កម្ពុជានឹងនាំចេញក្រពើជាលើកទី១ ទៅ​ចិន ប្រមាណជាង១ពាន់ក្បាល ​

អនុប្រធានសហគមន៍អ្នកចិញ្ចឹមក្រពើ ស្ថិតនៅខេត្តសៀមរាប លោក គង់ ម៉ី បានប្រាប់កម្ពុជាថ្មីថា ឆ្នាំ២០២៥ នេះថា កម្ពុជានឹងនាំចេញក្រពើ ទៅកាន់ទីផ្សារប្រទេសចិន តាមច្រកព្រំដែនអន្តរជាតិវៀតណាមជាលើកទី១ ដែលមានចំនួនក្រពើប្រមាណ១១០០ក្បាល នៅថ្ងៃទី១៩ ខែកុម្ភៈ ខាងមុខនេះ។

លោក គង់ ម៉ី បានថ្លែងមកកាន់កម្ពុជាថ្មី នៅថ្ងៃទី១៧ ខែកុម្ភៈនេះថា សម្រាប់ប៉ុន្មានថ្ងៃនេះ លោកកំពុងដើរប្រមូលក្រពើតាមកសិដ្ឋានមួយចំនួនក្នុងខេត្តសៀមរាប ដែលត្រូវស្ដង់ដានាំចេញដាក់តាមកុងតឺន័រ ដែល១គ្រឿង អាចដឹកបានក្រពើចំនួន៥០០ក្បាល។

អនុប្រធានសហគមន៍អ្នកចិញ្ចឹមក្រពើ រូបនេះ បានប្រាប់ឱ្យដឹងទៀតថា ៖«ចំពោះក្រពើដែលត្រូវនាំចេញទាំងនេះ តម្លៃយ៉ាងណា ក៏លោកពុំទាន់អាចបញ្ជាក់បាននៅឡើយ ប៉ុន្តែអ្វីដែលធ្វើឱ្យលោក និងម្ចាស់កសិដ្ឋានចិញ្ចឹមក្រពើផ្សេងៗទៀត សប្បាយចិត្តនោះ គឺកម្ពុជាអាចនាំក្រពើទៅកាន់ទីផ្សារប្រទេសចិនតាមច្រកព្រំដែនអន្តរជាតិប្រទេសវៀតណាម គោរពតាមស្ដង់ដា និងស្របច្បាប់ត្រឹមត្រូវ ជាលើកទី១ ដែលនេះអាចចាត់ទុកថាជាដំណឹងល្អសម្រាប់អ្នកចិញ្ចឹមក្រពើទាំងអស់ ក្នុងប្រទេសកម្ពុជា ពិសេសគឺខេត្តសៀមរាប នេះតែម្ដង»។

សូមជម្រាបថា នេះជាលើកទី១ហើយ ដែលកម្ពុជាទទួលបានការអនុញ្ញាតនាំក្រពើរស់ចេញពីកម្ពុជាទៅកាន់ប្រទេសចិន ប៉ុន្តែកម្ពុជាត្រូវបំពេញបែបបទឱ្យស្របតាមស្តង់ដារនិងអនុសញ្ញាសាយតេសជាមុនសិន។

នៅពេលដែលនាំចេញលើកទី១ទទួលបានជោគជ័យ នោះកម្ពុជានឹងមានទីផ្សារសត្វក្រពើរស់នៅប្រទេសចិន ដែលមានវិសាលភាពធំ និងអាចផ្តល់ផលប្រយោជន៍សេដ្ឋកិច្ចដល់អ្នកចិញ្ចឹមសត្វក្រពើក្នុងប្រទេសកម្ពុជា៕

អត្ថបទ ៖​ សួស សិត