ព័ត៌មានអន្ដរជាតិ

TikTok គ្រោងវិនិយោគលើមជ្ឃមណ្ឌលទិន្នន័យនៅថៃ ទំហំ ៣,៧ ប៊ីលានដុល្លារ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ៣០ មករា ២០២៥

ដោយ

ក្រុមប្រឹក្សាវិនិយោគថៃ (BOI) បានឱ្យដឹងកាលថ្ងៃពុធថា ក្រុមហ៊ុន TikTok ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនអ៊ិនធឺណិតចិន ByteDance គ្រោងនឹងវិនិយោគលើមជ្ឈមណ្ឌលទិន្នន័យនៅក្នុងប្រទេសថៃ តម្លៃប្រមាណ ១២៦,៨ ប៊ីលានបាត (៣,៧៦ ប៊ីលានដុល្លារ)។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវិនិយោគរបស់ TikTok ដែលធ្វើឡើងតាមរយៈអង្គភាពប្រចាំសិង្ហបុរីរបស់ខ្លួន នឹងគាំទ្រដល់ក្រុមហ៊ុនដែលពាក់ព័ន្ធរបស់ខ្លួន ជាមួយនឹងប្រតិបត្តិការផ្សេងៗចាប់ផ្តើមនៅឆ្នាំ ២០២៦។ យោងតាម BOI ការវិនិយោគដដែល ត្រូវបាន BOI អនុម័តកាលពីថ្ងៃពុធ។

អគ្គលេខាធិការនៃ BOI លោក Narit Therdsteerasukdi បានលើកឡើងថា៖ «ការវិនិយោគនេះគឺជាជំហានដ៏សំខាន់មួយក្នុងការលើកកម្ពស់ហេដ្ឋារចនាសម្ព័ន្ធឌីជីថល និងបញ្ញាសិប្បនិម្មិត (AI) របស់ប្រទេសថៃ។ វានាំយើងឱ្យខិតទៅជិតគោលដៅរបស់យើងក្នុងការក្លាយជាមជ្ឈមណ្ឌលឌីជីថលប្រចាំតំបន់»។

ក្រុមហ៊ុន TikTok មិនទាន់បកស្រាយយ៉ាងណាទេ ជុំវិញបញ្ហានេះ។ ការណ៍គួរឱ្យកត់សម្គាល់នោះគឺថា ការវិនិយោគរបស់ក្រុមហ៊ុនចិនមួយនេះ ធ្វើឡើងនៅពេលដែលក្រុមហ៊ុនបច្ចេកវិទ្យាយក្សជាច្រើនគ្រោងបង្កើតមជ្ឈមណ្ឌលទិន្នន័យនៅថៃ ដែលជាប្រទេសមានសេដ្ឋកិច្ចធំទី២របស់អាស៊ីអាគ្នេយ៍។

ក្រុមហ៊ុន Google របស់ Alphabet Inc បាននិយាយថា ខ្លួននឹងវិនិយោគប្រាក់ ១ ប៊ីលានដុល្លារ លើមជ្ឈមណ្ឌលទិន្នន័យ ក្នុងខេត្ត Chon Buri នៃប្រទេសថៃ កាលពីឆ្នាំមុន ពោលគឺ ១ ឆ្នាំបន្ទាប់ពីក្រុមហ៊ុនអាមេរិក Amazon Web Services បានប្រកាសការវិនិយោគ ៥ ប៊ីលានដុល្លារនៅក្នុងប្រទេសនេះ ក្នុងរយៈពេល ១៥ ឆ្នាំ។ ក្រុមហ៊ុន Microsoft ក៏បានប្រកាសថា ខ្លួននឹងបើកមជ្ឈមណ្ឌលទិន្នន័យក្នុងតំបន់ដំបូងរបស់ខ្លួននៅថៃផងដែរ៕