ព័ត៌មានជាតិ

ម្ចាស់កាស៊ីណូ Star Vegas នៅប៉ោយប៉ែតបង្ហាញក្តីបារម្ភអំពីផលប៉ះពាល់ពង្រាងច្បាប់អាជីវកម្មល្បែងរបស់ថៃ

បានផុស

៤ សប្តាហ៍ មុន

នៅ

ថ្ងៃសៅរ៍ ១ កុម្ភៈ ២០២៥

ដោយ

ក្រុមហ៊ុនប្រតិបត្តិករកាស៊ីណូ Donaco International Ltd ដែលបានចុះបញ្ជីផ្សារភាគហ៊ុនរបស់អូស្រ្តាលី និងជាក្រុមហ៊ុនមេនៃកាស៊ីណូ Star Vegas នៅក្រុងប៉ោយប៉ែតនៃប្រទេសកម្ពុជា កំពុងធ្វើតាមដាននូវផលប៉ះពាលនានានៃសេចក្តីសម្រេចលើពង្រាងច្បាប់អាជីវកម្មល្បែងរបស់ថៃដែលត្រូវបានគណៈរដ្ឋមន្រ្តីអនុម័តកាលពីពេលថ្មីៗកន្លងមកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី១៣ ខែកមរាកន្លងទៅនេះ នាយករដ្ឋមន្រ្តីថៃ អ្នកស្រី ផែតងតាន ស៊ីណាវ៉ាត្រា បានប្រកាសថា គណៈរដ្ឋមន្ត្រីរបស់ខ្លួនបានអនុម័តសេចក្តីព្រាងច្បាប់ដែលនឹងដាក់កាស៊ីណូ និងការល្បែងស៊ីសង ឱ្យនៅស្របច្បាប់ ក្នុងគោលបំណងជំរុញទេសចរណ៍ ការងារ និងការវិនិយោគ។ ខណៈប្រទេសជិតខាងមួយមួយចំនួនរួមមានកម្ពុជាបានទាញប្រយោជន៍ពីការបង្កើតកាស៊ីណូធំៗ រដ្ឋាភិបាលថៃបានលើកឡើងថា ថៃបានបិទភ្នែកពីប្រភពចំណូល និងមិនបានប្រើប្រាស់សក្ដានុពល «ទេសចរណ៍» របស់ខ្លួនឱ្យបានគ្រប់គ្រាន់ ចំពោះការមិនបង្កើតឱ្យមានកាស៊ីណូ។

ជាមួយក្តីបារម្ភដែលរដ្ឋាភិបាលថៃទើបតែអនុម័តនូវសេចក្តីព្រែងច្បាប់អាជីវកម្មល្បែងនេះ លោក Porntat Amatavivadhana ប្រធានមិនប្រតិបត្តិរបស់ក្រុមហ៊ុន Donaco កំពុងធ្វើតាមដាន និងវាយតម្លៃអំពីផលប៉ះពាល់នានាដែលអាចនឹងកើតមានឡើងមកលើប្រតិបត្តិការកាស៊ីណូ Star Vegas របស់ខ្លួន។

លោក Porntat បានថ្លែងបញ្ជាក់ថា៖«យើងកំពុងតាមដានយ៉ាងដិតដល់ លើការវិវឌ្ឍន៍នៃឧស្សាហកម្មហ្គេមដែលកំពុងវិវឌ្ឍន៍នៅអាស៊ីអាគ្នេយ៍ រួមទាំងសេចក្តីព្រាងច្បាប់ស្តីពីអាជីវកម្មដ៏ស្មុគស្មាញដែលបានស្នើឡើងដោយរដ្ឋាភិបាលថៃ ដែលយើងនឹងបន្តវាយតម្លៃអំពីផលប៉ះពាល់របស់វាមក លើប្រតិបត្តិការរបស់កាស៊ីណូ Star Vegas របស់យើង»៕

យោងតាមព័ត៌មាន IGA ចេញផ្សាយកាលពីថ្ងៃទី៣១ ខែមករាថា កាស៊ីណូ Star Vegas ទទួលបានប្រាក់ចំណូលសុទ្ធចំនួន ៦,៥៧ លានដុល្លារអូស្រ្តាលីក្នុងត្រីមាសទី៤ កើនឡើងពី ៦,១២ លានដុល្លារអូស្រ្តាលីធៀបនឹងត្រីមាសដូចគ្នាកាលពីឆ្នាំ២០២៣ ។ ជាមួយគ្នានោះដែរ អ្នកចូលលរេងប្រចាំថ្ងៃជាមធ្យមមានចំនួន៩៥៧ នាក់គឺកើនឡើងពី ៨៦១ នាក់កាលពីឆ្នាំ២០៣ និង ៩៤១នាក់នៅក្នុងត្រីមាសទី៣។

លោក រស់ ភីរុណ អគ្គលេខាធិការគណៈកម្មការគ្រប់គ្រងល្បែងពាណិជ្ជកម្មកម្ពុជាបានមានប្រសាសន៍ថា បានថ្លែងប្រាប់កម្ពុជាថ្មីកន្លងមកថា ក្នុងឆ្នាំ២០២៤កន្លងទៅនេះ រដ្ឋាភិបាលបានទទួលចំណូលពីអាជីវកម្មល្បែង (មានទាំងកាស៊ីណូ និងល្បែងផ្សងសំណាង) បានចំនួន ២៥៤, ៩០៧ ប៊ីលានរៀល (ឬជាង៦៣,១១ លានដុល្លារ), កើនឡើងចំនួន ៨៥% ធៀបនឹងឆ្នាំ២០២៣។

ជាមយគ្នានោះដែរ លោកថា គិតត្រឹមដំណាច់ឆ្នាំ២០២៤ គ.ល.ក. បានផ្តល់អាជ្ញាបណ្ណជូនដល់កាស៊ីណូ ចំនួន ១៩៥។ គិតមកដល់បច្ចុប្បន្ន អាជ្ញាបណ្ណទាំងនោះត្រូវបានដកហូតចំនួន ១; ព្យួរចំនួន ១ និងផុតសុពលភាពចំនួន១៥។ លោកថាសម្រាប់ល្បែងផ្សេងសំណាង គ.ល.ក. បានផ្ដល់អាជ្ញាបណ្ណសរុបចំនួន ២១ ក្រុមហ៊ុន (ក្នុងនោះដកហូតចំនួន១ ក្រុមហ៊ុន និងព្យួរចំនួន ៣ ក្រុមហ៊ុន); សាខាល្បែងផ្សងសំណាងចំនួន ៤៥ សាខា (ដែលក្នុងនោះព្យួរចំនួន ១៣ សាខា); លិខិតអនុញ្ញាតបុស្តិ៍សេវាល្បែងផ្សងសំណាងចំនួន ៩០ ដែលក្នុងនោះផុតសុពលភាពទាំងអស់៕

Related Topics:កាស៊ីណូ