឡាវបន្តពឹងផ្អែកខ្លាំងលើចំណូលពីការនាំចេញអគ្គិសនី

បានផុស

៤ សប្តាហ៍ មុន

នៅ

ថ្ងៃពុធ ១៥ មករា ២០២៥

ដោយ

ការនាំចេញថាមពលអគ្គិសនី បានបន្តនាំមុខគេលើប្រភពប្រាក់ចំណូលនាំចេញរបស់ប្រទេសឡាវក្នុងឆ្នាំ ២០២៤ ដោយកើបចំណូលប្រមាណ ៩៨០ លានដុល្លារអាមេរិក ឬជិតស្មើនឹង ១៥,៣៥ ភាគរយ នៃការនាំចេញសរុប។ នេះបើតាមការចុះផ្សាយរបស់កាសែត Laotian Times ដែលស្រង់ទិន្នន័យពីនាយកដ្ឋានពាណិជ្ជកម្មបរទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាណិជ្ជកម្មសរុបរបស់ប្រទេសឡាវ នៅឆ្នាំ ២០២៤ មានទំហំ ១៦,៣៥ ប៊ីលានដុល្លារ ដោយការនាំចេញមានតម្លៃ ៨,១៤ ប៊ីលានដុល្លារ ខណៈការនាំចូលមាន ៨,២១ ប៊ីលានដុល្លារ បង្កើតបានជាឱនភាពពាណិជ្ជកម្មប្រហែល ៦៤ លានដុល្លារ។

ក្រៅពីអគ្គិសនី ការនាំចេញសំខាន់ៗរួមមាន ប៉ូតាស្យូម មាស ឧបករណ៍អគ្គិសនី កៅស៊ូ និងក្រដាស។ ទីផ្សារនាំចេញសំខាន់ៗគឺប្រទេសចិន ថៃ និងវៀតណាម ដែលរួមគ្នារួមចំណែកជាង ៨០ ភាគរយនៃការនាំចេញរបស់ប្រទេសឡាវ។ សម្រាប់ការនាំចូលវិញ ទំនិញចម្បងៗរួមមានប្រេងម៉ាស៊ូត គ្រឿងម៉ាស៊ីន និងយានជំនិះ ដោយថៃ និងចិន ជាដៃគូនាំចូលធំជាងគេ។

គួរគូសបញ្ជាក់ថា ឡាវជាប្រទេសពឹងផ្អែកខ្លាំងលើការនាំចូល ខណៈការនាំចេញក៏ត្រូវពឹងផ្អែកលើធនធានធម្មជាតិ ថាមពលអគ្គិសនី និងកសិផលមួយចំនួនជាដើម ដោយប្រទេសនេះខ្វះខាតនូវរោងចក្រផលិតកម្មកែច្នៃ ឬឧស្សាហកម្មសំខាន់ៗផ្ទាល់ខ្លួន៕