សេដ្ឋកិច្ច

អាកាសចរណ៍ជាតិកម្ពុជាពង្រីកជើងហោះហើរ សំដៅបំពេញតម្រូវការក្នុងស្រុក

បានផុស

២ ម៉ោង មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

ក្រុមហ៊ុនអាកាសចរណ៍ជាតិកម្ពុជា (AIR) បានបន្ថែមជើងហោះហើរក្នុងស្រុកនៅក្នុងខែកុម្ភៈ និងខែមីនា ឆ្នាំ ២០២៥ ស្របពេលដែលវិស័យអាកាសចរណ៍កម្ពុជាកំពុងមានការីកចម្រើន ដែលជំរុញដោយកំណើននៃតម្រូវការធ្វើដំណើរតាមផ្លូវអាកាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនក្រុមហ៊ុនអាកាសចរណ៍ជាតិកម្ពុជានឹងធ្វើការហោះហើរចាប់ពីថ្ងៃទី ១៧ ខែកុម្ភៈ ឆ្នាំ ២០២៥ ទៅតាមតារាងពេលវេលាដែលបានកំណត់ រហូតដល់ថ្ងៃទី ២៨ ខែមីនា ឆ្នាំ ២០២៥ ដែលនឹងធ្វើការហោះហើរពីភ្នំពេញ-សៀមរាប។

លោក Zhan David នាយកប្រតិបត្តិ នៃក្រុមហ៊ុនអាកាសចរណ៍ជាតិកម្ពុជា មានប្រសាសន៍កាលពីពេលថ្មីៗនេះថា ក្រុមហ៊ុនអាកាសចរណ៍ជាតិកម្ពុជាប្ដេជ្ញាបំពេញបេសកម្មក្នុងនាមជាអាកាសចរណ៍ជាតិ តាំងពីការបង្កើតមក ដោយមានមោនភាពក្នុងការបម្រើប្រជាជនកម្ពុជា ហើយក្រុមហ៊ុន តែងតែផ្ដល់សេវាកម្មអាកាសចរណ៍ប្រកបដោយសុវត្ថិភាព និងមានភាពងាយស្រួល។

យោងតាមអាកាសចរណ៍ស៊ីវិល នៅក្នុងឆ្នាំ ២០២៤ អាកាសយានដ្ឋានទាំង ៣ របស់កម្ពុជារួមមាន ភ្នំពេញ-សៀមរាបអង្គរ-ព្រះសីហនុ ទទួលបានជើងហោះហើរជិត ៦ ម៉ឺនជើង (៥៨,៣៥៤) កើនឡើង ១៤% ក្នុងនោះមានអ្នកដំណើរចេញ-ចូល (ទ្វេទិស) ចំនួន ៦ ២៤១ ៨៤២ នាក់ កើនឡើង ២២% ធៀបនឹងរយៈពេលដូចគ្នាក្នុងឆ្នាំ ២០២៣។

លោក ស៊ីន ចាន់សិរីវុត្ថា មានប្រសាសន៍ថា បន្ទាប់ពីការធូរស្រាលនៃជំងឺកូវីដ១៩ ការតភ្ជាប់ជើងហោះហើរចាប់ផ្ដើមបណ្ដើរៗ ខណៈសន្ដិសុខ និងគោលនយោបាយក្នុងវិស័យទេសចរណ៍មានភាពទាក់ទាញ ដែលនាំឱ្យតម្រូវការ និងការតភ្ជាប់នោះជើងហោះហើរក៏កើនឡើងកាន់តែច្រើន។

លោក ស៊ីន ចាន់សិរីវុត្ថា រំពឹងថា នៅឆ្នាំ ២០២៥ ការតភ្ជាប់ជើងហើរហោះរំពឹងមានកំណើនបន្ថែមទៀត ខណៈបច្ចុប្បន្នមានក្រុមហ៊ុនមួយចំនួនបានតភ្ជាប់រួចហើយ។

ការអភិវឌ្ឍន៍វិស័យអាកាសចរណ៍នៅតែជារបៀបវារៈនៃគោលនយោបាយរបស់រាជរដ្ឋាភិបាលកម្ពុជា ដើម្បីជំរុញការតភ្ជាប់ទីផ្សារក្នុងស្រុក និងអន្តរជាតិ ជំរុញវិស័យទេសចរណ៍ និងពាណិជ្ជកម្ម, ជំរុញកំណើនសេដ្ឋកិច្ច តាមរយៈការវិនិយោគបរទេស និងបង្កើតការងារ។

យោងតាមក្រសួងទេសចរណ៍ វិស័យទេសចរណ៍កម្ពុជាបានវិលទៅរកស្ថានភាពមុនវិបត្តិជំងឺកូវីដ-១៩ ដោយនៅឆ្នាំ២០២៤ កម្ពុជាទទួលស្វាគមន៍ទេសចរអន្តរជាតិប្រមាណ ៦,៧លាននាក់ កើនឡើង ២២,៩% ធៀបនឹងឆ្នាំ២០២៣ និង កើនឡើង១,៤% ធៀបនឹងឆ្នាំ២០១៩។ ភ្ញៀវទេសចរបរទេសមកលេងកម្ពុជាច្រើនជាងគេរួមាន ភ្ញៀវទេសចរថៃ វៀតណាម ចិន ឡាវ និងអាមេរិក។

ដោយឡែកក្នុងវិស័យដឹកជញ្ជូនតាមផ្លូវអាកាស(អាកាសចរណ៍) ទើបតែងើបវិញជាលំដាប់បានប្រមាណជាង ៦៨% (២០២៤) តែប៉ុណ្ណោះ បើធៀបទៅនឹងស្ថានភាពមុនវិបត្តិជំងឺកូវីដ-១៩ (២០១៩)៕

តារាងពេលវេលា និងទិសដៅខាងក្រោម៖