ព័ត៌មានអន្ដរជាតិ

ការទិញឧបករណ៍ផលិតបន្ទះឈីបរបស់ចិន រំពឹងធ្លាក់ចុះឆ្នាំនេះ

បានផុស

៤ សប្តាហ៍ មុន

នៅ

ថ្ងៃពុធ ១២ កុម្ភៈ ២០២៥

ដោយ

ក្រុមហ៊ុនស្រាវជ្រាវបន្ទះឈីបកាណាដា TechInsights បានឱ្យដឹងនៅថ្ងៃពុធនេះថា ការទិញឧបករណ៍ផលិតបន្ទះឈីបរបស់ប្រទេសចិន រំពឹងថានឹងធ្លាក់ចុះនៅឆ្នាំនេះ បន្ទាប់ពីកើនឡើងរយៈពេល៣ឆ្នាំ នៅពេលឧស្សាហកម្មឈីបចិនកើនឡើងលើសលុប និងប្រឈមមុខកាន់តែខ្លាំងពីការរឹតត្បឹតរបស់សហរដ្ឋអាមេរិក។ នេះបើតាមការចុះផ្សាយរបស់ ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

TechInsights និយាយថា ចិនគឺជាអ្នកទិញឧបករណ៍ផលិតបន្ទះឈីបដ៏ធំបំផុតរបស់ពិភពលោក យ៉ាងហោចណាស់ក្នុងរយៈពេល ២ ឆ្នាំចុងក្រោយ ដោយក្នុងឆ្នាំ ២០២៤ ចិនបានទិញសរុបជាទឹកប្រាក់ប្រមាណ ៤១ ប៊ីលានដុល្លារ ឬស្មើនឹង ៤០ ភាគរយ នៃការលក់ទូទាំងពិភពលោក។

ប៉ុន្តែនៅឆ្នាំ ២០២៥ ការចំណាយរបស់ចិនរំពឹងថានឹងធ្លាក់ចុះមកនៅត្រឹម ៣៨ ប៊ីលានដុល្លារអាមេរិក ធ្លាក់ចុះ ៦ ភាគរយ ខណៈចំណែកនៃការទិញទូទាំងពិភពលោកនឹងធ្លាក់ចុះមកត្រឹម ២០ ភាគរយ ដែលវាជាការធ្លាក់ចុះជាលើកដំបូងចាប់តាំងពីឆ្នាំ ២០២១។ នេះបើតាមការអះអាងរបស់លោក Boris Metodiev ដែលជាអ្នកវិភាគការផលិតបន្ទះឈីបជាន់ខ្ពស់របស់ក្រុមហ៊ុន TechInsights ក្នុងសិក្ខាសាលាអនឡាញមួយ។

លោកបានបន្តថា៖ «យើងអាចមើលឃើញការធ្លាក់ចុះខ្លះនៃការចំណាយរបស់ចិន ដោយសារតែការរឹតត្បឹតការនាំចេញ (របស់សហរដ្ឋអាមេរិក) និងការលើសចំណុះ»។

គួរបញ្ជាក់ថា ចិនគឺជាអ្នកជំរុញកំណើនទូទាំងពិភពលោកសម្រាប់វិស័យឧបករណ៍ផលិតបន្ទះឈីបសកលនៅឆ្នាំ ២០២៣ និង ២០២៤ នៅពេលទីផ្សារឈីបសកលជួបប្រទះនឹងការធ្លាក់ចុះ ដោយសារតែការធ្លាក់ចុះនៃតម្រូវការអេឡិចត្រូនិករបស់អតិថិជន។

ការទិញជាច្រើនរបស់ចិន ធ្វើឡើងដើម្បីស្ដុកទុក ខណៈសហរដ្ឋអាមេរិកបានអនុម័តការរឹតត្បឹតជាបន្តបន្ទាប់ក្នុងគោលបំណងរារាំងចិន មិនឱ្យចូលប្រើប្រាស់បច្ចេកវិទ្យាទំនើបៗរបស់លោកខាងលិច ដើម្បីអនុវត្តកម្មវិធីយោធារបស់ខ្លួន ដែលអាចគំរាមកំហែងល់សន្តិសុខជាតិអាមេរិក។