ទីផ្សារខ្យងប័រនៅតែមានតម្រូវការខ្ពស់​ ខណៈតម្លៃធ្លាក់ចុះបន្ដិច

ម្ចាស់កសិដ្ឋាន ៤០០ លោក ហាច ឆន បានប្រាប់ឱ្យដឹងថា សម្រាប់ឆ្នាំ២០២៥នេះ ទីផ្សារខ្យងប័រនៅតែមានតម្រូវការខ្ពស់ ខណៈតម្លៃលក់ចេញវិញ ហាក់មានការធ្លាក់ថ្លៃបន្ដិច។

លោក ហាច ឆន អាយុ៤៦ឆ្នាំ ជាម្ចាស់កសិដ្ឋាន ៤០០ ស្ថិតនៅភូមិអូរណា ឃុំស្រែខ្ទុម ស្រុកកែវសីមា ខេត្តមណ្ឌលគិរី បានប្រាប់ កម្ពុជាថ្មី ថា សម្រាប់ឆ្នាំ២០២៥នេះ ការចិញ្ចឹមខ្យងប័ររបស់លោក​នៅកសិដ្ឋានផ្ទាល់ហាក់មានតម្រូវការទីផ្សារខ្ពស់ គ្រាន់តែតម្លៃវិញមានការធ្លាក់ចុះជាងឆ្នាំមុនបន្ដិច។

លោក បន្តថា មូលហេតុនៃការធ្លាក់នៃតម្លៃខ្យងប័រនេះ ដោយសារតែលោកផ្ទាល់ជាអ្នកកំណត់តម្លៃលក់ចេញដោយខ្លួនតែម្ដង។ ជាក់ស្ដែង ខ្យងប័របច្ចុប្បន្នលក់ចេញបានត្រឹមតែ ១៥ដុល្លារ ក្នុងមួយគីឡូ ចំណែកតម្លៃកាលពីមុនគឺ១គីឡូ លក់បានក្នុងតម្លៃ ៣០ដុល្លារ។

ម្ចាស់កសិដ្ឋានរូបនេះ បានប្រាប់ឱ្យដឹងទៀតថា ចំពោះការចិញ្ចឹមខ្យងប័រ នៅកសិដ្ឋាន៤០០ របស់លោក ឆ្នាំនេះ ក៏មិនខុសគ្នាអ្វីពីឆ្នាំមុនៗដែរ ពោលក្នុងមួយខែ កសិដ្ឋានអាចផ្គត់ផ្គង់ខ្យងប័រ ទៅកាន់ទីផ្សារបានប្រមាណជាង២តោន។

លោក ហាច ឆន បានបញ្ជាក់ទៀតថា ទីផ្សារខ្យងប័រ បច្ចុប្បន្នអាចនាំចេញទៅលក់បានស្ទើររតែគ្រប់ខេត្តក្រុងក្នុងប្រទេសកម្ពុជា  ពិសេសនៅតាមភោគជនីយដ្ឋាន និងសណ្ឋាគារធំៗ ដែលតែងតែកម្មុងទិញសម្រាប់ធ្វើម្ហូបបម្រើជូនភ្លៀវទេសចរជាតិ និងអន្ដរជាតិ ផងដែរ។

គួរជម្រាបថា កសិដ្ឋាន ៤០០ មានទីតាំងស្ថិតនៅ ស្រុកកែវសីមា ខេត្តមណ្ឌលគិរី បច្ចុប្បន្ន កសិដ្ឋានខ្នាតធំមួយនេះ បានជួយដល់ការអភិវឌ្ឃលើវិស័យកសិកម្ម និងវារីប្បកម្ម តាមរយៈការចិញ្ចឹមខ្យងប័រ ខ្យងធុរេន និងប្រភេទត្រីផ្សេងៗទៀត សម្រាប់ផ្គត់ផ្គង់ទីផ្សារក្នុងស្រុកឱ្យកាន់តែសម្បូរបែប៕

អត្ថបទ ៖ សួស សិត