ព័ត៌មានអន្ដរជាតិ

ឥណ្ឌូណេស៊ីចង់បានអនុបាតពន្ធធៀបនឹង GDP ក្នុងកម្រិតដូចកម្ពុជា

បានផុស

២១ វិនាទី មុន

នៅ

ថ្ងៃព្រហស្បតិ៍ ២០ កុម្ភៈ ២០២៥

ដោយ

ប្អូនប្រុសបង្កើតរបស់ប្រធានាធិបតីឥណ្ឌូណេស៊ី ប្រាបូវូ ស៊ូប៊ីយានតូ លោក Hashim Djojohadikusumo បាននិយាយថា ប្រទេសឥណ្ឌូណេស៊ីចង់សម្រេចឱ្យបាននូវអនុបាតពន្ធធៀបនឹងផលិតផលក្នុងស្រុក (GDP) ក្នុងកម្រិតដូចកម្ពុជាដែរ។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាមានសេដ្ឋកិច្ចធំជាងគេនៅអាស៊ីអាគ្នេយ៍ក៏ដោយ ក៏អនុបាតចំណូលពន្ធធៀបនឹង GDP របស់ឥណ្ឌូណេស៊ី នៅមានកម្រិតទាបខ្លាំងបើធៀបនឹងប្រទេសជិតខាងអាស៊ាន។

លោក Hashim បានថ្លែងក្នុងកិច្ចប្រជុំកំពូលសេដ្ឋកិច្ចឥណ្ឌូណេស៊ីនៅទីក្រុងហ្សាការតា កាលពីថ្ងៃពុធ ថា៖ «ឥណ្ឌូណេស៊ីមានអនុបាតពន្ធទាបបំផុតមួយរបស់ពិភពលោក។ រដ្ឋាភិបាលនឹងអនុវត្តកម្មវិធីមួយចំនួនក្នុងពេលឆាប់ៗនេះ ដើម្បីបង្កើនអនុបាតចំណូលពីពន្ធ»។

លោក Hashim បានបន្តថា៖ «គោលដៅរបស់យើង គឺឈានដល់កម្រិតរបស់កម្ពុជា [ដែលមានអនុបាតពន្ធ] ១៨ ភាគរយ ខណៈរបស់យើងមានចន្លោះពី ១២,១-១២,២ ភាគរយ។ ហើយនៅទីបំផុត យើងនឹង [ឈានដល់] កម្រិតរបស់វៀតណាម ប្រហែល ២៣ ភាគរយ»។

គួរគូសបញ្ជាក់ថា យោងតាមទិន្នន័យចុងក្រោយរបស់អង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ (OECD) អនុបាតពន្ធរបស់កម្ពុជាមានត្រឹម ១៤,៧ ភាគរយ គិតត្រឹមឆ្នាំ ២០២២ ខណៈវៀតណាមមាន ១៩ ភាគរយ។

លោក Hashim ក៏បានប្រាប់វេទិការផងដែរថា លោក ប្រាបូវូ ចង់ជំរុញការប្រមូលពន្ធពី «សេដ្ឋកិច្ចស្រមោល» ដែលសំដៅលើសកម្មភាពសេដ្ឋកិច្ច ដែលមិនរាយការណ៍ទៅរដ្ឋាភិបាល ឬជាប់ការបង់ពន្ធ ដូចជាសេដ្ឋកិច្ចក្រៅផ្លូវការជាដើម៕