ព័ត៌មានអន្ដរជាតិ

រដ្ឋបាល ត្រាំ ចង់ដកការចំណាយរដ្ឋាភិបាលចេញពីរបាយការណ៍ GDP

បានផុស

២ ខែ មុន

នៅ

ថ្ងៃចន្ទ ៣ មីនា ២០២៥

ដោយ

រដ្ឋមន្ត្រីក្រសួងពាណិជ្ជកម្មអាមេរិក លោក Howard Lutnick បានឱ្យដឹងកាលពីថ្ងៃអាទិត្យថា ការចំណាយរបស់រដ្ឋាភិបាល អាចដកការចំណាយរបស់រដ្ឋាភិបាលចេញពីរបាយការណ៍ផលិតផលក្នុងស្រុកសរុប (GDP) ដើម្បីដោះស្រាយការព្រួយបារម្ភដែលថា ការកាត់បន្ថយការចំណាយតាមការជំរុញរបស់ក្រសួងប្រសិទ្ធភាពការងាររដ្ឋាភិបាល (DOGE) របស់លោក អេឡុន ម៉ាសក៍ អាចនាំឱ្យមានការធ្លាក់ចុះសេដ្ឋកិច្ច។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lutnick បាននិយាយនៅលើកម្មវិធី «Sunday Morning Futures» របស់ប៉ុស្តិ៍ទូរទស្សន៍ Fox News ថា៖ «អ្នកដឹងទេថា រដ្ឋាភិបាលនាពេលកន្លងមកបានធ្វើឱ្យ GDP រញ៉េរញ៉ៃជាប្រវត្តិសាស្រ្ត។ ពួកគេរាប់បញ្ចូលការចំណាយរបស់រដ្ឋាភិបាលជាផ្នែកមួយនៃ GDP។ ដូច្នេះខ្ញុំនឹងបែងចែកវាចេញ ហើយធ្វើឲ្យវាមានតម្លាភាព»។

បើតាមអ្នកជំនាញ ការធ្វើដូច្នេះអាចបង្កភាពស្មុគស្មាញ ឬបង្ខូចទ្រង់ទ្រាយវិធានការជាមូលដ្ឋាននៃសុខភាពសេដ្ឋកិច្ចរបស់សហរដ្ឋអាមេរិក។ ជាធម្មតា ការចំណាយរបស់រដ្ឋាភិបាល ត្រូវរួមបញ្ចូលនៅក្នុង GDP ដោយសារតែការប្រែប្រួលពន្ធ ការចំណាយ ឱនភាព និងបទប្បញ្ញត្តិរបស់រដ្ឋាភិបាល អាចប៉ះពាល់ដល់របៀបវារៈនៃកំណើនសេដ្ឋកិច្ចទាំងមូល។ មែនទែនទៅ របាយការណ៍ GDP រួមបញ្ចូលព័ត៌មានលម្អិតយ៉ាងទូលំទូលាយលើការចំណាយរបស់រដ្ឋាភិបាលរួចហើយ ដោយផ្តល់នូវតម្លាភាពសម្រាប់អ្នកសេដ្ឋកិច្ចក្នុងកម្រិតមួយ។

គេមើលឃើញថា កិច្ចខិតខំប្រឹងប្រែងរបស់លោក ម៉ាសក៍ ក្នុងការលុបបំបាត់ភ្នាក់ងារសហព័ន្ធផ្សេងៗរបស់អាមេរិក អាចបណ្តាលឱ្យមានការបញ្ឈប់បុគ្គលិកសហព័ន្ធរាប់ម៉ឺននាក់។ ការណ៍ នឹងធ្វើឱ្យបាត់បង់ការចំណាយរបស់ពួកគេ ដែលនឹងជះឥទ្ធិពលដល់អាជីវកម្ម និងសេដ្ឋកិច្ចទាំងមូល។

