ព័ត៌មានអន្ដរជាតិ

TikTok នឹងវិនិយោគ ៨,៨ ប៊ីលានដុល្លារ លើមជ្ឈមណ្ឌលទិន្នន័យនៅថៃ

បានផុស

១ ខែ មុន

នៅ

ថ្ងៃសុក្រ ២៨ កុម្ភៈ ២០២៥

ដោយ

ទីភ្នាក់ងារសារព័ត៌មាន AFP បានរាយការណ៍ថា ក្រុមហ៊ុនបណ្ដាញសង្គម TikTok ដែលជាបុត្រសម្ព័ន្ធរបស់ក្រុមហ៊ុនបច្ចេកវិទ្យាអ៊ិនធឺណិតចិន ByteDance គ្រោងនឹងវិនិយោគ ៨,៨ ប៊ីលានដុល្លារ លើមជ្ឈមណ្ឌលទិន្នន័យក្នុងប្រទេសថៃ ក្នុងរយៈពេល ៥ ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អនុប្រធានគោលនយោបាយសាធារណៈរបស់ TikTok លោកស្រី Helena Lesch ដែលបានជួបជាមួយនាយករដ្ឋមន្រ្តីថៃ អ្នកស្រី ផែតងតាន ស៊ីណាវ៉ាត់ត្រា នៅក្រុងបាងកក នាថ្ងៃសុក្រនេះ បានឱ្យដឹងថា ក្រៅពីហេដ្ឋារចនាសម្ព័ន្ធឌីជីថល ការវិនិយោគក៏ផ្ដោតផងដែរលើការអភិវឌ្ឍកម្លាំងពលកម្ម និងគំនិតផ្តួចផ្តើមសុវត្ថិភាពតាមអ៊ិនធឺណិត។

គេមិនទាន់ច្បាស់លាស់នោះទេ ថាតើកញ្ចប់វិនិយោគនេះ រាប់បញ្ចូលទាំងការវិនិយោគ ៣,៨ ប៊ីលានដុល្លារ ដែលក្រុមប្រឹក្សាវិនិយោគថៃ ប្រកាសកាលពីខែមុនឬយ៉ាងណា។

យ៉ាងណាមិញ អ្នកស្រី ផែតងតាន បានបង្ហោះសារនៅលើបណ្ដាញសង្គម X ថា៖ «រដ្ឋាភិបាលមានសេចក្តីសោមនស្សរីករាយដែល TikTok បានជ្រើសរើសថៃជាដៃគូវិនិយោគយុទ្ធសាស្ត្រសម្រាប់ហេដ្ឋារចនាសម្ព័ន្ធឌីជីថល រួមទាំងគម្រោងមជ្ឈមណ្ឌលទិន្នន័យ ៣០០ ប៊ីលានបាត (៨,៨ ដុល្លារអាមេរិក)។ អ្នកស្រីបន្តថា៖ «ទាំងអស់នេះតំណាងឱ្យការបោះជំហានដ៏សំខាន់មួយ ឆ្ពោះទៅរកការបង្កើតប្រទេសថៃឱ្យក្លាយជាមជ្ឈមណ្ឌលសកលសម្រាប់ឧស្សាហកម្មឌីជីថល»។

បច្ចុប្បន្ន TikTok មានអ្នកប្រើប្រាស់ច្រើនជាង ៥០ លាននាក់ក្នុងប្រទេសថៃ និងអាជីវកម្មចំនួន ៣ លាន នៅលើវេទិកាពាណិជ្ជកម្មអេឡិចត្រូនិក TikTok Shop ។

គួរគូសបញ្ជាក់ថា ថៃបានក្លាយជាទិសដៅទាក់ទាញដ៏សំខាន់មួយនៅអាស៊ីអាគ្នេយ៍ សម្រាប់ការវិនិយោគលើហេដ្ឋារចនាសម្ព័ន្ធឌីជីថលរួមទាំងមជ្ឈមណ្ឌលទិន្នន័យ និងបញ្ញាសិប្បនិម្មិត (AI)។ កន្លងមក ក្រៅពី TikTok គេឃើញមានក្រុមហ៊ុនបច្ចេកវិទ្យាយក្សផ្សេងៗទៀត ដែលប្រកាសវិនិយោគលើវិស័យនេះនៅថៃ ដូចជាក្រុមហ៊ុនបច្ចេកវិទ្យាយក្សអាមេរិក Amazon, Google និង Microsoft ជាដើម៕