ព័ត៌មានអន្ដរជាតិ

កសិករថៃផ្តុំគ្នាមុខក្រសួងពាណិជ្ជកម្ម ដោយត្អូញត្អែរអំពីតម្លៃស្រូវធ្លាក់ចុះ

បានផុស

២ ខែ មុន

នៅ

ថ្ងៃអង្គារ ១១ កុម្ភៈ ២០២៥

ដោយ

ក្រុមកសិករថៃប្រមាណ ៦០ នាក់ បានប្រមូលផ្ដុំគ្នាមុខក្រសួងពាណិជ្ជកម្មថៃកាលពីថ្ងៃចន្ទ ដោយត្អូញត្អែរអំពីការធ្លាក់ចុះនៃតម្លៃស្រូវ ដោយទាមទារឱ្យរដ្ឋាភិបាលចេញវិធានការដោះស្រាយជាបន្ទាន់ ដើម្បីកុំឱ្យកសិករខាតបង់កាន់តែច្រើនថែមទៀត ចំពេលដែលតម្លៃផលិតកម្មកើនឡើង។ នេះបើតាមការចុះផ្សាយរបស់កាសែតក្នុងស្រុក ThaiPBS។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងក្រុមកសិករថៃ លោក Kampol Chuasawat មកពីស្រុកបាងសៃ ខេត្តព្រះណាខនស្រីអាយុធ្យា បានដឹកនាំក្រុមកសិករប្រមាណ៦០នាក់ធ្វើដំណើរទៅកាន់ក្រសួងពាណិជ្ជកម្ម ដើម្បីតវ៉ាដាក់ញត្តិឱ្យក្រសួងជួយដោះស្រាយបញ្ហាតម្លៃស្រូវធ្លាក់ចុះ ដែលបណ្តាលឱ្យប្រជាកសិករជួបការលំបាក។

លោក Kampol បាននិយាយថា បច្ចុប្បន្នរដ្ឋាភិបាលហាក់មិនមានវិធានការជួយច្បាស់លាស់ដល់ប្រជាកសិករនោះទេ ដោយពួកគេព្រួយបារម្ភថា តម្លៃស្រូវនឹងបន្តធ្លាក់ចុះថែមទៀត ព្រោះពេលនេះជិតដល់រដូវប្រមូលផលស្រូវប្រាំងទៀតហើយ ដែលមានការប្រមូលផលច្រើននៅខែមីនាខាងមុខ។

ប្រជាកសិករស្នើឱ្យរដ្ឋាភិបាលមានវិធានការជួយជាបន្ទាន់ ក្នុងការជួយជំរុញឱ្យតម្លៃស្រូវឡើងខ្ពស់ ដើម្បីឱ្យប្រជាកសិករអាចមានប្រាក់ចំណេញក្រោយពីការទូទាត់ថ្លៃដើម ពោលគឺយ៉ាងហោចណាស់ឱ្យបានតម្លៃ ៨ ០០០ បាត/តោន។ បច្ចុប្បន្ន តម្លៃស្រូវដែលប្រមូលផលថ្មីៗមានសំណើម ២៥ ភាគរយ លក់បានត្រឹមតែ ៦ ០០០-៧ ០០០ បាត/តោន ប៉ុណ្ណេះ ខណៈតម្លៃផលិតកម្មក្នុង ១ រ៉ៃ (១៦០០ ម៉ែត្រការេ) មានរហូតដល់ ៥ ៥០០-៦ ០០០ បាត/តោន។

អ្នកតំណាងកសិករលើកឡើងថា ពេលនេះតម្លៃផលិតកម្មបានកើនឡើងខ្ពស់ជាបន្តបន្ទាប់ ទាំងតម្លៃជី ថ្នាំសម្លាប់សត្វល្អិត និងថ្លៃឈ្នួលដីស្រែ។ លើសពីនេះ ទិន្នផលស្រូវក្នុង ១ រ៉ៃ ក៏មិនខ្ពស់ដែរ ដែលធ្វើឱ្យប៉ះពាល់ដល់ប្រាក់ចំណូលរបស់កសិករ។ បើតម្លៃស្រូវនៅតែបន្តធ្លាក់ចុះ នោះកសិករនឹងជួបវិបត្តិនៃការខាតបង់។

មន្រ្តីក្រសួងពាណិជ្ជកម្មថៃបានទទួលយកលិខិតសំណើររបស់ក្រុមកសិករថៃ ហើយប្ដេជ្ញាធ្វើការជាមួយភាគីពាក់ព័ន្ធដើម្បីដោះស្រាយបញ្ហានេះ ឱ្យបានឆាប់តាមតែអាចធ្វើទៅបាន។

បើតាមនាយកដ្ឋានពាណិជ្ជកម្មផ្ទៃរបស់ក្រសួង ថៃអាចប្រមូលផលស្រូវបាន ៧ លានតោននៅរដូវប្រាំងឆ្នាំ ២០២៥ ហើយ ១០ ភាគរយ ក្នុងនោះ បានលក់ចេញទៅទីផ្សាររួចហើយ។ គិតត្រឹមថ្ងៃទី ៧ ខែកុម្ភៈ សមាគមរោងម៉ាស៊ីនកិនស្រូវថៃ រាយការណ៍ថា តម្លៃស្រូវមានសំណើម ១៥ ភាគរយ ត្រូវបានលក់ចន្លោះពី ៨ ០០០ – ៩ ១០០ បាត/តោន ខណៈតម្លៃស្រូវសើម ២៥ ភាគរយ លក់នៅចន្លោះ ៦ ៨០០-៧ ៩០០ បាត/តោន។

កន្លងមក អ្នកជំនាញលើកឡើងថា ការធ្លាក់ចុះនៃតម្លៃស្រូវនៅតាមបណ្ដាប្រទេសផលិតស្រូវសំខាន់របស់អាស៊ីអាគ្នេយ៍ រួមមានថៃ និងវៀតណាម បណ្ដាលមកពីការធ្លាក់ចុះនៃតម្រូវការអង្កររបស់ប្រទេសនាំចូល ។ តួយ៉ាង ប្រទេសឥណ្ឌូណេស៊ីបានប្រកាសបញ្ឈប់ការនាំចូលអង្ករនៅឆ្នាំ ២០២៥ ដោយពឹងផ្អែកលើស្ដុកក្នុងស្រុករបស់ខ្លួនវិញ។

មួយវិញទៀត តម្លៃអង្ករបានធ្លាក់ចុះ កើតឡើងចំពេលការផ្គត់ផ្គង់មានកាន់តែច្រើន ជាពិសេសបន្ទាប់ពេលឥណ្ឌាលុប ចោលការរឹតត្បឹតលើការនាំចេញអង្កររបស់ខ្លួន ខណៈការរឹតត្បឹតរបស់ឥណ្ឌាដែលចាប់ផ្ដើមនៅខែកក្កដា ឆ្នាំ ២០២៣ បានជួយជំរុញតម្រូវការ និងតម្លៃអង្ករពីអាស៊ីអាគ្នេយ៍ ក្នុងរយៈពេលប៉ុន្មានឆ្នាំចុងក្រោយ។ ទីផ្សារអង្ករក៏រំពឹងថានឹងជនលិចដោយការផ្គត់ផ្គង់ច្រើនផងដែរនៅឆ្នាំនេះ នៅពេលប្រទេសជាច្រើនបង្កើនផលិតកម្មរបស់ខ្លួន រួមទាំងនៅអាមេរិកខាងត្បូង ដែលអាចធ្វើឱ្យតម្លៃអង្ករបន្តធ្លាក់ចុះបន្ថែមទៀត៕