សេដ្ឋកិច្ច

ធនាគារ ត្រៀមឱ្យអតិថិជនដែលបង់រំលស់ជាមួយម្ចាស់បុរី ផ្ទេរបំណុល ដែលមានការប្រាក់ទាបជាង

បានផុស

១ ខែ មុន

នៅ

ថ្ងៃសុក្រ ២៤ មករា ២០២៥

ដោយ

ធនាគារប្រៃសណីយ៍កម្ពុជា ចង់ចូលរួមយន្តការសម្របសម្រួលឲ្យអតិថិជនដែលបានបង់រំលស់ផ្ទះជាមួយម្ចាស់បុរី ក្នុងតម្លៃខ្ពស់ អាចផ្ទេរកម្ចីនេះទៅជាមួយគ្រឹះស្ថានធនាគារ និងហិរញ្ញវត្ថុវិញ ក្នុងអត្រាការប្រាក់ទាបជាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក តូច ចៅចេក ប្រធាននាយកប្រតិបត្តិធនាគារប្រៃសណីយ៍កម្ពុជា មានប្រសាសន៍ថា យន្តការនេះគឺល្អទាំងសងខាង ដោយសារតែអ្នកដែលប្រើប្រាស់ ការបង់រំលោះនៅបុរីនោះជួនកាល គាត់អាចមានការប្រាក់ថ្លៃ ហើយម្ចាស់បុរីមានសាច់ប្រាក់មានកម្រិត គាត់ត្រូវការលុយដើម្បីធ្វើបន្តទៀត ដូច្នេះបើគាត់ត្រឡប់មកប្រើលុយហ្នឹងជាមួយធនាគារវិញ គឺល្អប្រសើរ។

លោក តូច ចៅចេកមានប្រសាសន៍ថា៖ «ខាងធនាគារជាតិ ក៏ដូចជាក្រសួងរៀបចំដែនដី ចង់ស្វះស្វែងឱ្យធនាគារទាំងអស់ ជួយសហការផ្ដល់កម្ចីក្នុងអត្រាការប្រាក់មួយដែលល្អប្រសើរសមរម្យត្រឹម ៧% ទៅ ៨% ធនាគារមិនពិបាកក្នុងារផ្ដល់ជូនទេ»។ លោក តូច ចៅចេក បញ្ជាក់ថា អតិថិជនត្រូវមានលក្ខខណ្ឌត្រឹមត្រូវតាមតម្រូវការរបស់ធនាគារ ទើបធនាគារអាចផ្ដល់ជូនការផ្ទេរបាន។

លោកស្រី គឹម គិនកេសា នាយិកាក្រុមហ៊ុនអចលនទ្រព្យ CBRE Cambodia មានប្រសាសន៍ថា នេះជាជំហាន វិជ្ជមាន សម្រាប់ទាំងអ្នកអភិវឌ្ឍន៍ ក៏ដូចជាធនាគារខ្លួនឯង ប្រសិនបើអ្នកទិញគាត់មានលក្ខណៈគ្រប់គ្រាន់ បើគាត់ផ្ទេរកម្ចីរបស់គាត់ពីម្ចាស់បុរីទៅធនាគារ គឺទី១ គាត់ចំណេញការប្រាក់ រយៈពេលបង់អាចវែងជាងមុន ដូច្នេះការបង់ប្រចាំខែ អាចតិចជាងមុនសម្រួលដល់ការបង់ប្រចាំខែរបស់គាត់ សម្រាប់អ្នកភិវឌ្ឍគឺគាត់បានសាច់ប្រាក់។

កាលពីពេលកន្លងទៅថ្មីៗនេះ គ្រឹះស្ថានធនាគារ និងហិរញ្ញវត្ថុ ក៏បានគាំទ្រគំនិតផ្តួចផ្តើម ក្នុងការបន្ធូរបន្ថយការប្រាក់លើកម្ចីសម្រាប់ការអភិវឌ្ឍលំនៅឋាន និងទិញអចលនទ្រព្យមកត្រឹម ៨% ក្នុងមួយឆ្នាំ ដែលអត្រាការប្រាក់ថ្មីនេះ នឹងផ្តល់ឱ្យអតិថិជន ទិញលំនៅឋាននូវលទ្ធភាពអនុវត្តកាតព្វកិច្ចសងត្រឡប់ កាន់តែមានភាពងាយស្រួល។

យោងតាមធនាគារជាតិ គិតត្រឹមខែតុលា ឆ្នាំ២០២៤ ឥណទានផ្តល់ដោយគ្រឹះស្ថានធនាគារ និងហិរញ្ញវត្ថុទៅក្នុងវិស័យអចលនទ្រព្យមានប្រមាណ ៦,២០ ពាន់លានដុល្លារ ឬស្មើនឹង ១០%នៃទំហំឥណទានជាង ៦១ ពាន់លានដុល្លារ មានកំណើន ១៧,៨% ធៀបនឹងរយៈពេលដូចគ្នា ក្នុងឆ្នាំ ២០២៣៕

អត្ថបទ៖ ឡេង ដេត