តម្លៃមាសបំបែកកំណត់ត្រាខ្ពស់បំផុត មិនធ្លាប់មាននៅទីផ្សារកម្ពុជា

មាសបានបង្កើនតម្លៃខ្លួនបន្ថែមទៀត ចាប់តាំងពីដើមឆ្នាំ ២០២៥ ដោយសារភាពមិន​ច្បាស់​លាស់​ក្នុងការផ្លាស់ប្ដូរថ្នាក់ដឹកនាំរដ្ឋាភិបាលសហរដ្ឋអាមេរិក និងការដាក់សម្ពាធ​ពន្ធ​របស់​​លោក ដូណាល់ ត្រាំ ទៅលើបណ្ដាប្រទេសមួយចំនួន។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities ប្រាប់​​កម្ពុជាថ្មីនៅថ្ងៃទី ១១ ខែកុម្ភៈ ឆ្នាំ ២០២៥ នេះថា គិតចាប់ពីដើមឆ្នាំ ២០២៥ តម្លៃ​មាស​បានកើនឡើងបន្តបន្ទាប់ ពោលគឺនៅដើមឆ្នាំ​តម្លៃមាស​ត្រឹម​តែជាង ៣ ២០០ ដុល្លារក្នុងមួយតម្លឹង ប៉ុន្តែបច្ចុប្បន្នតម្លៃ ៣ ៥៤២ ដុល្លារ ក្នុងមួយតម្លឹង។

លោក ឡុង សំណាងថ្លែងថា៖ «តាមការវិភាគ ខ្ញុំមានគោលដៅ ៣ សម្រាប់ឆ្នាំ ២០២៥ ទី១ គឺ ៣ ៥០០ ដុល្លារ ក្នុងមួយតម្លឹង ឥឡូវវាឡើងមកប៉ះហើយ គោលដៅទី២ របស់ខ្ញុំគឺវានឹងឡើងទៅដល់ ៣ ៧០០ ទៅ ៤ ០០០ ដុល្លារ ក្នុងមួយតម្លឹង ហើយកត្តាដែលខ្ញុំមើលឃើញតម្លៃមាសឡើងគឺពាក់ព័ន្ធនឹងសង្គ្រាមពាណិជ្ជកម្មនេះតែម្ដង ជាពិសេសគឺការដាក់ពន្ធរបស់លោក ដូណាល់ ត្រាំ ពេលដែលគាត់ដាក់ពន្ធ វាធ្វើឱ្យតម្លៃផលិតផលដែលនាំចូលឡើងថ្លៃ ធ្វើឱ្យរូបិយបណ្ណធ្លាក់ចុះ នាំឱ្យមានអតិផរណា ពេលហ្នឹងលុយដុល្លារថោក ដែលរុញច្រានឱ្យតម្លៃមាសកើនឡើង»។

បើតាមលោក ឡុង សំណាង ប្រសិនបើសហរដ្ឋអាមេរិក មិនទាន់មានលំនឹងសេដ្ឋកិច្ចក្នុងការដឹក​នាំ​ពិភពលោក ឬពាណិជ្ជកម្មរវាងប្រទេស នឹងប្រទេស តម្លៃហាងឆេងមាសអាចនឹងកើនឡើងដល់ជាង ៤ ០០០ ដុល្លារ ក្នុងមួយតម្លឹង។

អាជីវករលក់មាសនៅផ្សារធំថ្មី ប្រាប់ថា ហាងឆេងមាសហក់ឡើងខ្ពស់ សកម្មភាពទិញ-លក់ស្ងប់ស្ងាត់ ដោយសារទំនុកចិត្តអតិថិជន។ យោងតាមអាជីវករ ការកើនឡើងឆាប់រហ័សនេះ ដោយសារទីផ្សារអន្តរជាតិ។

តម្លៃហាងឆេងមាសនៅថ្ងៃទី ១១ ខែកុម្ភៈ ឆ្នាំ ២០២៥ មានតម្លៃ ២ ៩៤០ ដុល្លារ ក្នុងមួយអោន នៅលើទីផ្សារអន្តរជាតិ ឬស្មើនឹង ៣ ៥៤២ ដុល្លារ ក្នុងមួយតម្លឹងនៅក្នុងប្រទេសកម្ពុជា។ សម្រាប់ហាងឆេងតាមបណ្ដាហាងនានានៅរាជធានីភ្នពេញ លក់ចេញក្នុងតម្លៃ ៣៥១ ដុល្លារ ក្នុងមួយជី៕

អត្ថបទ៖ ឡេង ដេត