ព័ត៌មានជាតិ

សហគ្រាសចំនួន ៨ កំពុងប្រើប្រាស់ប្រព័ន្ធ CamTrace ជម្រុញការនាំចេញផលិតផលជលផលទៅទីផ្សារអន្តរជាតិ

បានផុស

២ ខែ មុន

នៅ

ថ្ងៃពុធ ៥ កុម្ភៈ ២០២៥

ដោយ

បច្ចុប្បន្ន មានសហគ្រាសចំនួន ៨ បាននិងកំពុងប្រើប្រាស់ប្រព័ន្ធអង្កេតដានឌីជីថល (CamTrace) ដើម្បីជួយបង្កើនដល់ការនាំចេញផលិតផលជលផលរបស់ខ្លួនទៅទីផ្សារក្រៅស្រុក តាមរយៈការដាក់ចេញដំណើរការរបស់គម្រោង CAPFISH-Capture ដែលជួយគាំទ្របន្ថែមសម្រាប់សហគ្រាសក្នុងស្រុកដែលមានសក្តានុពលក្នុងស្រុកនាំចេញផលិតផល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានមានប្រសាសន៍ក្នុងកម្មវិធីប្រគល់កញ្ចប់គាំទ្រជាផ្លូវការដល់សហគ្រាសជលផលក្រោយប្រមូលផលចំនួន ២៣ នៅថ្ងៃទី០៥ ខែកុម្ភៈ ឆ្នាំ២០២៥ ថា ប្រព័ន្ធអង្កេតដានឌីជីថល ដែលមានឈ្មោះថា CamTrace នេះ អាចជួយឱ្យសហគ្រាសអាចនាំចេញផល ផលិតផលជលផលរបស់ខ្លួនទៅកាន់ទីផ្សារក្រៅស្រុក ខណៈដែលវាជួយឱ្យអ្នកបរិភោគអាចផ្ទៀងផ្ទាត់ព័ត៌មានពាក់ព័ន្ធទៅនឹងប្រភពដើមផលិតផលបាន។

ក្នុងនោះ មានសហគ្រាសចំនួន ៨ កំពុងប្រើប្រាស់ប្រព័ន្ធនេះ ហើយប្រសិនបើការអនុវត្តប្រព័ន្ធនេះកាន់តែច្រើនពីសំណាក់សហគ្រាសដែលមានសក្តានុពលនាំចេញផ្សេងទៀត នឹងពន្លឿនលទ្ធភាពនៃការនាំចេញផល ផលិតផលជលផលមានគុណភាពនិងសុវត្ថិភាពបានកាន់តែលឿនបន្ថែមទៀត។

ដើម្បីរួមចំណែកជាមួយរាជរដ្ឋាភិបាល ជាពិសេសក្រសួងកសិកម្ម រុក្ខាប្រមាញ់ និងនេសាទ ក្នុងការលើកកម្ពស់និរន្តរភាព និងភាពប្រកួតប្រជែងរបស់វិស័យជលផលនៅកម្ពុជា គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) បានប្រគល់កញ្ចប់គាំទ្រជាផ្លូវការដល់សហគ្រាសជលផលក្រោយប្រមូលផលចំនួន ២៣ តាមរយៈកម្មវិធីហិរញ្ញវត្ថុគាំទ្រការវិនិយោគ (ISF) និងកម្មវិធីគាំទ្រសហគ្រាសជលផលខ្នាតតូចនិងមធ្យម (VCIS) ដែលមានសហគ្រាសជាងពាក់កណ្តាលគ្រប់គ្រងដោយស្រ្តី។

កម្មវិធី ISF ត្រូវបានដាក់ឱ្យដំណើរការក្នុងឆ្នាំ ២០២៤ ក្នុងគោលដៅគាំទ្រដល់សហគ្រាសជាង ១០០ ក្នុងការសម្រេចបាននូវកំណើនប្រកបដោយចីរភាពនិងគ្រប់គ្រងដោយសាជីវកម្មធានាឥណទានកម្ពុជា (CGCC)។ គម្រោង CAPFISH-Capture គឺជាផ្នែកមួយនៃកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន (CAPFish) របស់រាជរដ្ឋាភិបាលកម្ពុជា ក្រោមការគាំទ្រថវិកាពីសហភាពអឺរ៉ុប (EU) និងអនុវត្តរួមគ្នាដោយ រដ្ឋបាលជលផល (FiA) និងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) ដើម្បីលើកស្ទួយនិងកែលម្អប្រតិបត្តិការរបស់សហគ្រាសជលផលក្នុងស្រុក។

បន្ថែមពីលើកម្មវិធី VCIS របស់គម្រោង CAPFISH-Capture ដែលបាននិងកំពុងតែដំណើរការក្នុងការផ្តល់ការគាំទ្រជាសម្ភារបរិក្ខារ និងជំនួយបច្ចេកទេសដល់សហគ្រាស និងតួអង្គក្នុងខ្សែច្រវាក់តម្លៃ រួមទាំងអ្នកផ្គត់ផ្គង់ធាតុចូលកម្មវិធី ISF ផ្តល់ការគាំទ្រដល់ជាប្រាក់កម្ចី និងជំនួយបច្ចេកទេសសមស្រប ដើម្បីបង្កើនប្រសិទិ្ធភាពប្រតិបត្តិការ និងការកែច្នៃផល ផលិតផល ជលផលជារួម។ យុទ្ធវិធីនេះ រួមចំណែកបង្កើនផលិតភាពរបស់សហគ្រាស និងកែលម្អគុណភាព និងសុវត្ថិភាពរបស់ផលិតផល។

មិនតែប៉ុណ្ណោះ កម្មវិធីនេះ មានគោលដៅផ្តល់តម្លៃបន្ថែមនិងបង្កើនបរិមាណផ្គត់ផ្គង់ផលិតផលជលផលដែលមានសុវត្ថិភាព ដើម្បីធ្វើឲ្យកាន់តែមានភាពប្រកួតប្រជែងក្នុងទីផ្សារអន្តរជាតិ រួមទាំង សហភាពអឺរ៉ុបផងដែរ៕