ព័ត៌មានអន្ដរជាតិ

ឥណ្ឌូណេស៊ីគ្រោងសង់ជញ្ជាំងការពារទឹកសមុទ្រ ៧០០ គីឡូម៉ែត្រ

បានផុស

៤ សប្តាហ៍ មុន

នៅ

ថ្ងៃពុធ ៥ កុម្ភៈ ២០២៥

ដោយ

ប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ បានអនុម័តលើការសាងសង់ជញ្ជាំងបាំងទឹកសមុទ្រដ៏ធំប្រវែង ៧០០ គីឡូម៉ែត្រ ដែលលាតសន្ធឹងពីខេត្ត Banten ទៅដល់ខេត្ត East Java នៃកោះជ្វា។ នេះបើតាមការចុះផ្សាយរបស់សារព័ត៌មាន Indonesia Business Post កាលពីថ្ងៃចន្ទ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកតំណាងប្រធានាធិបតីទទួលបន្ទុកបញ្ហាអាកាសធាតុ និងថាមពល លោក Hashim Sujono Djojohadikusumo និយាយថា ជញ្ជាំងបាំងទឹកសមុទ្រនេះ មានគោលបំណងការពារវាលស្រែនៅតាមបណ្ដោយឆ្នេរសមុទ្រភាគខាងជើងនៃកោះជ្វា ខណៈប្រជាជនឥណ្ឌូណេស៊ីព្រួយបារម្ភពីការកើនឡើងនៃកម្រិតនីវ៉ូទឹកសមុទ្រ ដែលធ្ងន់ធ្ងរទៅៗដោយសារការប្រែប្រួលអាកាសធាតុ។

លោក Hashim បានបញ្ជាក់ថា ផែនការសម្រាប់ជញ្ជាំងសមុទ្រដ៏ធំនេះ បានដំណើរការតាំងពីឆ្នាំ ១៩៩៤ ដោយគូសបញ្ជាក់ថា រដ្ឋាភិបាលបានទទួលស្គាល់ពីគ្រោះថ្នាក់ដែលបណ្តាលមកពីការកើនឡើងកម្ពស់ទឹកសមុទ្រនៅពេលនោះ។ ទោះជាយ៉ាងណា គម្រោងនេះមិនត្រូវបានគេសម្រេចនោះទេ។

លោក Hashim ព្យាករថា ការសាងសង់អាចនឹងចំណាយពេលពី ១០ ទៅ ២០ ឆ្នាំ។ លោកបានសង្កត់ធ្ងន់ថា វាគ្មានន័យទេក្នុងការបង្កើតដីកសិកម្មបន្ថែមនៅកោះកាលីម៉ាន់តាន់ ឬប៉ាពួ ប្រសិនបើវាលស្រែរាប់លានត្រូវបានជន់លិចដោយនីវ៉ូទឹកសមុទ្រ។ លោកបន្តថា៖ «វាមិនយឺតពេលទេក្នុងការការពារវាលស្រែមានជីជាតិនៅឆ្នេរភាគខាងជើងនៃកោះជ្វា»។

មុនអនុម័តគម្រោងនេះ លោក ប្រាបូវូ បានណែនាំមន្រ្តីរបស់ខ្លួនឱ្យពិនិត្យឡើងវិញនូវការសាងសង់ជញ្ជាំងសមុទ្រដ៏ធំដែលលាតសន្ធឹងពីទីក្រុងហ្សាការតា ទៅកាន់ទីក្រុង Cirebon ដែលជាផ្នែកមួយនៃកម្មវិធីយុទ្ធសាស្រ្តជាតិ (PSN) ក្នុងឆ្នាំ ២០២៥ ។

រដ្ឋមន្ត្រីសម្របសម្រួលកិច្ចការសេដ្ឋកិច្ច លោក Airlangga Hartarto បានកត់សម្គាល់ថា ការសាងសង់គម្រោងជញ្ជាំងបាំងទឹកសមុទ្រយក្ស Jakarta-Cirebon នឹងតភ្ជាប់ជាមួយទំនប់គ្រប់គ្រងទឹកជំនន់ និងទឹកជោរដែលមានស្រាប់នៅក្រុង Semarang នៃខេត្តជ្វាកណ្ដាល៕