ព័ត៌មានអន្ដរជាតិ

វៀតណាមត្រូវការថវិកាជាង ២០ ប៊ីលានដុល្លារ សម្រាប់គម្រោងរោងចក្រថាមពលនុយក្លេអ៊ែរ

បានផុស

១ ខែ មុន

នៅ

ថ្ងៃពុធ ១២ កុម្ភៈ ២០២៥

ដោយ

យោងតាមការគណនារបស់ក្រសួងឧស្សាហកម្ម និងពាណិជ្ជកម្មវៀតណាម គម្រោងសាងសង់រោងចក្រថាមពលនុយក្លេអ៊ែរខេត្ត Ninh Thuan របស់វៀតណាម នឹងត្រូវការការវិនិយោគយ៉ាងហោចណាស់ ២២ ប៊ីលានដុល្លារ។ នេះបើតាមការចុះផ្សាយរបស់កាសែត The Investor កាលពីថ្ងៃអង្គារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងនិយាយថា ក្រោមសេចក្ដីព្រាងផែនការថ្មីរបស់ខ្លួន តម្លៃវិនិយោគសម្រាប់ថាមពលនុយក្លេអ៊ែរ គឺ៥ ៥០០ ដុល្លារ/គីឡូវ៉ាត់។ យោងតាមផែនការដើម ដែលព្រាងក្នុងឆ្នាំ ២០០៩ សមត្ថភាពសរុបរបស់រោងចក្រថាមពលនុយក្លេអ៊ែរ Ninh Thuan 1 និង Ninh Thuan 2 គឺមានប្រមាណ ៤ ០០០ មេហ្គាវ៉ាត់។ ជាលទ្ធផល ការវិនិយោគរោងចក្រថាមពលនុយក្លេអ៊ែរទាំង២ អាចឈានដល់ ២២ ប៊ីលានដុល្លារ។ តួលេខនេះគឺខ្ពស់ជាងការប៉ាន់ប្រមាណក្នុងគម្រោងដើម ចន្លោះពី ១០,៨-១២,២ ប៊ីលានដុល្លារ ក្នុងសេណារីយ៉ូផ្សេងៗគ្នា។

ក្រសួងពាណិជ្ជកម្ម កំពុងរៀបចំសេណារីយ៉ូដែលតម្រូវការថាមពលនុយក្លេអ៊ែរវៀតណាម អាចមានចាប់ពី ៤ ៨០០-៩ ៨០០ មេហ្គាវ៉ាត់ ដោយសារតែការចំណាយខ្ពស់សម្រាប់ថាមពលកកើតឡើងវិញ និងឥន្ធនៈ។ ក្រសួងក៏បានលើកឡើងផងដែរថា ប្រសិនបើការចំណាយលើការវិនិយោគធ្លាក់ចុះ ថាមពលនុយក្លេអ៊ែរអាចនឹងមានប្រើក្នុងប្រទេសវៀតណាមលឿនជាងគោលដៅគ្រោងទុកត្រឹមឆ្នាំ ២០៣១-២០៣៥។

គួរបញ្ជាក់ថា វៀតណាមបង្កើតគម្រោងសាងសង់រោងចក្រថាមពលនុយក្លេអ៊ែរអគ្គិសនី ដើម្បីធានាសន្តិសុខថាមពលជាតិ និងដើម្បីជាផ្នែកមួយនៃការសម្រេចបាននូវគោលដៅអាកាសធាតុរបស់ខ្លួនតាមរយៈការកាត់បន្ថយកាបូនពីវិស័យថាមពល។

ថ្មីៗនេះ នាយករដ្ឋមន្ត្រីវៀតណាម លោក ផាម មិញ ឈិញ បានស្នើឱ្យក្រសួងសម្របសម្រួលជាមួយស្ថាប័នពាក់ព័ន្ធ ក៏ដូចជាដៃគូបរទេស ដើម្បីសម្រេចបញ្ចប់ការសាងសង់រោងចក្រថាមពលនុយក្លេអ៊ែរត្រឹមចុងឆ្នាំ ២០៣០ ឬយូរបំផុតត្រឹមចុងឆ្នាំ ២០៣១៕