ព័ត៌មានជាតិ

កម្ពុជា-អារ៉ាប៊ីសាអូឌីតចាប់ដៃគ្នាពង្រីកការដោះដូរពាណិជ្ជកម្ម និងវិនិយោគ

បានផុស

៣ សប្តាហ៍ មុន

នៅ

ថ្ងៃសុក្រ ៧ កុម្ភៈ ២០២៥

ដោយ

ក្រសួងពាណិជ្ជកម្មរបស់កម្ពុជា និងអាជ្ញាធរទទួលបន្ទុកពាណិជ្ជកម្មអន្តរជាតិនៃព្រះរាជាណាចក្រអារ៉ាប៊ីសាអូឌីតបានចុះហត្ថលេខាលើអនុស្សរណៈនៃការយោគយល់គ្នា (MOU) ស្តីពីការជំរុញទំនាក់ទំនងពាណិជ្ជកម្មរវាងកម្ពុជានិងអារ៉ាប៊ីសាអូឌីត ជាពិសេសពង្រីកការនាំចេញនូវផលិតនានារបស់កម្ពុជាទៅបណ្តាប្រទេសនានានៅតំបន់នោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះ MOU នេះត្រូវធ្វើឡើងកាលពីថ្ងៃទី៦ ខែកុម្ភៈ រវាងលោកស្រី ចម និម្មល រដ្ឋមន្ដ្រីក្រសួងពាណិជ្ជកម្មកម្ពុជា និង លោកម៉ាជីត ប៊ីន អាប់ឌុលឡា អាល់កាសាប៊ី (Majid bin Abdullah Al-Kassabi) រដ្ឋមន្ត្រីក្រសួងពាណិជ្ជកម្ម និងជាប្រធានអាជ្ញាធរទទួលបន្ទុកពាណិជ្ជកម្មអន្តរជាតិនៃព្រះរាជាណាចក្រអារ៉ាប៊ីសាអូឌីត ក្នុងឱកាសបំពេញទស្សនកិច្ចផ្លូវការរបស់លោកស្រីទៅកាន់ព្រះរាជាណាចក្រអារ៉ាប៊ីសាអូឌីត។

បើយោងតាមក្រសួងពាណិជ្ជកម្ម ៖«អនុស្សរណៈនៃការយោគយល់គ្នានេះ ត្រូវបានបង្កើតឡើងក្នុងគោលបំណងពង្រឹង និងជំរុញការធ្វើពិពិធកម្មកិច្ចសហប្រតិបត្តិការពាណិជ្ជកម្ម ព្រមទាំងដើម្បីសម្រួល និងស្វែងរកកាលានុវត្តភាពថ្មីៗក្នុងការធ្វើពាណិជ្ជកម្មរវាងប្រទេសទាំងពីរ»។

កាលពីថ្ងៃពុធ ទី៥ ខែកុម្ភៈ ឆ្នាំ២០២៥ នៅទីក្រុងរីយ៉ាដ ដដែលលោកស្រីចម និម្មល រដ្ឋមន្ដ្រីក្រសួងពាណិជ្ជកម្ម ក៏បាន ជួបពិភាក្សាការងារទ្វេភាគីជាមួយលោកបណ្ឌិត Hisham bin Saad Aljadhey នាយកប្រតិបត្តិនៃអាជ្ញាធរចំណីអាហារ និងឱសថរបស់អារ៉ាប៊ីសាអូឌីត (Saudi Food and Drug Authority) ក្នុងឱកាសបំពេញទស្សនកិច្ចផ្លូវការនៅព្រះរាជាណាចក្រអារ៉ាប៊ីសាអូឌីត។ ហើយភាគីទាំងពីរបានពិភាក្សាពីការពង្រឹងកិច្ចសហប្រតិបត្តិការលើវិស័យសុវត្ថិភាព និងស្តង់ដារម្ហូបអាហារ ឱសថ និងរបស់ប្រើប្រាស់។

លោកស្រីរដ្ឋមន្រ្តី ក៏បានលើកទឹកចិត្តភាគីអារ៉ាប៊ីសាអូឌីត ឱ្យពិចារណាលើការវិនិយោគកែឆ្នៃផលិតផលហាឡាល់ សម្រាប់ការនាំចេញ។

