ព័ត៌មានអន្ដរជាតិ

វៀតណាមកែច្បាប់ដើម្បីឱ្យ Starlink ផ្តល់អ៊ិនធឺណិតតាមផ្កាយរណប

បានផុស

១ ខែ មុន

នៅ

ថ្ងៃអង្គារ ១៨ កុម្ភៈ ២០២៥

ដោយ

វៀតណាមគ្រោងនឹងដាក់ចេញនូវច្បាប់ថ្មីអនុញ្ញាតឱ្យក្រុមហ៊ុនសេវាកម្មអ៊ិនធឺណិត Starlink របស់លោក អេឡុន ម៉ាសក៍ ផ្តល់អ៊ិនធឺណិតតាមផ្កាយរណបដល់ប្រទេស។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពពីរដ្ឋាភិបាលម្នាក់បានអះអាងថា ការកែច្បាប់នេះនឹងត្រួសត្រាយផ្លូវឱ្យក្រុមហ៊ុន Starlink បើកប្រតិបត្តិការនៅវៀតណាម និងរៀបចំឡើងក្រោយការចរចាគ្នារវាងវៀតណាម និងក្រុមហ៊ុនបច្ចេកវិទ្យាអវកាស SpaceX ដែលជាក្រុមហ៊ុនមេរបស់ Starlink ។

ការណ៍នេះបង្ហាញពីការផ្លាស់ប្ដូរយុទ្ធសាស្រ្តភ្លាមៗរបស់វៀតណាម ដើម្បីបន្ធូរបន្ថយហានិភ័យនៃគោលនយោបាយពន្ធគយរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ។ ប្រភពដែលសុំនិយាយជាអនាមិក បានលើកឡើងថា វាបង្ហាញថា វៀតណាមមានឆន្ទៈក្នុងការចូលរួមក្នុងកិច្ចសហប្រតិបត្តិការការទូត ប្រសិនបើរដ្ឋបាល ត្រាំ ចង់បាននោះ។

គួរគូសបញ្ជាក់ថា ក្រុមហ៊ុន SpaceX បានប៉ុនប៉ងដាក់ប្រតិបត្តិការរបស់ Starlink ក្នុងប្រទេសវៀតណាមដែលទីផ្សារមានប្រជាជនជិត ១០០ លាននាក់។ យ៉ាងណាមិញ ការប៉ងនេះត្រូវជាប់គាំងចាប់តាំងពីចុងឆ្នាំ ២០២៣ បន្ទាប់ពីរដ្ឋាភិបាលកុម្មុយនិស្តវៀតណាមបដិសេធមិនទម្លាក់ចោលនូវការរឹតត្បឹតលើ «សេវាកម្មអ៊ិនធឺណិតផ្កាយរណបគ្រប់គ្រងដោយបរទេស» ដែលជាលក្ខខណ្ឌសម្រាប់លោក ម៉ាសក៍ ដែលបច្ចុប្បន្នក៏ជាអ្នកប្រឹក្សាយោបល់ឱ្យលោក ត្រាំ ដ៏សំខាន់ម្នាក់ផងដែរនោះ។

សេចក្តីព្រាងច្បាប់ ដែលគ្រោងអនុម័តដោយសភានៅថ្ងៃពុធនេះ អនុញ្ញាតឱ្យមានការគ្រប់គ្រងពីបរទេសពេញលេញលើប្រតិបត្តិការក្នុងប្រទេសវៀតណាម សម្រាប់ក្រុមហ៊ុនផ្តល់សេវាអ៊ិនធឺណិតដែលមានបណ្តាញផ្កាយរណបក្នុងគន្លងតារាវិថីកម្រិតទាប ជាមួយនឹងគម្រោងសាកល្បងរហូតដល់ចុងឆ្នាំ ២០៣០។

គេមើលឃើញថា ក្រុមហ៊ុន SpaceX បាននិងកំពុងពង្រីកបណ្តាញផ្គត់ផ្គង់របស់ខ្លួននៅវៀតណាម ខណៈរដ្ឋាភិបាលវៀតណាមបានអះអាងថា ក្រុមហ៊ុនចង់ដាក់ការវិនិយោគ ១,៥ ប៊ីលានដុល្លារក្នុងប្រទេសរបស់ខ្លួន។

ប្រភពលើកឡើងថា ប្រសិនបើក្រុមហ៊ុន និងបុគ្គលវៀតណាមជាច្រើនប្រើ Starlink នោះវាអាចជួយកាត់បន្ថយអតិរេកទំនិញ និងសេវាកម្មដែលវៀតណាមមានជាមួយសហរដ្ឋអាមេរិក។ កាលពីឆ្នាំមុន អតិរេកពាណិជ្ជកម្មរបស់វៀតណាមជាមួយអាមេរិក មានប្រមាណ ១២៣,៥ ប៊ីលានដុល្លារ ដែលធ្វើឱ្យវៀតណាមរងនូវហានិភ័យពន្ធរបស់លោក ត្រាំ ដែលសន្យាកាត់បន្ថយឱនភាពពាណិញ្ជកម្មរបស់ប្រទេស៕