ARDB នឹងបញ្ចេញហិរញ្ញប្បទានពិសេសចំនួន ៣០ លានដុល្លារបន្ថែម ដល់រោងម៉ាស៊ីនកិនស្រូវនៅខេត្តធំៗបី​

ធនាគារអភិវឌ្ឍន៍ជនបទ និងកសិកម្ម (ARDB) នឹងផ្តល់ហិរញ្ញប្បទានពិសេសចំនួន៣០លានដុល្លារដល់ម្ចាស់រោងមាស៊ីនកិនស្រូវនៅខេត្តអាទិភាពធំចំនួន៣ ខេត្តពោធិ៍សាត់, បាត់ដំបង និងបន្ទាយមាន​ជ័យ ដើម្បីប្រមូលទិញស្រូវពីប្រជាកសិករ សំដៅរក្សាលំនឹងថ្លៃនាពេលរដូវប្រមូលផលនេះ។

លោកបណ្ឌិត កៅ ថាច អគ្គនាយក ARDB នៅព្រឹកថ្ងៃទី ២៤ ខែមករា ឆ្នាំ ២០២៥​ បានដឹកនាំកិច្ច​ប្រជុំដើម្បីផ្សព្វផ្សាយ​ហិរញ្ញប្បទាន​ពិសេសបន្ថែមរបស់រាជរដ្ឋាភិបាលចំនួន ៣០លានដុល្លារ ដល់បណ្តារោងម៉ាស៊ីនកិនស្រូវនៅជុំវិញ ខេត្តពោធិ៍សាត់, បាត់ដំបង និងបន្ទាយមាន​ជ័យ។

បើយោងតាម ARDB កិច្ចប្រជុំនេះ បានរៀបចំឡើងស្ថិតនៅទីស្នាក់ការសាខារបស់ធនាគារអភិវឌ្ឍន៍ជនបទ និងកសិកម្មខេត្តបាត់ដំបង ដែលមានអ្នកចូលរួមជាតំណាងម្ចាស់រោងម៉ាស៊ីនសរុបប្រមាណ ២២រោងម៉ាស៊ីន។ នៅក្នុងកិច្ចប្រជុំនោះលោកបណ្ឌិត កៅ ថាច បានធ្វើការពិភាក្សា និងផ្តោតលើចំណុច​សំខាន់ៗមួយចំនួនរួមមាន៖

១. ផ្សព្វផ្សាយអំពីហិរញ្ញប្បទានពិសេសបន្ថែមចំនួន ៣០ លានដុល្លារអាមេរិករបស់រាជរដ្ឋាភិបាល សម្រាប់ប្រមូលទិញស្រូវពីប្រជាកសិករ។

២. អំពាវនាវដល់រោងម៉ាស៊ីនចូលរួមជាមួយក្រសួងកសិកម្ម រុក្ខាប្រមាញ់ និងនេសាទលើបញ្ហាសំណល់ថ្នាំកសិកម្មលើសកម្រិតកំណត់ក្នុងអង្ករកម្ពុជានាំចេញទៅកាន់សហភាពអឺរ៉ុប។ ជាវិធានការឆ្លើយតបចំពោះមុខដែល​រោងម៉ាស៊ីនអាចចូលរួម គឺតាមរយៈការផ្សព្វផ្សាយឲ្យបានផុលផុសជូនប្រជាកសិករក្នុងតំបន់នីមួយៗ នូវ​បទដ្ឋានកម្រិតកំណត់នៃការប្រើប្រាស់ថ្នាំ-ជី កសិកម្មសម្រាប់រដូវកាលខាងមុខៗ។

៣. បន្តចូលរួមទិញស្រូវ ក្នុងរដូវកាលចូលឆ្នាំប្រពៃណីចិនខាងមុខនេះ ក្នុងករណីរោងម៉ាស៊ីនឈប់សម្រាក ដូច្នេះរោងម៉ាស៊ីនផ្តល់ដំណឹងនិងផ្សព្វផ្សាយជូនប្រជាកសិករក្នុងតំបន់ដែលរោងម៉ាស៊ីនប្រមូលទិញឱ្យបានជ្រាប ដែលការណ៍នេះអាចបញ្ចៀសបានការច្រូតកាត់ច្រើនលើសតម្រូវការ។

៤. គិតគូរអំពីនិន្នាការទីផ្សារអង្ករអន្តរជាតិ, សមត្ថភាព និងលទ្ធភាពដែលរ៉ោងម៉ាស៊ីន អាចបង្កើនការកែច្នៃសម្រាប់បម្រើការនាំចេញ។

៥. ពិភាក្សាអំពីបញ្ហាប្រឈមនានាដែលរោងម៉ាស៊ីន និងក្រុមហ៊ុននាំអង្ករចេញកំពុងប្រឈម, ដំណោះស្រាយចំពោះមុខនិងសំណូមពរនានា។

៦. លើកទឹកចិត្ត និងជំរុញឲ្យម្ចាស់រោងម៉ាស៊ីន ប្រើប្រាស់សេវា ធានាឥណទាន របស់សាជីវកម្ម ធនា​ឥណទានកម្ពុជា (CGCC) បន្ថែមពីយន្តការធនាគារ ដែលមានស្រាប់៕