ព័ត៌មានអន្ដរជាតិ

វៀតណាមនាំចេញដូង ជាង ១ ប៊ីលានដុល្លារ ជាលើកដំបូង ឆ្នាំមុន

បានផុស

៣២ វិនាទី មុន

នៅ

ថ្ងៃពុធ ១៩ កុម្ភៈ ២០២៥

ដោយ

តម្លៃនៃការនាំចេញដូងរបស់វៀតណាម បានកើនលើសពី ១ ប៊ីលានដុល្លារ ជាលើកដំបូងកាលពីឆ្នាំមុន ដោយសារតែកិច្ចព្រមព្រៀងផ្គត់ផ្គង់ជាមួយចិន និងការខិតខំប្រឹងប្រែងរបស់ក្រុមហ៊ុននាំចេញដើម្បីពង្រីកទីផ្សាររបស់ពួកគេ។ នេះបើតាមការចុះផ្សាយរបស់កាសែត VnExpress នាពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យគយវៀតណាមបានបង្ហាញថា ការនាំចេញផលិតផលដូងទាំងអស់បានកើនឡើង ២០ ភាគរយ ដល់ជិត ១,១ ប៊ីលានដុល្លារ ខណៈផ្លែដូងស្រស់សុទ្ធ បានកើនប្រមាណ ៦១ ភាគរយ ដល់ ៣៩០ លានដុល្លារ។

បច្ចុប្បន្ន វៀតណាមមានចម្ការដូង ២០ ម៉ឺនហិកតា ដែលផលិតបានដូង ២ លានតោន/ឆ្នាំ។ ១/៣ នៃចម្ការទាំងនោះ បំពេញតាមស្តង់ដារសរីរាង្គរបស់សហរដ្ឋអាមេរិក និងអឺរ៉ុប។ ប្រទេសនេះ មានក្រុមហ៊ុនផលិត និងកែច្នៃដូងជាង ៦០០ ក្រុមហ៊ុន ក្នុងស្រុក។

បើតាម VnExpress វៀតណាមជាប់ចំណាត់ថ្នាក់ទី ៥ លើពិភពលោក ក្នុងការនាំចេញដូង។ ជាមួយគ្នានោះ ចិនរួមចំណែកលើការទិញដូងរបស់វៀតណាម ប្រមាណ ២៥ ភាគរយ ដែលកាន់តែកាន់ឡើងក្រោយប្រទេសទាំង២បានចុះកិច្ចព្រមព្រៀងគ្នា នៅខែសីហា ឆ្នាំមុន។

វៀតណាមគឺជាអ្នកផ្គត់ផ្គង់ដូងធំជាងគេទី៣ ទៅចិន ជាមួយនឹងចំណែកទីផ្សារប្រមាណ ២០ ភាគរយ។ ទីផ្សារនាំចេញធំៗផ្សេងទៀតរួមមាន សហភាពអឺរ៉ុប សហរដ្ឋអាមេរិក កាណាដា និងកូរ៉េខាងត្បូង។

យ៉ាងណាមិញ អ្នកជំនាញមើលឃើញថា ការផ្គត់ផ្គង់ទំនងជាមិនមានគ្រប់គ្រាន់ទេក្នុងប៉ុន្មានឆ្នាំខាងមុខ ដោយសារកសិករមានការស្ទាក់ស្ទើរក្នុងការពង្រីកការដាំដុះរបស់ខ្លួនក្នុងប៉ុន្មានឆ្នាំថ្មីៗនេះ។

អគ្គលេខាធិការសមាគមដូងវៀតណាម លោក Cao Ba Dang Khoa បានថ្លែងថា ការប្រកួតប្រជែងជាមួយអ្នកនាំចេញផ្សេងទៀតដូចជាថៃ ឥណ្ឌា និងបណ្តាប្រទេសនៅមជ្ឈិមបូព៌ា និងការពង្រីករោងចក្រកែច្នៃនៅក្នុងប្រទេសចិន ក៏បានបន្ថែមការលំបាកដល់ក្រុមហ៊ុនវៀតណាមផងដែរ៕