រដ្ឋបាលខេត្ត​មណ្ឌលគិរី ទទួលស្គាល់​មាន​លំហូរជនជាតិចិន​សម្រុក​ចុះមកខេត្តមណ្ឌលគិរី

អាជ្ញាធរខេត្តមណ្ឌលគិរីបានលើកឡើងពីកំណើនជនជាតិចិនចុះមកខេត្តមណ្ឌលគិរីនៅរយៈប៉ុន្មានខែចុងក្រោយនេះ ដែលនាំឲ្យ​មាន​ការកើនឡើងតម្រូវការផ្ទះជួលយ៉ាងគំហុក។

ឆ្លើយតបការសាកសួររបស់ក្រុមអ្នកសារព័ត៌មានពីវត្តមានជនជាតិ​ចិន ក្នុង​ដំណើរ​ចុះបេសកកម្មទ្រង់ទ្រាយធំទៅកាន់ខេត្តមណ្ឌលគិរី ដើម្បីផ្សព្វផ្សាយព័ត៌មានទ្រង់ទ្រាយធំពីឧស្សាហកម្មរ៉ែ និងកសិឧស្សាហកម្មទេសចរណ៍ លោក ងិន សុវិមាន អភិបាលរងខេត្តមណ្ឌលគិរីទទួលស្គាល់​ថា ពិតជាលំហូរជនជាតិចិនយ៉ាងគំហុក​​បាន​ធ្វើ​ដំណើរ​មក​​កាន់​ខេត្ត​មណ្ឌលគិរី​នៅ​មួយរយៈចុងក្រោយនេះ ដោយនាំ​ឲ្យ​មាន​តម្រូវការផ្ទះជួល​ ខណៈ​នៅ​តាមរីសតក៏​មានការកើនឡើង​ការ​កក់ជួល​ស្នាក់នៅ​ពី​ជនជាតិ​ចិន។

ពាក់ព័ន្ធ​វត្តមាន​ជនជាតិចិន លោក ងិន សុវិមាន ​បាន​គូស​បញ្ជាក់ថា លោកក៏​មិនទាន់អាច​វាយតម្លៃវត្តមាន​​​ជនជាតិចិន​ដែល​ចុះ​មក​ខេត្ត​មណ្ឌលគិរី​យ៉ាង​គំហុក​នៅពេលនេះ ​ក្នុង​រូបភាព​ឬ​ក្នុង​គោលដៅ​​ជាក់លាក់​ណាមួយ​​នៅឡើយទេ។

ទោះបី​យ៉ាងណាក៏ដោយ បើ​តាម​លោក ងិន សុវិមាន​ ការ​មកដល់​របស់​ជនជាតិចិនមកខេត្តមណ្ឌលគិរី​យ៉ាង​គំហុក​នៅ​ប៉ុន្មានខែចុងក្រោយ​ ដែលទាញ​ការ​ចាប់អារម្មណ៍​ពីមជ្ឍដ្ឋាន​ប្រជាពលរដ្ឋ​ក្នុង​ខេត្ត មិនទាន់ធ្វើ​ឲ្យប៉ះពាល់​ឬ​នាំ​ឲ្យ​​ហាង​ឆេង​ដីធ្លីក្នុងខេត្តឡើង​ថ្លៃ​ ឬមានការប្រែប្រួលនោះដែរ​៕