ព័ត៌មានអន្ដរជាតិ

ពាណិជ្ជកម្មចិន-វៀតណាមកើនជាង ២០០ ប៊ីលានដុល្លារ ប៉ុន្តែចិនបន្តមានប្រៀបលើជញ្ជីងពាណិជ្ជកម្ម

បានផុស

៥ ថ្ងៃ មុន

នៅ

ថ្ងៃព្រហស្បតិ៍ ១៦ មករា ២០២៥

ដោយ

ទំហំពាណិជ្ជកម្មរវាងប្រទេសវៀតណាម និងចិន បានកើនដល់ប្រមាណ ២០៥ ប៊ីលានដុល្លារ ក្នុងឆ្នាំ ២០២៤ ប៉ុន្តែចិនបន្តមានប្រៀបលើសលុបលើជញ្ជីងពាណិជ្ជកម្ម ដែលបង្កើតបានជាអតិរេកពាណិជ្ជកម្មរាប់សិបប៊ីលានដុល្លារទៅខាងចិន។ នេះបើតាមការចុះផ្សាយរបស់កាសែត Viet Nam News។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេញមួយឆ្នាំ ២០២៤ ពាណិជ្ជកម្មទ្វេភាគីរវាងប្រទេសទាំង២ បានឈានដល់ទំហំកំណត់ត្រា ២០៥,២ ប៊ីលានដុល្លារ ដោយកើនឡើងប្រមាណ ៣៣,៣ ប៊ីលានដុល្លារ ធៀបនឹងទិន្នន័យឆ្នាំ ២០២៣។ ដូច្នេះ ចិនបានក្លាយជាដៃគូពាណិជ្ជកម្មដំបូងរបស់វៀតណាម ដែលមានទំហំពាណិជ្ជកម្មលើសពី ២០០ ប៊ីលានដុល្លារ។

ការនាំចេញរបស់វៀតណាមទៅកាន់ចិន មានចំនួនសរុប ៦១,២ ប៊ីលានដុល្លារ ថយចុះបន្តិចប្រហែល ១០០ លានដុល្លារ បើធៀបនឹងឆ្នាំ ២០២៣។ ការនាំចូលពីចិនវិញ បានកើនឡើងដល់ ១៤៤ ប៊ីលានដុល្លារកើនឡើង ៣៣,៣៥ ប៊ីលានដុល្លារ ឬ ៣០,១ ភាគរយ ធៀបនឹងឆ្នាំមុន។

នេះបង្ហាញពីភាពលើសលុបរបស់ចិន លើជញ្ជីងពាណិជ្ជកម្មជាមួយវៀតណាម។ ឱនភាពពាណិជ្ជកម្មវៀតណាមទៅចិនក្នុងឆ្នាំ ២០២៣ មានត្រឹម ៤៩,៣ ប៊ីលានដុល្លារ ប៉ុន្តែតួលេខនេះ បានហក់ឡើងដល់ ៨២,៣ ប៊ីលានដុល្លារ ក្នុងឆ្នាំ ២០២៤។

ទោះជាយ៉ាងណាក៏ដោយ មន្រ្តីវៀតណាមលើកឡើងថា ចិនគឺជាដៃគូផ្គត់ផ្គង់វត្ថុធាតុដើម និងធនធានផ្សេងៗ សម្រាប់ឱ្យវៀតណាមប្រើប្រាស់សម្រាប់ការផលិតផលិតផលក្នុងស្រុករបស់ខ្លួន។ ប្រទេសទាំង២ ធ្វើពាណិជ្ជកម្មជាមួយគ្នាលើមុខទំនិញជាច្រើន រាប់ចាប់ពីផលិតផលកសិកម្មរហូតដល់វត្ថុធាតុដើម គ្រឿងអេឡិចត្រូនិក គ្រឿងម៉ាស៊ីន គ្រឿងបន្លាស់ផ្សេងៗ និងទំនិញប្រើប្រាស់។

យោងតាមក្រសួងឧស្សាហកម្ម និងពាណិជ្ជកម្មវៀតណាម គេនៅតែអាចជំរុញកំណើនពាណិជ្ជកម្មទ្វេភាគីចិន និងវៀតណាម ដោយសារកិច្ចព្រមព្រៀងសហប្រតិបត្តិការទ្វេភាគីជាច្រើន និងកតិកាសញ្ញាពាណិជ្ជកម្មពហុភាគី រួមទាំងកិច្ចព្រមព្រៀងពាណិជ្ជកម្មសេរីអាស៊ាន-ចិន (ACFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ជាដើម៕