ព័ត៌មានអន្ដរជាតិ

ត្រាំ ៖ ពន្ធលើម៉ិកស៊ិក និងកាណាដា អាចនឹងមិនរាប់បញ្ចូលប្រេងកាតទេ

បានផុស

៦ ថ្ងៃ មុន

នៅ

ថ្ងៃសុក្រ ៣១ មករា ២០២៥

ដោយ

ប្រធានាធិបតីអាមេរិក លោក ដូណាល់ ត្រាំ កាលពីថ្ងៃព្រហស្បតិ៍ បាននិយាយថា លោកនឹងសម្រេចចិត្តក្នុងពេលឆាប់ៗនេះ ថាតើត្រូវរាប់បញ្ជូលប្រេងកាតទៅក្នុងទំនិញជាប់ពន្ធគយ ២៥ ភាគរយ ដែលលោកនឹងដាក់លើប្រទេសម៉ិកស៊ិក និងកាណាដា ឬអត់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងរបស់លោកយ៉ាងដូច្នេះ ធ្វើឡើងត្រឹមតែ ២ ថ្ងៃប៉ុណ្ណោះ មុនកាលកំណត់ដែលលោក បានសន្យាថានឹងដាក់ពន្ធគយលើប្រទេសទាំង២ ពោលគឺថ្ងៃទី ១ កុម្ភៈ ចំពេលមានការព្រមានផ្សេងៗពីសេដ្ឋវិទូថា ពន្ធគយរបស់លោកនឹងធ្វើឱ្យអតិផរណាកើនខ្ពស់ ខណៈដែលម៉ិកស៊ិក និងកាណាដា សុទ្ធតែជាប្រទេសផ្គត់ផ្គង់ប្រេងឱ្យអាមេរិកកំពូលៗ។

លោកថ្លែងអំពីបញ្ហាពន្ធប្រេងនេះយ៉ាងដូច្នេះថា៖ «យើងអាចឬមិនអាច។ យើងនឹងធ្វើការប្តេជ្ញាចិត្តនោះប្រហែលជានៅយប់នេះ ។ លោកបានបន្ថែមថា វាអាចនឹងអាស្រ័យលើតម្លៃខ្លះដែរ និងលើថាតើប្រទេសទាំង២មាន «អាកប្បកិរិយាល្អត្រឹមត្រូវចំពោះយើងដែរទេ»។

គួរគូសបញ្ជាក់ថា លោក ត្រាំ បានគំរាមដាក់ពន្ធលើម៉ិកស៊ិក និងកាណាដា លើបញ្ហា២ធំៗ រួមមានលំហូរជនអន្តោប្រវេសន៍ខុសច្បាប់ និងថ្នាំញៀនហេ្វនតានីល។ ប៉ុន្តែជាថ្មីម្ដងទៀត លោកបាននិយាយកាលពីថ្ងៃព្រហស្បតិ៍ថា អាមេរិកមាន «ហេតុផលមួយចំនួន» ចំពោះការដាក់ពន្ធ ហើយអត្រាពន្ធ អាចនឹងកើនឡើង ឬនៅថេរ ទៅតាមពេលវេលា។

គួរគូសបញ្ជាក់ថា ម៉ិកស៊ិក និងកាណាដា គឺជាដៃគូពាណិជ្ជកម្មដ៏ធំបំផុតកំពូលៗរបស់សហរដ្ឋអាមេរិក។ យោងតាមក្រសួងការបរទេសសហរដ្ឋអាមេរិក ម៉ិកស៊ិកគឺជាដៃគូពាណិជ្ជកម្មទ្វេភាគីកំពូលរបស់ប្រទេសក្នុងឆ្នាំ ២០២៣ ជាមួយនឹងទំហំពាណិជ្ជកម្មប្រមាណ ៨០៧ ប៊ីលានដុល្លារ ហើយបន្ទាប់មកគឺកាណាដា (៧៨២ ប៊ីលានដុល្លារ) និងចិន (៥៧៦ ប៊ីលានដុល្លារ)។

យោងតាមទិន្នន័យចុងក្រោយពីរដ្ឋបាលព័ត៌មានថាមពលសហរដ្ឋអាមេរិក (EIA) នៅខែតុលា ឆ្នាំ ២០២៤ សហរដ្ឋអាមេរិកបាននាំចូលប្រេងពី ៤ លានបារ៉ែល/ថ្ងៃ ពីកាណាដា ដែលធ្វើឱ្យប្រទេសនេះឈរលើកំពូលតារាងខាងផ្គត់ផ្គង់។ បន្ទាប់មកគឺម៉ិកស៊ិក ដែលផ្គង់ផ្គង់ប្រមាណ ៣៨៣ ០០០ បារ៉ែល/ថ្ងៃ។ អ្នកសេដ្ឋវិទូលើកឡើងថា ការដាក់ពន្ធ ២៥ ភាគរយ លើប្រេងនៃប្រទេសទាំង២ អាចនឹងជំរុញកំណើនតម្លៃ ហើយធ្វើឱ្យអតិផរណាកើនឡើង៕