ព័ត៌មានជាតិ

សហគមន៍ទុរេនបែកអន្លូងរំពឹងផលិតទុរេនបានបន្លោះពី ២ ពាន់ ទៅ ២ ពាន់ ៥ រយ តោន ផ្គត់ផ្គង់លើទីផ្សារនៅឆ្នាំនេះ

បានផុស

៤ សប្តាហ៍ មុន

នៅ

ថ្ងៃពុធ ១២ កុម្ភៈ ២០២៥

ដោយ

ប្រធានសហគមន៍ទុរេនបែកអន្លូង ស្រុកស្ទឹងត្រង់ ខេត្តកំពង់ចាម រំពឹងថា ប្រសិនបើមិនមានផលរំខានអ្វីកើតឡើងទេ រដូវកាលប្រមូលផលទុរេនឆ្នាំ២០២៥ នេះ សហគមន៍នឹងអាចផលិត និងប្រមូលផលទុរេនបានសរុបចន្លោះពី ២ ពាន់ ទៅ ២ ពាន់ ៥ រយ តោន ដើម្បីផ្គត់ផ្គង់តម្រូវការលើទីផ្សារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង ឆេងលី ប្រធានសហគមន៍ទុរេនបែកអន្លូង ស្រុកស្ទឹងត្រង់ ខេត្តកំពង់ចាម បានឱ្យ «កម្ពុជាថ្មី» ដឹងថា ឆ្នាំ២០២៥ នេះ សហគមន៍មានការដាំដុះទុរេនជាង ៥ ម៉ឺនដើម ដែលក្នុងនោះចំនួនដើមដែលអាចប្រមូលផលបានជាង ២ ម៉ឺន ៥ ពាន់ដើម។

ជាកស្តែង «ប្រសិនបើទុរេនអំណោយផលបានល្អ និងមិនរងការរំខាននានា សម្រាប់រដូវកាលប្រមូលផល នៅពាក់កណ្ដាលខែមិថុនា និងកក្កដា ឆ្នាំ២០២៥ នេះ សហគមន៍រំពឹងថានឹងអាចផលិតទុរេនបានទិន្នផលសរុបចន្លោះពី ២ ពាន់ ទៅ ២ ពាន់ ៥ រយ តោន ដើម្បីផ្គត់ផ្គង់ទៅតាមតម្រូវការទីផ្សារទាំងក្នុងស្រុករាជធានីភ្នំពេញ និងតាមបណ្តាខេត្តមួយចំនួន។

លោកថា៖« បច្ចុប្បន្នសម្រាប់ផ្ទៃដីដាំដុះទុរេនរបស់សហគមន៍នៅក្នុងដំណាក់កាលទី១ នេះមានផ្ទៃដីដាំដុះសរុបប្រមាណ ៤៥២ ហិតា ដែលចំនួននេះនឹងមានការកើនឡើងបន្តទៀតនៅរដូវកាលថ្មី ព្រោះយើងរំពឹងថានឹងទទួលសមាជិកថ្មីបន្ថែមលើពី ១០០នាក់។ ការរំពឹងបែបនេះ ដោយយើងមើលឃើញថា កសិករដែលមានទុនស្រាប់ និងទុនដែលទទួលបានពីការប្រមូលផលក្នុងឆ្នាំនេះនឹងពង្រីកផ្ទៃដីដាំដុះបន្ថែមទៀតនៅរដូវកាលក្រោយ។ ជាក់ស្តែង កសិករនៅក្នុងសហគមន៍សម្រាប់រដូវកាលថ្មីនេះ ក៏បានដាំកូនទុរេនបន្ថែម ប្រមាណជាង ១ ម៉ឺនដើមទៀតផងដែរ លើដើមចាស់ដែលអាចប្រមូលផល បាន»។

ពាក់ព័ន្ធនឹងការចរចារបស់កម្ពុជាក្នុងការនាំចេញទីផ្សារប្រទេសចិន ប្រធានសហគមន៍រូបនេះ បានលើកឡើងថា ប្រសិនបើដំណើរការនេះអាចសម្រេចបានលឿន នោះអាចថាជាសញ្ញាល្អដំបូងមួយសម្រាប់កម្ពុជានៅក្នុងការនាំចេញ ស្របពេលដែលប្រទេសជិតខាងកំពុងមានបញ្ហាលើការនាំចេញទៅកាន់ទីផ្សារចិននេះ។

មួយវិញទៀត ជុំវិញបញ្ហាគុណភាព លោកសង្កេតឃើញថា ការផលិតទុរេនរបស់កម្ពុជាយើងនៅថ្មីថ្មោង ហើយកន្លងមកក៏ធ្វើតាមបែបបុរាណ ដោយឡែកប្រទេសជិតខាង ការវិវត្តន៍នៃការប្រើប្រាស់ធាតុចូល មានភាពល្អប្រសើរជាងកម្ពុជា ដូច្នេះការប៉ះពាល់ ក៏ដូចជាសំណល់ពីក្នុងដី និងតាមផ្លែទុរេនតែងតែមានកាលណាប្រើយូរឆ្នាំ តែសម្រាប់កម្ពុជាទើបតែចាប់ផ្តើម ដូច្នេះកម្រិតស្តង់ដារនៅទាបជាងប្រទេសជិតខាងច្រើន។

ជុំវិញដំណើរការចរចានាំចេញទៅចិននេះ លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា បច្ចុប្បន្នក្រសួងបាននិងកំពុងនៅរង់ចាំកិច្ចព្រមព្រៀង SPS នៅឡើយ ខណៈដំណើរការនៃការចរចាត្រូវការពេលបន្ថែមទៀតរវាងភាគីកម្ពុជា-ចិន។

នៅឆមាសទី១ ឆ្នាំ ២០២៤ កម្ពុជានាំចេញផ្លែទុរេនចំនួនជាង ៧ ពាន់តោន កើនឡើង ១៣ ៩៦២% បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែ ៥០ តោន។ នេះបើតាមក្រសួងកសិកម្ម។

គួរបញ្ជាក់ថា ប្រទេសចិន បានរឹតត្បិតទៅលើការនាំចូលទុរេនពីប្រទេសថៃ និងវៀតណាម ដោយទាមទារឱ្យមានការធ្វើតេស្តសុវត្ថិភាពរកសារធាតុគីមីជាមុនសិន។ ក្រោយចិនប្រកាសនេះ បានធ្វើឱ្យតម្លៃទុរេននាំចេញពីចម្ការនៅតំបន់ដីសណ្តទន្លេមេគង្គរបស់ប្រទេសវៀតណាម បានធ្លាក់ចុះពី ៦0-៧០ ភាគរយ មកនៅត្រឹម ៤៧ ០០០ ដុង (១,៨៦ ដុល្លារ)/គីឡូក្រាម៕