ព័ត៌មានអន្ដរជាតិ

ឥណ្ឌូណេស៊ីជំរុញការប្រើប្រាស់ថាមពលកកើតឡើងវិញ ក្នុងផែនការថ្មី

បានផុស

១ ខែ មុន

នៅ

ថ្ងៃពុធ ១២ កុម្ភៈ ២០២៥

ដោយ

អនុរដ្ឋមន្ត្រីឥណ្ឌូណេស៊ីមួយរូប បានឱ្យដឹងនាថ្ងៃអង្គារនេះថា ប្រទេសឥណ្ឌូណេស៊ីមានបំណងបង្កើនចំណែកនៃថាមពលកកើតឡើងវិញ ក្រោមផែនការផ្គត់ផ្គង់អគ្គិសនីថ្មីរបស់ខ្លួនក្នុងរយៈពេល ១០ ឆ្នាំខាងមុខ ដែលជំរុញដោយថាមពលពន្លឺព្រះអាទិត្យ ថាមពលវារីអគ្គិសនី និងកំដៅក្នុងផែនដី។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការថ្មី ឈ្មោះ RUPTL នឹងជំនួសផែនការចាស់ RUPTL ២០២១-២០៣០ ដែលមានគោលដៅបន្ថែមថាមពល ៤០,៦ ជីហ្គាវ៉ាត់ ទៅក្នុងប្រព័ន្ធផ្គត់ផ្គង់ ដោយ ៥២ ភាគរយ ក្នុងនោះបានមកពីថាមពលកកើតឡើងវិញ។

អនុរដ្ឋមន្ត្រីសហគ្រាសរដ្ឋ លោក Kartika Wirjoatmodjo បាននិយាយថា រដ្ឋាភិបាលកំពុងបញ្ចប់ការពិភាក្សាអំពីផែនការអគ្គិសនីជាមួយក្រុមហ៊ុនរដ្ឋ Perusahaan Listrik Negara (PLN) ដោយផែនការថ្មី RUPTL នឹងមានគោលដៅបន្ថែមថាមពលថ្មី ៧១ ជីហ្គាវ៉ាត់ ដោយ ៧០ ភាគរយ ក្នុងនោះ គឺជាថាមពលកកើតឡើងវិញ។

លោកបានប្រាប់វេទិកាធុរកិច្ចនៅទីក្រុងហ្សាកាតាថា៖ «នេះនឹងបង្កើនការលាយបញ្ចូលគ្នានៃថាមពលកកើតឡើងវិញពីប្រហែល ១២ ភាគរយ ទៅប្រហែល ៣៥ ភាគរយ នៅឆ្នាំ ២០៣៤»។

លោកបាននិយាយថា នៅក្រោមផែនការនាពេលខាងមុខ ឥណ្ឌូណេស៊ីមានគម្រោងសាងសង់សមត្ថភាពថាមពលពន្លឺព្រះអាទិត្យ ១៧ ជីហ្គាវ៉ាត់ រួមទាំងប្រព័ន្ធស្ដុកថាមពល; ថាមពលវារីអគ្គីសនី ១៦ ជីហ្គាវ៉ាត់ និងថាមពលកំដៅក្នុងផែនដី ៥ ជីហ្គាវ៉ាត់ ក៏ដូចជាប្រភពផ្សេងទៀតដូចជាខ្យល់ និងថាមពលជីវម៉ាសជាដើម។

គួរគូសបញ្ជាក់ថា ការជំរុញការប្រើប្រាស់ថាមពលកកើតឡើងវិញរបស់ឥណ្ឌូណេស៊ី គឺជាផ្នែកមួយនៃកិច្ចប្រឹងប្រែងកាត់បន្ថយការបំភាយឧស្ម័នផ្ទះកញ្ចក់របស់រដ្ឋាភិបាល ដើម្បីសម្រេចបានគោលដៅអាកាសធាតុអព្យាក្រឹតកាបូនក្នុងឆ្នាំ ២០៦០៕