សេដ្ឋកិច្ច

សមាគមបង្កងតាកែវគ្រោងបង្កើតផ្សារលក់បង្កងផ្ដាច់មុខ នៅអង្គតាសោម ជៀសវាងបង្កងនាំចូល

បានផុស

៤០ វិនាទី មុន

នៅ

ថ្ងៃអង្គារ ១១ កុម្ភៈ ២០២៥

ដោយ

ប្រធានសមាគមបង្កងខេត្តតាកែវ លោក ស៉ាប់ សារុន បានបង្ហើបប្រាប់ «កម្ពុជាថ្មី» ឱ្យដឹង នៅថ្ងៃទី១១ ខែកុម្ភៈ ឆ្នាំ២០២៥ នេះថា ដើម្បីលុបបំបាត់លើបញ្ហាទីផ្សារបង្កង សមាគមគ្រោងបង្កើតផ្សារលក់បង្កងផ្ដាច់មុខមួយ នៅអង្គតាសោម ស្រុកត្រាំកក់ ខេត្តតាកែវ ដើម្បីរក្សាកេរ្តិ៍ឈ្មោះបង្កងរបស់ខេត្ត និងជៀសវាងបង្កងនាំចូលរួចលួចថាជាបង្កងរបស់ខេត្តតាកែវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកសារុន បានលើកឡើងថា ៖«បញ្ហាបង្កងនាំចូលនៅតែមានជាបន្តបន្ទាប់ ហើយយើងក៏មិនអាចហាមឃាត់បានដែរ ព្រោះអាជីវករត្រូវការបង្កងលក់ ហើយយើងខាងសមាគមមិនមានបង្កងគ្រប់គ្រាន់ដើម្បីផ្គត់ផ្គង់បាន ដូច្នេះហើយយើងមិនអាចអាកាត់តម្រូវការទីផ្សារបានទេ»។

លោក បានគូសបញ្ជាក់ថា ជុំវិញបញ្ហានេះអភិបាលរងខេត្តតាកែវ ជំរុញឱ្យសមាគមបង្កើតជាផ្សារផ្តាច់មុខមួយ ដើម្បីលក់បង្កង នៅអង្គតាសោម ដោយដាក់លក់តែបង្កងធម្មជាតិរបស់ខេត្តតាកែវ។ មួយវិញទៀត ដើម្បីបង្កភាពងាយស្រួលដល់ប្រជាពលរដ្ឋទាំងក្នុងខេត្ត និងបណ្តាខេត្តនានា ក្នុងការរកទិញបង្កងរបស់ខេត្តតាកែវ ព្រោះសមគមក៏មានជាស្លាកសញ្ញា និងឡូហ្គោផ្សេងៗរួចជាស្រេចហើយដែលចេញការទទួលស្គាល់ពីក្រសួង កុំឱ្យមានការភាន់ច្រឡំតទៅទៀត ព្រោះសព្វថ្ងៃ ទោះយកបង្កងមកពីណា ក៏តាកែវ។

លោកបានអះអាងថា «គម្រោងរៀបចំជាផ្សារនេះ រៀបចំឡើងដើម្បីទៅថ្ងៃខាងមុខអាចសម្គាល់ផ្ដាច់មុខថា ជាទំនិញរបស់ខ្មែរ ជៀសវាងយករបស់គេមក ក៏ថាជារបស់ខ្មែរ ដែលធ្វើឱ្យប៉ះពាល់ដល់បង្កងធម្មជាតិរបស់តាកែវ ព្រោះបច្ចុប្បន្នមិនដឹងថាអ្វីជាអ្វី ទីផ្សារបង្កងមានភាពច្របូកច្របល់គ្នាពេញហ្នឹង បង្កងនាំចូល ក៏ថាជាបង្កងតាកែវ»។

យ៉ាងណាមិញ ជុំវិញគម្រោងនេះ លោក ក៏បានឱ្យដឹងដែរថា គឺនៅមិនទាន់អាចសម្រេច ឬលេចចេញជារូបរាងនៅពេលណានៅឡើយទេ ប៉ុន្តែវាគ្រាន់តែជាគម្រោងដើម្បីរក្សាទីផ្សារបង្កងតាកែវឱ្យបានល្អប្រសើរ ព្រោះការបង្កើតផ្សារលក់នេះខាងសមាគមនៅមានការកង្វះខាតដើមទុនច្រើនដើម្បីអាចឱ្យគម្រោងនេះសម្រេចបាន ព្រោះទីផ្សារបង្កងទាមទារឱ្យមានដើមទុនច្រើន។

លោក ស៉ាប់ សារុន បានអះអាងថា មកដល់ពេលបច្ចុប្បន្ននេះ បង្កងខាងក្រោមនៅតែមានការនាំចូលជាបន្តបន្ទាប់ ព្រោះបង្កងតាកែវ មិនទាន់អាចវាយលុកលើទីផ្សារធំៗតាមខេត្ត ឬតាមហាងធំៗបានទេ មានត្រឹមផ្គត់ផ្គង់សម្រាប់ពលរដ្ឋនៅក្នុងស្រុកប៉ុណ្ណោះ។ ជាក់ស្តែង សព្វថ្ងៃបង្កងចិញ្ចឹមបែបធម្មជាតិរបស់ខេត្តតាកែវ ក៏នៅមិនទាន់ធំធាត់អាចចាប់លក់បានដើម្បីផ្គត់ផ្គង់លើទីផ្សារនៅឡើយទេ ដោយបង្កងអាចនឹងលក់បានចាប់ពីខែមីនា និងខែមេសា ខាងមុខនេះ៕