ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៣៧០ លានដុល្លារនៅក្នុងខែមករា

ទំហំពាណិជ្ជកម្មកម្ពុជា-ថៃសម្រេចបាន​ទឹកប្រាក់ជាង ៣៧០ លានដុល្លារនៅក្នុងខែមករា ឆ្នាំ ២០២៥ កើនឡើងជាង ៨ ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈរដ្ឋាភិបាលនៃប្រទេសទាំងពីរប្តេជ្ញាជម្រុញពាណិជ្ជកម្មទ្វេរភាគីឱ្យសម្រេចបានចំនួន ១៥ ពាន់លានដុល្លារនៅក្នុងរយៈពេលប៉ុន្មានឆ្នាំខាងមុខនេះ។

យោងតាមអគ្គនាយកដ្ឋានគយ និងរដ្ឋាករកម្ពុជា ​(GDCE) នៅក្នុងខែមករា ឆ្នាំ ២០២៥ កម្ពុជា​នាំទំនិញចេញ​ទៅប្រទេស​ថៃមានទំហំទឹក​ប្រាក់​ប្រមាណ ៧២ លានដុល្លារ ធ្លាក់ចុះ ៣០,៨ ភាគរយ និងថៃនាំចូលមកកម្ពុជាវិញចំនួន ២៩៧,៦៥ លានដុល្លារ កើនឡើង ២៥,៦ ភាគ​រយ។

ទិន្នន័យនេះបង្ហាញថា កម្ពុជាមានឱនភាពពាណិជ្ជកម្មជាមួយថៃ កើនឡើងដល់ជាង ២៤% ដែល​មាន​ទឹកប្រាក់ ២២៥ លានដុល្លារ។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីនៅថ្ងៃទី ១៧ ខែកុម្ភៈឆ្នាំ ២០២៥នេះថា ប្រជាជនកម្ពុជានិយមប្រើផលិតផលថៃ ដោយសារគុណភាពល្អ។ លោក​​ថា ទៅថ្ងៃអនាគត ប្រសិនបើកម្ពុជាអាចផលិតបានទំនិញផ្គត់ផ្គង់ក្នុងស្រុកគុណភាពល្អ ហើយតម្លៃប្រកួតប្រជែង នោះការនាំចូលពីប្រទេសជិតខាងនឹងអាចមានការប្រែប្រួលដែរ។

លោក ឡោ វិចិត្រលើកឡើងថា៖ «អ្នកវិនិយោគកម្ពុជាដាក់ទុនលើការវិនិយោគលើដីធ្លីច្រើន ជាជាងបើករោងចក្រ ដល់អញ្ចឹងយើងត្រូវនាំចូលទំនិញពីប្រទេសជិតខាងវិញហើយ លុះត្រាតែនិន្នា​កា​នេះយើត្រូវលើកទឹកចិត្តឱ្យមានឧស្សាហកម្មក្នុងស្រុកឱ្យកាន់តែច្រើន បានអាចកាត់បន្ថយ​ការនាំចូលពីប្រទេសជិតខាង ហើយមួយទៀតពង្រឹងស្ដង់ដា ធម្មតាប្រជា​ជន​យើង បើសិនជាតម្លៃដូចគ្នាលើទំនិញនាំចូល តែគុណភាពយើងអន់ជាងគេ អាហ្នឹងក៏គេនៅតែប្រើទំនិញនាំចូលដែរ»។

កម្ពុជានាំចេញផលិតផលកសិម្មទៅប្រទេសថៃដូចជា ដំឡូងមី ពោត ម្រេច សណ្ដែក និងស្វាយ ខណៈថៃនាំមកវិញនូវសម្ភារៈសំណង់ គ្រឿងអេឡិកត្រូនិក គ្រឿងយន្តកសិកម្ម ភេសជ្ជៈ បន្លែ ផ្លែឈើ។

យោងតាមអគ្គនាយកដ្ឋានគយ និងរដ្ឋាករកម្ពុជា នៅក្នុងឆ្នាំ ២០២៤ ពាណិជ្ជកម្មទ្វេភាគីកម្ពុជា-ថៃ សម្រេចបានជាង ៤,២៨ ពាន់លានដុល្លារ កើនឡើង ១៥,៥% ក្នុងនោះកម្ពុជានាំចេញទៅថៃបានជិត ៨៤៥ លានដុល្លារ ចំណែកថៃនាំចូលមកវិញ ៣,៤៤ ពាន់លានដុល្លារ កើន ១៨,៩ ភាគរយ៕

អត្ថបទ៖ ឡេង ដេត