ព័ត៌មានអន្ដរជាតិ

កាសែត Nikkei៖ Nissan ផ្អាកការចរចាច្របាច់បញ្ចូលគ្នាជាមួយ Honda

បានផុស

៣ ថ្ងៃ មុន

នៅ

ថ្ងៃពុធ ៥ កុម្ភៈ ២០២៥

ដោយ

កាសែតជប៉ុន Nikkei បានរាយការណ៍ថា ក្រុមហ៊ុនផលិតរថយន្តជប៉ុន Nissan បានផ្អាកការចរចាអំពីការច្របាច់បញ្ចូលគ្នាជាមួយក្រុមហ៊ុនផលិតរថយន្ត Honda ។ នេះបើតាមការចុះផ្សាយរបស់បន្តរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីឆ្នាំមុន Honda ដែលជាក្រុមហ៊ុនផលិតរថយន្តធំទី២របស់ជប៉ុន និង Nissan ដែលជាក្រុមហ៊ុនធំបន្ទាប់ បាននិយាយថា ពួកគេកំពុងចរចាដើម្បីច្របាច់បញ្ចូលគ្នា ដោយបង្កើតជាក្រុមហ៊ុនផលិតរថយន្តធំបំផុតទី៣របស់ពិភពលោក (ដោយគិតលើការលក់រថយន្ត) ចំពេលមានការប្រកួតប្រជែងកាន់តែខ្លាំងពីក្រុមហ៊ុនផលិតរថយន្តចិន។ យ៉ាងណាមិញ ប្រភព២រូបដែលដឹងពីបញ្ហានេះ បានសុំអះអាងជាអនាមិកថា ការចរចាមានភាពស្មុគស្មាញដោយសារការខ្វែងគំនិតគ្នារវាងភាគីទាំងសងខាង។

ប្រភពម្នាក់បាននិយាយថា ក្រុមហ៊ុន Honda ចង់ឱ្យ Nissan ក្លាយជាក្រុមហ៊ុនបុត្រសម្ព័ន្ធរបស់ខ្លួន ជាអ្វីដែលខុសពីការចរចាគ្នាពីដំបូង ដែលស្នើឱ្យមានភាពស្មើគ្នាលើការច្របាច់បញ្ចូល។

យ៉ាងណាមិញ បើតាមរ៉យទ័រ អ្នកនាំពាក្យ Nissan បាននិយាយថា អ្វីដែលកាសែត Nikkei រាយការណ៍មិនផ្អែកលើព័ត៌មានរបស់ក្រុមហ៊ុននោះទេ ខណៈក្រុមហ៊ុនគ្រោងបញ្ចប់ការសម្រេចចិត្តរបស់ទិសដៅអនាគតរបស់ខ្លួននៅពាក់កណ្ដាលកុម្ភៈ។

ចំណែកឯអ្នកនាំពាក្យរបស់ Honda វិញ បាននិយាយថា ក្រុមហ៊ុនមិនបានទទួលដំណឹងអ្វីពីក្រុមហ៊ុន Nissan អំពីការសម្រេចចិត្តដកខ្លួនចេញពីការចរចាច្របាច់បញ្ចូលគ្នានោះទេ៕