លោកស្រី ឆាយ ស៊ីវលីន លើកឡើងហេតុផលមួយចំនួន ធ្វើឱ្យមានកំណើនភ្ញៀវទេសចរមកកម្ពុជា

លំហូរភ្ញៀវទេសចរអន្តរជាតិមកកម្ពុជា នៅក្នុងឆ្នាំ ២០២៤ និងដើមឆ្នាំ ២០២៥ បានកើនឡើង​ជាបន្ត​បន្ទាប់​ ដោយសារសុខសន្តិភាព និងការកសាងហេដ្ឋារចនាសម្ព័ន្ធផ្សេងៗ។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា មានប្រសាសន៍នៅថ្ងៃទី ១០ ខែកុម្ភៈ ឆ្នាំ ២០២៥ថា៖ «យើងឃើញថា តាំងពីឆ្នាំ ២០២៤ ក៏ដូចជាដើមឆ្នាំ ២០២៥ លំហូរភ្ញៀវទេសចរគឺចូលជាលំដាប់ ការកើនឡើងទាំងអស់នេះ មានកត្តាជាច្រើន ដូចជាសុខសន្តិភាព កន្លែងណាមានសុខសន្តិភាព មានស្ថិរភាពនយោបាយ ទើបភ្ញៀវទេសចរមានទំនុកចិត្តក្នុងការធ្វើដំណើរចូលមក»។

លោកស្រី ឆាយ ស៊ីវលីន បន្ថែមថា ការរៀបចំហេដ្ឋារចនាសម្ព័ន្ធមានផ្លូវថ្នល់ ផ្លូវល្បឿនលឿន​ទៅ​កាន់ទីតាំងតំបន់ទេសចរណ៍​ក៏ជាកត្តាទាក់ទាញភ្ញៀវទេសចណ៍ផងដែរ។

លោកស្រី ឆាយ ស៊ីវលីន បញ្ជាក់ថា ការយកចិត្តទុកដាក់ពីប្រមុខដឹកនាំរាជរដ្ឋភិបាលដែល​បានដាក់ចេញយន្តការបន្តបន្ទាប់ដើម្បីជួយទៅដល់វិស័យទេសចរណ៍ ជួយទៅដល់អាជីវកម្ម​ទេសចរណ៍​ដែលទទួល​នូវវិបត្តិតាំង​ពីកូវីដ១៩ ដើម្បីឱ្យពួកគាត់ឆាប់ងើបត្រឡប់មកវិញ ដើម្បី​ផ្គត់ផ្គង់ទៅដល់ទេសចរណ៍។

លោកស្រី ឆាយ ស៊ីវលីនបញ្ជាក់៖ «ទាល់តែមានការងើបត្រឡប់មកវិញផ្គត់​ផ្គង់សេវាកម្ម​ទេសចរណ៍​​​ទាំងអស់ហ្នឹងទើបទាក់ទាញទេសចរណ៍បាន ការផ្សព្វផ្សាយ ការខិត​ខំប្រឹងប្រែង ការចូលរួមពីវិស័យឯកជនគឺខ្លាំងក្លា ការលើកទឹកចិត្តពីរាជរដ្ឋាភិបាលដើម្បីឱ្យស្ថាប័ន​ពាក់​ព័ន្ធធ្វើការជាមួយឯកជន ដែលធ្វើឱ្យពួកយើងខិតខំប្រឹងប្រែងរត់រកគ្នា លើកទឹកចិត្តគ្នា​ដើម្បី​ធ្វើគោលនយោបាយមកដើម្បីទាក់ទាញទេសចរណ៍ អញ្ចឹងខាងរដ្ឋធ្វើគោលនយោបាយ ខាងឯកជនក៏បានផ្ដល់នូវធាតុចូល ដើម្បីផ្ដល់ជាការលើកទឹកចិត្តដល់អ្នកធ្វើដំណើរ​ចូលមក​កម្ពុជា»។

លោកស្រីបណ្ឌិត ជា សិរី ទេសាភិបាលធនាគារជាតិ នៃកម្ពុជាបានលើកឡើងថា ការអនុវត្តដោយប្រសិទ្ធភាពនូវយុទ្ធសាស្រ្តបញ្ចកោណ-ដំណាក់កាលទី១ បានជួយជំរុញសេដ្ឋកិច្ចកម្ពុជាឱ្យបន្តងើបឡើងក្នុងអត្រា ៦ ភាគរយ នៅឆ្នាំ​២០២៤​ ​ដែលគាំទ្រជាចម្បងដោយកំណើនខ្ពស់នៃការនាំចេញ ជាពិសេសផលិតផលកាត់ដេរ និងការបន្តងើបឡើងជាលំដាប់នៃវិស័យទេសចរណ៍ ទោះបីវិស័យសំណង់ និងអចលនទ្រព្យ និងកសិកម្ម បន្តមានកំណើនទាប។

យោងតាមក្រសួងទេសចរណ៍នៅក្នុងឆ្នាំ ២០២៤ កម្ពុជារកចំណូលពីទេសចរណ៍​អន្តរ​ជាតិ​​សរុបជាង ៣,៦៣ ពាន់លានដុល្លារ កើនឡើងជាង ១៧% ធៀបនឹងឆ្នាំ ២០២៣។

នៅក្នុងឆ្នាំ២០២៤ កម្ពុជា​បានស្វាគមន៍ភ្ញៀវទេសចរណ៍​អន្តរជាតិ​ជាង ៦,៧ លាន​នាក់ ​កើន​ឡើងជិត ២៣ ភាគរយ បើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់។

ក្នុងចំណោមភ្ញៀវទេសចរជាង ៦,៧ លាន​នាក់ ទេសចរណ៍ថៃឈរនៅ​លំដាប់​លេខរៀងទី ១ មានចំនួន ២,១៤ លាននាក់ កើនជិត ១៨% វៀតណាមចំនួន ១,៣៤ លាននាក់ កើន ៣១,៥% ចិនជាង ៨៤ ម៉ឺននាក់ កើន ៥៥% ភ្ញៀវទេស​ចរឡាវចំនួនជាង ៣៣ ម៉ឺននាក់ ធ្លាក់ចុះ ១០% និងភ្ញៀវទេសចរអាមេរិកជាង ២១ ម៉ឺននាក់ កើនឡើង ១៦%៕

អត្ថបទ៖ ឡេង ដេត