កម្ពុជា និង IFC សហការគ្នាដើម្បីអភិវឌ្ឍន៍ទីផ្សារឧបករណ៍និស្សន្ទ

ជាការបោះជំហានដ៏សំខាន់មួយឆ្ពោះទៅរកការអភិវឌ្ឍន៍ទីផ្សារហិរញ្ញវត្ថុ និយ័តករមូលបត្រកម្ពុជា (SERC) និងសាជីវកម្មហិរញ្ញវត្ថុអន្តរជាតិ (IFC) បានចុះហត្ថលេខាលើកិច្ចព្រមព្រៀងសហប្រតិបត្តិការដើម្បីរួមចំណែកកសាងនូវប្រព័ន្ធអេកូឡូស៊ីនៃទីផ្សារឧបករណ៍និស្សន្ទឱ្យ​រឹងមាំ និងអនុលោមទៅតាមស្តង់ដារអន្តរជាតិ។

ពិធីចុះហត្ថុលេខានោះត្រូវធ្វើឡើងរវាងលោក ​​ លោក ស៊ូ សុជាតិ អគ្គនាយក SERC ​និងលោក Tom Ceusters ប្រធានទទួលបន្ទុកផ្នែកផ្សារមូលបត្រ​ និងវិនិយោគនៃ IFC ក្នុងការលើកកម្ពស់ទីផ្សារឧបករណ៍និស្សន្ទនៅកម្ពុជា។

លោក ស៊ូ​ សុជាតិបានថ្លែងក្នុងកម្មវិធីនោះទេ កិច្ចសហការនេះត្រូវធ្វើឡើងក្នុងកាលៈទេសៈដ៏សំខាន់មួយ ដោយសារទីផ្សារឧបករណ៍និស្សន្ទនៅប្រទេសកម្ពុជាមានសក្ដានុពលយ៉ាងធំធេងក្នុងការរួមចំណែកដល់កំណើនហិរញ្ញវត្ថុរបស់ប្រទេស។

លោកថា៖«តាមរយៈការផ្តល់ឧបករណ៍ហិរញ្ញវត្ថុប្រកបដោយភាពច្នៃប្រឌិតសម្រាប់ការគ្រប់គ្រងហានិភ័យ និងការធ្វើពិពិធកម្មការវិនិយោគ ទីផ្សារនេះត្រូវបានគេរំពឹងថានឹងដើរតួនាទីយ៉ាងសំខាន់ក្នុងការអភិវឌ្ឍន៍សេដ្ឋកិច្ចរបស់ប្រទេសកម្ពុជា»។

ទោះជាយ៉ាងណាក៏ដោយ លោកបានគូសបញ្ជាក់ថា ក្នុងដំណើរឆ្ពោះទៅមុខតម្រូវឱ្យមានការគិតគូរដោយប្រុងប្រយ័ត្ន មានក្របខ័ណ្ឌរឹងមាំ និងការកសាងសមត្ថភាពបន្ថែម។ លោកថា៖« កិច្ចព្រមព្រៀងរវាង SERC និង IFC បង្ហាញពីផែនការដ៏ទូលំទូលាយមួយ ដើម្បីធានាបាននូវកំណើនប្រកបដោយចីរភាព។ គំនិតផ្តួចផ្តើមនេះស្របតាមគោលដៅ​របស់កម្ពុជាក្នុងការក្លាយជាអ្នកចូលរួមប្រកួតប្រជែង និងគួរឱ្យទុកចិត្តនៅក្នុងប្រព័ន្ធអេកូឡូស៊ីហិរញ្ញវត្ថុសកល»។

បើយោងតាមកិច្ចព្រមព្រៀងនេះ ខាង  IFC នឹងចូលរួមក្នុងការការកសាងសមត្ថភាព​ជាបន្តបន្ទាប់​ដល់បុគ្កលនិយតកម្ម និងអ្នកចូលរួមទីផ្សារជាមួយនឹងជំនាញចាំបាច់ នៃទីផ្សារនិស្សន្ទនេះ; ពង្រឹងក្របខ័ណ្ឌច្បាប់ និងហិរញ្ញវត្ថុរបស់កម្ពុជា ដោយធានាថាអនុឡោមតាមស្តង់ដារអន្តរជាតិ; និង  ​ កិច្ចព្រមព្រៀងនេះក៏កំណត់ដំណាក់កាលសម្រាប់ទីផ្សារនិស្សន្ទដែលរួមចំណែកដល់ស្ថិរភាពហិរញ្ញវត្ថុរបស់កម្ពុជា និងគោលដៅសេដ្ឋកិច្ចទូលំទូលាយនៃការជំរុញការបង្កើតថ្មី តម្លាភាព និងភាពធន់នៅក្នុងទីផ្សារ។

​លោក ស៊ូ សុជាតិ បានសង្កត់ធ្ងន់លើសារៈសំខាន់នៃកិច្ចសហប្រតិបត្តិការនេះ ដោយបញ្ជាក់ថា៖«កិច្ចព្រមព្រៀងនេះលើសពីឯកសារមួយ វាតំណាងឱ្យការប្តេជ្ញាចិត្តរួមគ្នារបស់យើង ដើម្បីសម្រេចបាននូវវឌ្ឍនភាពដ៏មានន័យ និងយូរអង្វែង។ នៅពេលដែលគម្រោងនេះចាប់ផ្តើមដំណើរការជាផ្លូវការ ការប្តេជ្ញាចិត្តពីទាំង SERC និង IFC មានគោលបំណងផ្តល់នូវអត្ថប្រយោជន៍​សម្រាប់ការអភិវឌ្ឍទីផ្សារនិស្សន្ទ​ និងសេដ្ឋកិច្ចកម្ពុជា»។

ដោយឡែក​​ការ​ដាក់​ឲ្យដំណើរការជួញដូរ​ឧបករណ៍និស្សន្ទ​គិត​ត្រឹម​ឆ្នាំ ២០២៣ បាន​កើនឡើងដល់ ៣០០ លានដុល្លារ ខណៈ​ត្រីមាសទី ១ ឆ្នាំ ២០២៤កន្លងមក ទំហំនៃ​ការ​ជួញដូរមានទំហំ​ដល់ ៥០ លានដុល្លារ។ នេះបើយោងតាម SERC។

សម្រាប់ការ​ដាក់​ឲ្យដំណើរការ​ដំបូង​នៅ​ឆ្នាំ ២០១៧ ទំហំនៃ​ការ​ជូញដូរ​ឧបករណ៍និស្សន្ទ​មាន​ត្រឹម ៤ លាន​ដុល្លារ​ ហើយ​ទំហំនៃ​ការ​ជួញដូរ​មានការ​កើនឡើង​ជា​រៀងរាល់ឆ្នាំ។

ការជួញដូរ​ឧបករណ៍និស្សន្ទបែងចែកជា ៦ ប្រភេទមាន​សរុបជាង ២៤៩ ផលិតផល។ ផលិតផល​ឧបករណ៍​និស្សន្ទ​ទាំង ៦ ប្រភេទ រួម​មាន Forex (ការជួញដូររូបិយប័ណ្ណ) កិច្ចសន្យា​លក់​ពង្រីកថ្លៃលោហធាតុ​មានតម្លៃ កិច្ចសន្យាលក់ពង្រីកថ្លៃប្រេងឆៅ កិច្ចសន្យាលក់ពង្រីកថ្លៃ commodity កិច្ចសន្យា​លក់ពង្រីកថ្លៃសន្ទស្សន៍ និងកិច្ចសន្យាលក់ពង្រីកថ្លៃមូលបត្រកម្មសិទ្ធិ៕