ព័ត៌មានអន្ដរជាតិ

ថៃជំរុញជាថ្មី លើការបង្កើនការនាំចូលពីអាមេរិក ដើម្បីបញ្ចៀសពន្ធរបស់ ត្រាំ

បានផុស

២ ខែ មុន

នៅ

ថ្ងៃចន្ទ ១០ កុម្ភៈ ២០២៥

ដោយ

រដ្ឋមន្ត្រីក្រសួងហិរញ្ញវត្ថុថៃ លោក Pichai Chunhavajira បាននិយាយនៅថ្ងៃចន្ទថា រដ្ឋាភិបាលថៃគាំទ្រដល់ការបង្កើនការនាំចូលទំនិញចាំបាច់ពីសហរដ្ឋអាមេរិក ដើម្បីកាត់បន្ថយអតិរេកពាណិជ្ជកម្មជាមួយប្រទេសនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pichai បានប្រាប់អ្នកយកព័ត៌មានថា អាជ្ញាធរក៏នឹងពិភាក្សាជាមួយអ្នកជំនួញអាមេរិកក្នុងប្រទេសថៃផងដែរ ដើម្បីស្វែងរកមធ្យោបាយបន្ធូរបន្ថយផលប៉ះពាល់នៃគោលនយោបាយពាណិជ្ជកម្មរបស់ប្រធានាធិបតីអាមេរិក លោក ដូណាល់ ត្រាំ ដែលគំរាមគំហែងដាក់ពន្ធ ១០ ភាគរយ លើទំនិញពីគ្រប់ប្រទេសទាំងអស់ ដែលមានអតិរេកពាណិជ្ជកម្មជាមួយអាមេរិក។

លោកថ្លែងយ៉ាងដូច្នេះថា៖ «នេះនឹងជួយបង្កើតការយល់ដឹងជាមួយសហរដ្ឋអាមេរិកថា ការនាំចេញរបស់ថៃភាគច្រើន គឺជាការវិនិយោគដោយក្រុមហ៊ុនអាមេរិកដែលមានមូលដ្ឋាននៅក្នុងប្រទេសថៃ»។

យោងតាមក្រសួងពាណិជ្ជកម្មថៃ ប្រទេសនេះមានអតិរេកពាណិជ្ជកម្មជាមួយអាមេរិកប្រមាណ ៣៥,៤ ប៊ីលានដុល្លារ កាលពីឆ្នាំ ២០២៤។ សហរដ្ឋអាមេរិក គឺជាទីផ្សារនាំចេញដ៏ធំបំផុតរបស់ថៃ ដោយរួមចំណែកប្រមាណ ១៨,៣ ភាគរយ ឬ ៥៤,៩៦ ប៊ីលានដុល្លារ នៃការនាំចេញសរុប។ ក្រសួងពាណិជ្ជកម្មបានលើកឡើងផងដែរពីភាពមិនច្បាស់លាស់លើគោលនយោបាយពាណិជ្ជកម្មរបស់សហរដ្ឋអាមេរិក ថាជាបញ្ហាប្រឈមក្នុងការបង្កើនការនាំចេញរបស់ថៃ។

ក្នុងជំហានដើម្បីកាត់បន្ថយហានិភ័យ មន្ត្រីរដ្ឋាភិបាលម្នាក់បាននិយាយកាលពីសប្តាហ៍មុនថា ថៃគ្រោងនឹងបង្កើនការនាំចូលអាតានពីអាមេរិកយ៉ាងហោចណាស់ ១ លានតោន ដោយចាប់ផ្ដើមពីត្រីមាសទី ២ ដើម្បីព្យាយាមកាត់បន្ថយអតិរេកពាណិជ្ជកម្ម។

គួរគូសរំឭកថា លោក ត្រាំ បានបញ្ជាឱ្យភ្នាក់ងារសហព័ន្ធអាមេរិកបញ្ចប់ការត្រួតពិនិត្យឡើងវិញលើបញ្ហាពាណិជ្ជកម្មគ្រប់ជ្រុងជ្រោងរបស់ប្រទេសត្រឹមថ្ងៃ ១ មេសា រួមទាំងការវិភាគអំពីឱនភាពពាណិជ្ជកម្មរបស់សហរដ្ឋអាមេរិក។ លោកបានប្រកាសដាក់ពន្ធ ២៥ ភាគរយ លើកាណាដា និងម៉ិកស៊ិក និង ១០ ភាគរយ បន្ថែមពីលើពន្ធចាស់ សម្រាប់ទំនិញចូលពីចិន។ យ៉ាងណាមិញ ពន្ធលើកាណាដា និងម៉ិកស៊ិក ត្រូវពន្យារពេល ៣០ ថ្ងៃសិន ក្រោយមានការចរចាគ្នា ខណៈលោកគំរាមសហភាពអឺរ៉ុបថាជាគោលដៅបន្ទាប់៕