ព័ត៌មានអន្ដរជាតិ

ត្រាំ គ្រោងដាក់ពន្ធ ២៥ ភាគរយ លើរថយន្ត ឱសថ និងបន្ទះឈីបនាំចូល

បានផុស

២ ខែ មុន

នៅ

ថ្ងៃពុធ ១៩ កុម្ភៈ ២០២៥

ដោយ

ប្រធានាធិបតីសហរដ្ឋអាមេរិក លោក ដូណាល់ ត្រាំ បានឱ្យដឹងកាលពីថ្ងៃអង្គារថា លោកមានបំណងដាក់ពន្ធ ២៥ ភាគរយ លើរថយន្ត ឱសថ និងបន្ទះឈីប នាំចូល ក្នុងជំហានបន្ថែមការគំរាមកំហែងដល់ពាណិជ្ជកម្មសកល។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការឱ្យដឹងពីបញ្ហានេះ ធ្វើឡើងក្រោយលោកបាននិយាយកាលពីថ្ងៃសុក្រសប្ដាហ៍មុនថា ពន្ធលើរថយន្តនឹងដាក់ចេញនៅថ្ងៃទី ២ ខែមេសា ពោលគឺ១ថ្ងៃបន្ទាប់ពីគណៈរដ្ឋមន្ត្រីរបស់លោកចេញរបាយការណ៍ជូនលោកស្ដីអំពីជម្រើសពន្ធនាំចូលផ្សេងៗ។

ជាថ្មីម្ដងទៀតនៅថ្ងៃអង្គារ បន្ថែមពីលើពន្ធរថយន្ត លោក ត្រាំ បានថ្លែងថា លោកអាចនឹងចាប់ផ្ដើមដាក់ពន្ធលើឱសថ និងបន្ទះឈីបនាំចូល នៅអត្រា ២៥ ភាគរយ ឬច្រើនជាងនេះ។ យ៉ាងណាមិញ លោក ត្រាំ មិនបានផ្តល់កាលបរិច្ឆេទជាក់លាក់សម្រាប់ការប្រកាសពីពន្ធលើទំនិញទាំង២ទេ ប៉ុន្តែនិយាយថា លោកចង់ទុកពេលខ្លះឱ្យក្រុមហ៊ុនផលិតឱសថ និងបន្ទះឈីប ដាក់រោងចក្រនៅសហរដ្ឋអាមេរិក ដូច្នេះពួកគេអាចជៀសវាងវិធានការពន្ធ។

គួរគូសបញ្ជាក់ថា លោក ត្រាំ តែងតែទទូចថា សហរដ្ឋអាមេរិកគឺជាជនរងគ្រោះនៃពាណិជ្ជកម្មសកលមិនស្មើភាពគ្នា ដោយប្ដេជ្ញាកាត់បន្ថយឱនភាពពាណិជ្ជកម្មសហរដ្ឋអាមេរិក។ លោកទាមទារឱ្យប្រទេសផ្សេងៗ រួមទាំងសហភាពអឺរ៉ុប ដែលជាសម្ព័ន្ធមិត្ត បង្កើនការនាំចូលផលិតផលអាមេរិក និងក្រុមហ៊ុននានាបង្កើនការវិនិយោគរបស់ខ្លួនលើទឹកដីរបស់អាមេរិក បើមិនដូច្នោះទេ ពួកគេនឹងរងវិធានការពន្ធគយ។

រាប់ចាប់តាំងពីចូលកាន់អំណាចជិត១ខែមុន លោកបានប្រកាសពន្ធថ្មីបន្ថែម ១០ ភាគរយ លើទំនិញនាំចូលពីចិន និងបានប្រកាស ប៉ុន្តែពន្យារពេលអនុវត្ត ១ ខែ នូវពន្ធ ២៥ ភាគរយ លើទំនិញម៉ិកស៊ិក និងកាណាដា។ ក្រៅពីនេះ គេឃើញមានពន្ធផ្សេងៗទៀត រួមទាំងពន្ធ ២៥ ភាគរយ លើដែកថែប និងអាលុយមីញ៉ូមនាំចូល និងគម្រោងពន្ធឆ្លើយតបឱ្យស្មើភាពគ្នា ដែលកំណត់លើប្រទេសដាក់ពន្ធលើទំនិញអាមេរិកទាំងអស់៕