ចិនពង្រឹងការគាំទ្រដល់ SMEs ដើម្បីពង្រីកខ្លួនទៅក្រៅប្រទេស

ក្រសួងឧស្សាហកម្ម និងបច្ចេកវិទ្យាព័ត៌មានរបស់ប្រទេសចិន (MIIT) បានប្រកាសវិធានការថ្មីកាលពីដើមខែកុម្ភៈ ក្នុងការគាំទ្រដល់សហគ្រាសធុនតូច និងមធ្យម (SMEs) ដើម្បីពង្រីកខ្លួន​ជាសកល ដោយផ្តោតលើការគាំទ្រគោលនយោបាយ លទ្ធភាពទទួលបានទីផ្សារ ការអភិវឌ្ឍន៍ធនធានមនុស្ស និងការលើកកម្ពស់ការគ្រប់គ្រងជាដើម​។ នេះបើតា​មការចុះ​ផ្សាយ​របស់បណ្ដាញទូរទស្សន៍ CGTN។ ​

ក្នុងយុទ្ធសាស្រ្តពង្រឹង​ MIIT បានជំរុញ​ធនាគារឱ្យ​ផ្តល់ហិរញ្ញប្បទានឆ្លង​ដែនស្របតាមតម្រូវការសម្រាប់សហគ្រាសធុនតូច និងមធ្យម ពង្រឹងការគាំទ្រពីក្រៅប្រទេស និងបង្កើនការគ្រប់គ្រងហានិភ័យហិរញ្ញវត្ថុ ដើម្បីទទួលបានមូលដ្ឋានសម្រាប់ការពង្រីកខ្លួនជា​សកលរបស់ពួកគេ។​

កម្មវិធី «ពង្រីកសហគ្រាសសកលឆ្នាំ ២០២៥» ដែល​ដាក់ចេញដោយ​ដោយ​ MIIT និងមជ្ឈមណ្ឌលសម្រាប់កិច្ចសហប្រតិបត្តិការសេដ្ឋកិច្ច និងបច្ចេកវិទ្យាអន្តរជាតិរបស់ក្រសួងដដែល ត្រូវ​បានប្រកាសឡើង​កាលពីសប្ដាហ៍មុន ដោយថាវានឹងជួយសម្រួលដល់កិច្ចសហប្រតិបត្តិការអន្តរជាតិ និងជួយក្រុមហ៊ុនផលិតកម្មធ្វើសមាហរណកម្មទៅក្នុងខ្សែចង្វាក់ផ្គត់ផ្គង់ពិភពលោក។ ព្រឹត្តិការណ៍តភ្ជាប់បណ្ដាញដែលផ្តោតលើឧស្សាហកម្មជាបន្តបន្ទាប់ នឹងធ្វើឡើងនៅ​រុស្ស៊ី អាស៊ីកណ្តាល អាស៊ាន ជប៉ុន និងកូរ៉េខាងត្បូង ចាប់ពីខែកុម្ភៈដល់ខែមេសាឆ្នាំនេះ ដោយលើកកម្ពស់ការចូលរួមដោយផ្ទាល់ជាមួយរដ្ឋាភិបាលក្នុងតំបន់ និងអង្គការអាជីវកម្ម។

កម្មវិធីដដែល ​នឹងគាំទ្រដល់សហគ្រាសធុនតូច និងមធ្យមតាមរយៈការសហការជាមួយរដ្ឋាភិបាល ឧស្សាហកម្ម បណ្ឌិត្យសភា និងស្ថាប័នស្រាវជ្រាវ ព្រមទាំងផ្តល់ធនធានគយ ភស្តុភារ និងសេវាសាធារណៈ។ ​

គួរគូស​បញ្ជាក់ថា ក្នុងឆ្នាំ ២០២៤ ​ចិនបានចុះហត្ថលេខាលើកិច្ចព្រមព្រៀងសហប្រតិបត្តិការចំនួន ២៨ ជាមួយប្រទេស និងតំបន់ចំនួន ២៤ រួមទាំងអាស៊ាន អាល្លឺម៉ង់ អ៊ីតាលី និងប្រេស៊ីល ដែលជំរុញការអភិវឌ្ឍ​ឧស្សាហកម្ម ក៏ដូចជាបច្ចេកវិទ្យាព័ត៌មាន និងទំនាក់ទំនង និងកិច្ចសហប្រតិបត្តិការ SME ៕