អគ្គិសនីកម្ពុជាដាក់គោលដៅឱ្យអតិថិជនបង់ថ្លៃភ្លើងតាមប្រព័ន្ធឌីជីថលឱ្យបានជាង ៩០ ភាគរយ ចាប់ពីដំណាច់ឆ្នាំ ២០២៥

លោក កែវ រតនៈ រដ្ឋមន្ត្រីក្រសួងរ៉ែ និងថាមពល មានប្រសាសន៍នៅថ្ងៃទី ០៣ ខែកុម្ភៈ ឆ្នាំ ២០២៥ នេះថា​ រាជរដ្ឋាភិ​បាល​​​​បានចាប់យកបច្ចេកវិទ្យា ដើម្បីជំរុញការអភិវឌ្ឍសេដ្ឋកិច្ច និង​សង្គម​កម្ពុជាឱ្យកាន់តែមានការរីកចម្រើន ដែលធ្វើឱ្យកម្ពុជាក្លាយទៅជាខ្សែសង្វាក់ផលិតកម្មមួយ​របស់សេដ្ឋកិច្ចក្នុងតំបន់ និងពិភពលោក។

លោករដ្ឋមន្ត្រីបានបញ្ជាក់ថា ថាមពលអគ្គិសនី​ជាចំណែកមួយដ៏សំខាន់ក្នុងការប្រើប្រាស់​បច្ចេក​វិទ្យាឌីជីថល ដើម្បីធ្វើការ​កែសម្រួល​សេវា​នៅកម្ពុជាឱ្យកាន់តែមានប្រសិទ្ធភាព និងតម្លាភាព អគ្គិ​សនីកម្ពុជា និងអាជ្ញាធរអគ្គិសនីកម្ពុជា បានធ្វើការរួមគ្នា ដើម្បីផ្ដល់សេវា​បម្រើអតិថិជននៅ​លើ​ប្រ​ព័ន្ធ​ឌីជីថល ក្នុងក្របខណ្ឌប្រតិបត្តិការរបស់ EDC និងក្របខណ្ឌបង្កើត EDC អេប សម្រាប់​ក្របខណ្ឌទូទាំងប្រទេស ដើម្បីឱ្យមានសមាហរណកម្មមួយឱ្យអ្នកផ្គត់ផ្គង់ទាំងអស់ដែលមាន EDC​ និងសេវាករឯកជនអាចប្រើថ្នាលរួមដើម្បីបម្រើប្រជាជនដូចគ្នា។

លោក កែវ រតនៈ បញ្ជាក់ថា៖ «ដូច្នេះក្រសួងចង់បាន ២០២៥ ដែលសេវាពាក់ព័ន្ធនេះ ត្រូវ​ធ្វើ​ប្រតិបត្តិការទៅលើអេបទាំងអស់ ហើយឈានទៅ ២០២៦ នឹងប្រជុំឡើងវិញ សូមឱ្យ​ការបង់​លុយ​ពីអតិថិជន ៩៥% ត្រូវតែបង់​លុយតាមប្រព័ន្ធធានាគារទាំងអស់ ហើយរាល់​ការ​ដាក់ពាក្យ​ស្នើសុំ​តភ្ជាប់​​ចរន្ត​សុំឱ្យត្រឹមចុងឆ្នាំ ២០២៥ នេះ អត់មានដាក់​ពាក្យធ្វើដោយដៃទេ»។

យោងតាមអាជ្ញាធរអគ្គិសនីកម្ពុជា ​ការអភិវឌ្ឍបង្កើនសមត្ថភាព​ប្រភពផលិត អានុភាពនៃប្រភពផលិតអគ្គិសនី បានកើនឡើងពី ៤ ៦៤៩ មេហ្គាវាត់ នៅចុងឆ្នាំ ២០២៣ ដល់ ៥ ០៤៤ មេហ្គាវាត់នៅចុងឆ្នាំ ២០២៤ ឯបរិមាណ​ថា​​មពល​ដែលបាន​​ប្រើ​ប្រាស់​ចេញពីប្រភពអគ្គិសនី បានកើនឡើងពី ១៦ ៨០៤ លានគីឡូវាត់ម៉ោង នៅឆ្នាំ ២០២៣ មក ១៩ ៤១៩ លានគីឡូវ៉ាត់ម៉ោង នៅឆ្នាំ ២០២៤។

ការអភិវឌ្ឍប្រព័ន្ធបញ្ជូនអគ្គិសនីនៅក្នុឆ្នាំ ២០២៤ កម្ពុជាបានអភិវឌ្ឍបណ្ដាញ​អគ្គិស​នីបន្ថែមចំនួន ១៨២ គីឡូម៉ែត្រ និងសាងសង់អនុស្ថានីយចំនួន ២ បន្ថែមទៀត ធ្វើឱ្យបច្ចុប្បន្ននេះ កម្ពុជាមានខ្សែបណ្ដាញបញ្ជូនសរុប ៣ ៨៩០ គីឡូម៉ែត្រ និងមាន​អនុស្ថានីយចំនួន ៧០ ដែលអាចបញ្ជូនប្រភពអគ្គិសនីដល់រាជធានីខេត្តចំនួន ២៥ ផ្ទាល់ ទូទាំងប្រទេស៕

អត្ថបទ៖ ឡេង ដេត