ឥណ្ឌូណេស៊ី​ត្រូវការកំណើនសេដ្ឋកិច្ច ៦-៧ ភាគរយ ដើម្បី​​ចេញ​ពី​ «អន្ទាក់ចំណូលមធ្យម»

ក្រសួងផែនការអភិវឌ្ឍន៍ជាតិឥណ្ឌូណេស៊ី​ (Bappenas) បាន​អះអាងថា ​​​ឥណ្ឌូណេស៊ី​ត្រូវ​ការ​កំណើនសេដ្ឋកិច្ចចន្លោះពី​ ៦-៧ ភាគរយ ដើម្បី​ងើប​ចេញ​ពី​ប្រទេសជាប់​ «អន្ទាក់​នៃប្រាក់ចំណូល​មធ្យម»។ ​នេះបើតាម​ការ​ចុះ​ផ្សាយ​របស់​កាសែត Antara កាល​ពីថ្ងៃព្រហស្បតិ៍។

ក្រសួង​លើក​ឡើងថា​ វាមានសារៈសំខាន់ណាស់ក្នុងការគេចចេញពីអន្ទាក់​ប្រាក់ចំណូលមធ្យម ដើម្បីសម្រេចបាននូវចក្ខុវិស័យ «Golden Indonesia» ដែលកំណត់គោលដៅឱ្យ​ប្រទេស​មាន​អធិបតេយ្យភាពត្រឹមត្រូវ​ ជឿនលឿន យុត្តិធម៌ និងវិបុលភាព ត្រឹម​ឆ្នាំ ២០៤៥ (១០០ ឆ្នាំ​ក្រោយ​ទទួល​បាន​ឯករាជ្យ​នៅឆ្នាំ ១៩៤៥)។

អនុរដ្ឋមន្រ្តីនៃក្រសួងទទួលបន្ទុកផែនការ​អភិវឌ្ឍន៍​ម៉ាក្រូ​សេដ្ឋកិច្ច លោក Eka Chandra Buana បាន​និយាយថា​៖ «យើងនៅសល់តែ ២១ ឆ្នាំ ទៀតប៉ុណ្ណោះ (មុនឆ្នាំ២០៤៥)។ សម្រាប់​គោលដៅនោះ យើងត្រូវតែអាចគេចផុតពីអន្ទាក់ចំណូលមធ្យម ដោយធ្វើឱ្យសេដ្ឋកិច្ចរបស់យើងកើនឡើងយ៉ាងតិចពី ៦ ទៅ ៧ ភាគរយ (ក្នុងមួយឆ្នាំ)»។

លោកបានពន្យល់ថា ប្រសិនបើសេដ្ឋកិច្ចកើនឡើង ៧ ភាគរយ នោះឥណ្ឌូណេស៊ីអាចគេចផុតពីអន្ទាក់​ប្រាក់ចំណូលមធ្យម មុនឆ្នាំ ២០៤០។ ប៉ុន្តែ​បើវាកើនឡើង ៦ ភាគរយ ​នោះឥណ្ឌូណេស៊ីអាចគេចផុត​នៅ​ឆ្នាំ ២០៤១ ។

គួរ​គូស​បញ្ជាក់ថា​ រដ្ឋាភិបាលឥណ្ឌូណេស៊ីបានកំណត់គោលដៅដើម្បីក្លាយជាប្រទេសអភិវឌ្ឍន៍នៅឆ្នាំ ២០៤៥ រួមទាំងការឈានដល់ប្រទេស​មាន​ប្រាក់ចំណូលសម្រាប់មនុស្សម្នាក់ ចំនួន ៣០ ៣០០ ដុល្លារ/ឆ្នាំ ​ ដោយ​លុបបំបាត់ភាពក្រីក្រ និងវិសមភាពឱ្យ​ស្ទើរតែគ្មាន​ និង​កែលម្អធនធានមនុស្ស។

ក្រៅពី​នេះ ឥណ្ឌូណេស៊ី ក៏មានបំណងបង្កើនឥទ្ធិពល និងភាពជាអ្នកដឹកនាំក្នុងតំបន់ ក៏ដូចជាបន្តការគ្រប់គ្រងបរិស្ថានប្រកបដោយនិរន្តរភាព និងការកាត់បន្ថយការបំភាយឧស្ម័នផ្ទះកញ្ចក់ផងដែរ​។

​យ៉ាង​ណា​មិញ​ ស្ថានភាពភូមិសាស្ត្រនយោបាយ និងភូមិសាស្ត្រសេដ្ឋកិច្ចរបស់​ប្រទេស​ បង្កបញ្ហាប្រឈមមួយទៀតក្នុងការពន្លឿនកំណើនសេដ្ឋកិច្ចរបស់​ឥណ្ឌូណេស៊ី។ នេះ​មិន​ទាន់​និយាយអំពីគម្លាតដ៏ធំរវាងតំបន់ភាគខាងលិច និងភាគខាងកើតរបស់ប្រទេសផង៕