កាលពីឆ្នាំ២០២៤ កម្ពុជា-អារ៉ាប៊ីសាអូឌីត បានបញ្ចប់ការចរចាស្តីពីសេចក្តីព្រាងអនុស្សារណៈនៃការយោគយល់គ្នាស្តីពីការជំរុញទំនាក់ទំនងពាណិជ្ជកម្មរវាងប្រទេសទាំងពីរ។

ក្រុមហ៊ុន វ័នរ៉ូដ គ្រុប កាលពីថ្ងៃទី១២ ខែមករាឆ្នាំ២០២៤ បានធ្វើការនាំចេញអង្ករកម្ពុជាជាផ្លូវការទៅកាន់ទីផ្សារប្រទេសអេមីរ៉ាតអារ៉ាប់រួម ដោយធ្វើការដឹកជញ្ជូនលើកទី១ ចំនួន ៥០០ តោន ហើយប្រទេសអេមីរ៉ាតអារ៉ាប់រួម ធ្វើការបញ្ជាទិញក្នុងកម្រិតចំនួន ៦០០០០ តោន ស្មើនឹង ៥៤ លានដុល្លារអាមេរិក។

ក្នុងពិធីនាំចេញនោះ លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានវាយតម្លៃខ្ពស់ ចំពោះក្រុមហ៊ុន វ័នរ៉ូដ គ្រុប ដែលបានទទួលជោគជ័យក្នុងការបញ្ជាទិញ និងនាំចេញអង្ករកម្ពុជាទៅកាន់ទីផ្សារប្រទេសអេមីរ៉ាតអារ៉ាប់រួមនេះ។

លោកស្រីរដ្ឋមន្ត្រី បានលើកឡើងថា ការនាំចេញអង្ករនាពេលនេះ មិនត្រឹមតែជាការធ្វើពាណិជ្ជកម្មប៉ុណ្ណោះទេ ថែមទាំងជាការជំរុញកិច្ចសហប្រតិបត្តិការមិត្តភាពដ៏ល្អរវាងប្រទេសកម្ពុជា ប្រទេសអេមីរ៉ាតអារ៉ាប់រួម និងប្រទេសចិន ដែលមានក្រុមហ៊ុន វ័នរ៉ូដ គ្រុប ជាតំណាងផងដែរ។ លើសពីនេះការនាំចេញនេះនឹងបើកទីផ្សារថ្មីសម្រាប់កិច្ចសហប្រតិបត្តិការពាណិជ្ជកម្ម និងវិនិយោគ ហើយនឹងផ្តល់ឱកាសថ្មីៗ ក្នុងការពង្រឹងកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ វប្បធម៌ និងវិស័យផ្សេងៗ ជាច្រើនបន្ថែមទៀត។

កាលពីពីថ្ងៃទី ៨-១៤ ខែធ្នូ ក្នុងដំណើរទស្សនផ្លូវការរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលបានដឹកនាំគណៈប្រតិភូកម្ពុជាធ្វើដំណើរទៅកាន់ប្រទេសចំនួន ៤ នៅតំបន់មជ្ឈឹមបូព៌ា និងអ៊ឺរ៉ុប ដែលរួមមាន ប្រទេសអារ៉ាប៊ីសាអូឌីត កាតា តួកគី និងប្រទេសអេមីរ៉ាតអារ៉ាប់រួមនោះ សម្តេចតេជោក៏បានស្នើដល់ប្រទេសអារ៉ាប់ប៊ីសាអូឌីតជួយទិញអង្ករកម្ពុជា និងលើកទឹកចិត្តដល់វិនិយោគិនានាពីបណ្តាប្រទេសទាំងនោះមកបណ្តាក់ទុនលើវិស័យកែច្នៃផលិតផលស្រូវ និងឃ្លាំងស្តុកស្រូវដើម្បីនាំចេញទៅកាន់បណ្តាប្រទេសនានានៅក្នុងតំបន់នោះ៕