ព័ត៌មានអន្ដរជាតិ

តម្លៃអង្ករនាំចេញវៀតណាម ធ្លាក់ចុះទាបបំផុតក្នុងរយៈពេល ៩ ឆ្នាំ

បានផុស

១ ខែ មុន

នៅ

ថ្ងៃសៅរ៍ ១៥ កុម្ភៈ ២០២៥

ដោយ

តម្លៃអង្ករបាក់ ៥ ភាគរយ របស់វៀតណាម បានធ្លាក់ប្រមាណ ៥,៩ ភាគរយ បន្ថែមទៀតរាប់តាំងពីចុងឆ្នាំ ២០២៤ មក មកនៅត្រឹម ៣៩៧ ដុល្លារ/តោន ដែលវាជាតម្លៃទាបបំផុតក្នុងរយៈពេល ៩ ឆ្នាំ។ នេះបើតាមការចុះផ្សាយរបស់កាសែត VnExpress កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តម្លៃនេះគិតត្រឹមថ្ងៃទី១២ កុម្ភៈ ធៀបនឹងអង្ករបាក់ ៥ ភាគរយ ថៃ ដែលត្រូវបាននាំចេញក្នុងតម្លៃ ៤២៥ ដុល្លារ/តោន ឥណ្ឌា ៤១៣ ដុល្លារ/តោន និងប៉ាគីស្ថាន ៤០២ ដុល្លារ/តោន។ នេះបើយោងតាមសមាគមស្បៀងអាហារវៀតណាម។

អាជីវករវៀតណាមលើកឡើងថា តម្លៃបច្ចុប្បន្នតំណាងឱ្យការធ្លាក់ចុះជាង ៤០ ភាគរយ រាប់តាំងពីអង្ករនាំចេញវៀតណាមកើនឡើងដល់ ៧០០ ដុល្លារ/តោន នៅពាក់កណ្ដាលខែសីហាឆ្នាំ ២០២៣។

អ្នកជំនាញថៃលើកឡើងថា ការធ្លាក់ចុះនៃតម្លៃអង្ករវៀតណាមគឺដោយសារតែការដកបំរាមនាំចេញអង្កររបស់ប្រទេសឥណ្ឌា ដែលធ្វើឱ្យការផ្គត់ផ្គង់អង្ករជន់លិចទីផ្សារ។ គេរំពឹងថា តម្លៃអង្ករវៀតណាមនឹងបន្តធ្លាក់ចុះទៀត នៅពេលរដូវប្រមូលផលថ្មីចូលមកដល់ ខណៈមានការរំពឹងទុកពីកំណើននៃទិន្នផលដោយសារតែអាកាសធាតុអំណោយផលឆ្នាំនេះ។

យោងតាមក្រសួងកសិកម្ម និងអភិវឌ្ឍន៍ជនបទ វៀតណាមបាននាំចេញអង្ករចំនួន ៥ សេន តោន ក្នុងតម្លៃ ៣០៨ លានដុល្លារ កាលពីខែមុន កើនឡើង ១ ភាគរយ បើគិតពីបរិមាណ ប៉ុន្តែធ្លាក់ចុះ ១០,៤ ភាគរយ បើគិតពីតម្លៃ ធៀបនឹងរយៈពេលដូចគ្នាកាលពីឆ្នាំមុន។ សមាគមស្បៀងអាហារបានព្យាករថា ការនាំចេញរបស់វៀតណាមនឹងមានចំនួន ៧,៥ លានតោន ឆ្នាំនេះ ធ្លាក់ចុះពី ៩ លានតោន ឆ្នាំំមុន៕