ព័ត៌មានអន្ដរជាតិ

ប្រាក់ចំណេញឧស្សាហកម្មចិន បន្តធ្លាក់ចុះក្នុងឆ្នាំ២០២៤ ពោលគឺ ៣ ឆ្នាំជាប់ៗគ្នា

បានផុស

១ ខែ មុន

នៅ

ថ្ងៃចន្ទ ២៧ មករា ២០២៥

ដោយ

ទិន្នន័យផ្លូវការចេញផ្សាយនៅថ្ងៃចន្ទនេះ បានបង្ហាញថា ប្រាក់ចំណេញរបស់ក្រុមហ៊ុនឧស្សាហកម្មចិន បានបន្តធ្លាក់ចុះក្នុងឆ្នាំ ២០២៤ និងជាការធ្លាក់ចុះ៣ឆ្នាំជាប់ៗគ្នា ដែលជាសញ្ញាសម្រាប់អ្នកបង្កើតគោលនយោបាយចិនឱ្យបង្កើនផែនការជំរុញសេដ្ឋកិច្ច ចំពេលមានការគំរាមកំហែងកាន់តែខ្លាំងពីវិធានការពន្ធរបស់អាមេរិក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យរបស់ការិយាល័យស្ថិតិជាតិចិន (NBS) បង្ហាញថា ប្រាក់ចំណេញឧស្សាហកម្មបានកើនឡើង ១១ ភាគរយ ក្នុងខែធ្នូ ធៀបនឹងខែដូចគ្នាកាលពីឆ្នាំមុន បន្ទាប់ពីការធ្លាក់ ៧,៣ ភាគរយ នៅខែវិច្ឆិកា។ យ៉ាងណាមិញ ពេញមួយឆ្នាំ ២០២៤ ប្រាក់ចំណេញឧស្សាហកម្មចិន បានធ្លាក់ចុះ ៣,៣ ភាគរយ ដោយបន្តពីការធ្លាក់ចុះ ២,៣ ភាគរយ ក្នុងឆ្នាំ ២០២៣។

ការធ្លាក់ចុះនៃប្រាក់ចំណេញប្រចាំឆ្នាំនេះ ត្រូវបានកត់ត្រាឡើង ទោះបីជារដ្ឋាភិបាលចិនមើលឃើញពីការសម្រេចបាននូវកំណើនសេដ្ឋកិច្ចគោលដៅ ៥ ភាគរយ ក្នុងឆ្នាំ ២០២៤ ក៏ដោយ។ គេមើលឃើញថា នៅឆ្នាំមុន រដ្ឋាភិបាលចិនបានដាក់ចេញនូវគោលនយោបាយជាច្រើន ដើម្បីជំរុញសេដ្ឋកិច្ច ដែលញំញីទៅដោយការជាប់គាំងនៃវិបត្តិអចលនទ្រព្យ កម្សោយតម្រូវការក្នុងស្រុក និងកម្សោយនៃទំនុកចិត្តអាជីវកម្មជាដើម។

ទិន្នន័យផ្លូវការបានបង្ហាញថា តម្លៃទំនិញនៅរោងចក្រក្នុងឆ្នាំ ២០២៤ បានបន្តធ្លាក់ចុះ ២ ឆ្នាំជាប់ៗគ្នា ដែលធ្វើឱ្យប៉ះពាល់ដល់ប្រាក់ចំណេញសាជីវកម្ម និងប្រាក់ចំណូលរបស់កម្មករ។

នៅឆមាសទី២នៃឆ្នាំ ២០២៤ ចិនបានដាក់ចេញនូវវិធានការជំរុញសេដ្ឋកិច្ចជាច្រើនជុំ រួមទាំងការពង្រីកគ្រោងការណ៍ពាណិជ្ជកម្មទំនិញប្រើប្រាស់ដើម្បីជំរុញតម្រូវការ។

យ៉ាងណាមិញ គេនៅតែមើលឃើញពីភាពត្រដាបត្រដួស ដោយទិន្នន័យសេដ្ឋកិច្ចនៅខែធ្នូចេញផ្សាយនៅដើមខែនេះ បានបង្ហាញពីកំណើនអតុល្យភាព ដោយទិន្នផលឧស្សាហកម្មមានលើសពីការលក់រាយ ខណៈអត្រាគ្មានការងារធ្វើកើនឡើងខ្ពស់។ ជាមួយគ្នានោះ ចិនបានកត់ត្រាពីកំណើននៃការនាំចេញនៅខែធ្នូ ដោយសារតែការជំរុញរបស់អាជីវកម្ម ក្រោមក្ដីបារម្ភនៃគោលនយោបាយពន្ធគយរបស់ប្រធានាធិបតីអាមេរិក លោក ដូណាល់ ត្រាំ ដែលឡើងកាន់តំណែងកាលពីថ្ងៃចន្ទសប្ដាហ៍មុន៕