ព័ត៌មានអន្ដរជាតិ

ឡាវគ្រោងសង់រោងចក្រថាមពលខ្យល់ ១,៩ ប៊ីលានដុល្លារ ដើម្បីនាំចេញអគ្គិសនីទៅវៀតណាម

បានផុស

៣ សប្តាហ៍ មុន

នៅ

ថ្ងៃចន្ទ ១៧ កុម្ភៈ ២០២៥

ដោយ

រដ្ឋាភិបាលឡាវ និងក្រុមហ៊ុនសំណង់ Chichareune Construction នឹងរួមគ្នាសាងសង់រោងចក្រថាមពលដើរដោយកម្លាំងខ្យល់ ដែលមានសមត្ថភាពផលិតអគ្គិសនី ១ ២០០ មេហ្គាវ៉ាត់ ក្រោមការវិនិយោគតម្លៃ ១,៩ ប៊ីលានដុល្លារ ដើម្បីនាំចេញអគ្គិសនីទៅវៀតណាម។ នេះបើតាមការចុះផ្សាយរបស់កាសែត The Investor កាលពីចុងសប្ដាហ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាគីទាំង២ បានចុះកិច្ចព្រមព្រៀងសាងសង់កាលពីថ្ងៃព្រហស្បតិ៍សប្ដាហ៍មុន។ គម្រោងដែលមានទីតាំងនៅស្រុក Nong នៃខេត្ត Savannakhet របស់ឡាវ មួយនេះ បច្ចុប្បន្នកំពុងតែសិក្សាស្ដីពីលទ្ធភាពនៃការសាងសង់ ដោយឆ្ពោះទៅរកការអនុម័តក្នុងត្រីមាសទី២នៃឆ្នាំ ២០២៦។

ការសាងសង់រោងចក្រដំណាក់កាលទី១ ដែលមានសមត្ថភាពផលិតអគ្គិសនី ៧០២ មេហ្គាវ៉ាត់ គ្រោងនឹងបញ្ចប់នៅចុងឆ្នាំ ២០២៧ ជាមួយនឹងទុនវិនិយោគចំនួន ១,១២ ប៊ីលានដុល្លារ ខណៈដំណាក់កាលទី ២ គ្រោងបញ្ចប់នៅក្រោយឆ្នាំ ២០៣០ ជាមួយនឹងទុនវិនិយោគចំនួន ៧៩៧ លានដុល្លារ។

គម្រោងនេះអាចនាំចេញអគ្គិសនីប្រមាណ ១,៥៣ ប៊ីលានគីឡូវ៉ាត់ ទៅកាន់ប្រទេសវៀតណាមក្នុងដំណាក់កាលទី១ និង ១,១១ ប៊ីលានគីឡូវ៉ាត់ ក្នុងដំណាក់កាលទី២។

បច្ចុប្បន្ន វៀតណាមបាននាំចូលថាមពលអគ្គិសនីចំនួន ៣ ៤៦៤ មេហ្គាវ៉ាត់ ពីឡាវ។ តួលេខនេះរំពឹងថានឹងកើនឡើងដល់ ៥ ០០០ មេហ្គាវ៉ាត់ នៅឆ្នាំ ២០៣០ ជាមួយនឹងលទ្ធភាពកើនឡើងដល់ ៨ ០០០-១០ ០០០ មេហ្គាវ៉ាត់ នៅក្រោយឆ្នាំ ២០៣០។ នេះបើយោងតាមផែនការអភិវឌ្ឍន៍ថាមពល VIII (PDP VIII) របស់ប្រទេសវៀតណាម។

យោងតាមក្រសួងឧស្សាហកម្ម និងពាណិជ្ជកម្ម បច្ចុប្បន្ន វៀតណាមនាំចូលអគ្គិសនីចំនួន ៣ ប៊ីលានគីឡូវ៉ាត់ម៉ោងក្នុងមួយឆ្នាំៗពីប្រទេសចិន និងឡាវ៕