​រោងចក្រផលិតរបងពីអាលុយមីញ៉ូមរបស់អាមេរិកបើកដំណើការនៅកម្ពុជា

ក្រុមហ៊ុន Fence Empire LLC  ដែលមានមូលដ្ឋាននៅសហរដ្ឋអាមេរិកបាន​បើកដំណើការជាផ្លូវការនូវរោងចក្រផលិតរបងអាលុយមីញ៉ូម​របស់ខ្លួននៅក្នុងប្រទេសកម្ពុជា ដែលជាយុទ្ធសាស្រ្តពង្រីវត្តមានមកកាន់បណ្តាប្រទេសនានានៅលើពិភពលោក។

បើយោងតាមសេចក្តីប្រកាសព័ត៌មានរបស់ក្រុ​មហ៊ុនកាលពីថ្ងៃទី២៩ ខែមករា រោងចក្រថ្មីនេះត្រូវបានបើកការសាងសង់តាំងពីឆ្នាំ ២០២៤ ដែលជារោងចក្រទំនើប​មួយ និងជាការបោះជំហានយុទ្ធសាស្ត្រថ្មីមួយទៀតរបស់ខ្លួនក្នុងការពង្រីកវត្តមាន​ទៅក្រៅប្រទេស និងបំពេញតម្រូវការទីផ្សារដែលកើនឡើងសម្រាប់ផលិតផលរបងអាលុយមីញ៉ូមដែលមានគុណភាពខ្ពស់។

​រោងចក្រដែលមានទីតាំងនៅប្រទេសកម្ពុជា ​មានសមត្ថភាព​ផលិតកម្រិតខ្ពស់ ដោយត្រូវបានរចនាឡើងដើម្បីបង្កើនប្រសិទ្ធភាព កាត់បន្ថយថ្លៃដើមផលិតកម្ម និងធានាបាននូវប្រតិបត្តិការប្រកបដោយនិរន្តរភាព។ រោងចក្រ​នេះ​មាន​សមត្ថភាព​ផលិត​ប្រចាំឆ្នាំចំនួន​២សែនតោន​។

ក្រុមហ៊ុននេះបានលើកឡើងថា៖«សម្រាប់វត្តមាននៃរោងចក្ររបស់ខ្លួននៅកម្ពុជា មិនត្រឹមតែជាការធ្វើពិពិធកម្មដំណើរការផលិតរបស់ខ្លួនប៉ុណ្ណោះទេ ប៉ុន្តែវាជាយុទ្ធសាស្រ្តកាត់បន្ថយហានិភ័យពាណិជ្ជកម្មដែលអាចកើតមាន ដូចជាពន្ធគយ ខណៈ​ដែលវាក៏បានចូលរួមចំណែកក្នុងការធានាបាននូវការផលិតប្រកបដោយនិរន្តរភាព។ សម្រាប់ការវិនិយោគជាយុទ្ធសាស្ត្រនេះនឹងជួយពង្រឹងសមត្ថភាពរបស់ក្រុមហ៊ុនក្នុងការផ្តល់នូវផលិតផលដែលមានគុណភាពខ្ពស់ដល់​អតិថិជន​របស់ខ្លួនផងដែរ»​។

Fence Empire LLC ត្រូវ​បាន​បង្កើត​ឡើង​ដើម្បី​បម្រើ​ទីផ្សារ​របង​អាមេរិក​ខាង​ជើង ជាពិសេស​របង​ឈើបែប​ជប៉ុន​​។ ទោះជាយ៉ាងណា ក្រុមហ៊ុននេះពុំបានបញ្ចាក់អំពីទឹកប្រាក់វិនិយោគនៅប្រទេសកម្ពុជាឡើយ៕