ព័ត៌មានអន្ដរជាតិ

ការលក់ទង់ជាតិកាណាដាហក់ឡើង ជុំវិញភាពតានតឹងជាមួយអាមេរិក

បានផុស

១ ខែ មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

ក្រុមហ៊ុនផលិតទង់ជាតិកាណាដា Flags Unlimited បានរាយការណ៍ថា ការលក់ទង់ជាតិរបស់ខ្លួនបានកើនឡើងទ្វេដងធៀបនឹងឆ្នាំមុន ចំពេលដែលភាពតានតឹងជាមួយសហរដ្ឋអាមេរិក បានជំរុញឱ្យរលកស្នេហាជាតិពុះកញ្ជ្រោលឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រកាលពីសប្ដាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កំណើននៃការលក់ស្ទុះឡើងមុនទិវាទង់ជាតិកាណាដានៅថ្ងៃទី ១៥ ខែកុម្ភៈ ដែលជាការប្រារព្ធខួបទី ៦០ ឆ្នាំ នៃទង់ជាតិបច្ចុប្បន្នរបស់ប្រទេស។ សហម្ចាស់កម្មសិទ្ធិក្រុមហ៊ុន Flags Unlimited លោក Matt Skipp បានផ្សារភ្ជាប់កំណើនទៅនឹងការគំរាមកំហែងរបស់ប្រធានាធិបតីអាមេរិក លោក ដូ ណាល់ ត្រាំ លើអធិបតេយ្យភាពរបស់កាណាដា។

លោក Skipp បានលើកឡើងថា៖ «វាគឺជាការឆ្លើយតបដោយផ្ទាល់ទៅនឹងបរិយាកាសនយោបាយ ដោយជនជាតិកាណាដាបានប្រមូលផ្តុំគ្នានៅពីក្រោយទង់ជាតិរបស់ខ្លួនជានិមិត្តរូបនៃការរួបរួមគ្នា»។

សារព័ត៌មានក្នុងស្រុក CBC បានផ្សាយថា ក្រុមហ៊ុនផលិតទង់ជាតិផ្សេងទៀត ដូចជា ក្រុមហ៊ុន Flying Colours International ក៏ឃើញពីកំណើននៃការលក់ទង់ជាតិកាណាដាផងដែរ។

គួរគូសបញ្ជាក់ថា ចំពេលដែលភាពតានតឹងកើនឡើង អ្នកនយោបាយកាណាដាបានអំពាវនាវឱ្យពលរដ្ឋខ្លួនដាក់បង្ហាញទង់ជាតិនៅចុងសប្តាហ៍មុន ដើម្បីបង្ហាញពីការរួបរួម និងមោទនភាពជាតិកាណាដា។

កន្លងមក មានសេចក្ដីរាយការណ៍ថា ប្រជាជនកាណាដាបានលុបចោលការធ្វើដំណើរកំសាន្តទៅសហរដ្ឋអាមេរិក ធ្វើពហិការចំពោះគ្រឿងស្រវឹង និងផលិតផលផ្សេងៗរបស់អាមេរិក ហើយថែមទាំងបានស្រែកហ៊ោចំអកក្នុងព្រឹត្តិការណ៍កីឡាជាច្រើន បន្ទាប់ពីលោក ត្រាំ បានប្រកាសពន្ធ ២៥ ភាគរយ លើគ្រប់មុនទំនិញ និង ១០ ភាគរយ លើប្រេងកាត របស់កាណាដា នៅថ្ងៃទី៣ កុម្ភៈ ប៉ុន្តែក្រោយមកប្រកាសពន្យារពេល ៣០ ថ្ងៃចិន។

ក្រៅពីនេះ ក៏មានសេចក្ដីរាយការណ៍ផងដែរថា លោកនាយករដ្ឋមន្ត្រីកាណាដា ចាស្ទីន ទ្រូដូ បានប្រាប់មេដឹកនាំអាជីវកម្មក្នុងស្រុក ថាលោក ត្រាំ «ពិតជានិយាយមែន» ជុំវិញការចង់ឱ្យកាណាដាក្លាយជារដ្ឋទី ៥១ របស់សហរដ្ឋអាមេរិក ដោយសារតែកាណាដាមានធនធានធម្មជាតិដ៏សម្បូរបែប៕