ការឱ្យដឹងរបស់លោក Lutnick នាថ្ងៃអាទិត្យ គឺជាការបន្ទរពីលោក ម៉ាសក៍ ដែលនិយាយកាលពីថ្ងៃសុក្រថា៖ «ការវាស់វែងដែលកាត់តែត្រឹមត្រូវនៃ GDP នឹងមិនរាប់បញ្ចូលការចំណាយរបស់រដ្ឋាភិបាលនោះទេ។ បើមិនដូច្នេះទេ អ្នកអាចវាស់វែង GDP ឱ្យវាខ្ពស់បែបសិប្បនិម្មិត ដោយចំណាយប្រាក់លើអ្វីៗ ដែលមិនធ្វើឱ្យជីវិតរបស់ប្រជាជនកាន់តែប្រសើរឡើង»។

លោក Lutnick បាននិយាយថារដ្ឋបាល ត្រាំ នឹងធ្វើឱ្យមានតុល្យភាពថវិកាសហព័ន្ធតាមរយៈការកាត់បន្ថយការចំណាយ ដោយនិយាយថា វានឹងជួយដល់កំណើន និងកាត់បន្ថយអត្រាការប្រាក់ដែលអ្នកប្រើប្រាស់ត្រូវបង់។

ការលើកឡើងរបស់មន្រ្តីរដ្ឋបាល ត្រាំ មានលក្ខណៈបន្ទាបតម្លៃផលប្រយោជន៍សេដ្ឋកិច្ចដែលកើតចេញពីការទូទាត់សន្តិសុខសង្គម ការចំណាយលើហេដ្ឋារចនាសម្ព័ន្ធ ការស្រាវជ្រាវវិទ្យាសាស្ត្រ និងការចំណាយក្នុងទម្រង់ផ្សេងៗទៀតរបស់រដ្ឋាភិបាល ដែលអាចកំណត់គន្លងសេដ្ឋកិច្ច។

របាយការណ៍ GDP ចុងក្រោយបំផុតរបស់ក្រសួងពាណិជ្ជកម្ម ចេញផ្សាយកាលពីថ្ងៃព្រហស្បតិ៍ បានបង្ហាញថា សេដ្ឋកិច្ចអាមេរិកបានកើនឡើងក្នុងអត្រាប្រចាំឆ្នាំ ២,៣ ភាគរយ នៅត្រីមាសចុងក្រោយ ឆ្នាំមុន។ កំណើននេះត្រូវបានជំរុញជាចម្បងដោយការចំណាយខ្ពស់របស់អ្នកប្រើប្រាស់ និងការកើនឡើងនៃការចំណាយលើវិស័យការពារជាតិ។ សម្រាប់ឆ្នាំ ២០២៤ ការចំណាយរបស់រដ្ឋាភិបាលសហព័ន្ធ បានកើនឡើង ២,៦ ភាគរយ ពោលគឺតិចជាងកំណើនសេដ្ឋកិច្ចសរុប ២,៨ ភាគរយ។

ក្នុងរបាយការណ៍ GDP ការចំណាយរបស់រដ្ឋាភិបាលមានចំនួនជិត ១/៥ នៃប្រាក់ចំណូលផ្ទាល់ខ្លួនរបស់ប្រជាជន ក្នុងទំហំសរុបប្រមាណជាង ២៤,៦ ទ្រីលានដុល្លារ កាលពីឆ្នាំមុន។ នោះរួមបញ្ចូលទាំងការបង់ប្រាក់សម្រាប់សេវាសន្តិសុខសង្គម អត្ថប្រយោជន៍សម្រាប់អតីតយុទ្ធជនយោធា ការចំណាយរបស់រដ្ឋាភិបាលផ្នែកសុខាភិបាលសម្រាប់មនុស្សចាស់ និងប្រជាជនក្រីក្រ និងកម្មវិធីផ្សេងៗទៀត។ ប៉ុន្តែរបាយការណ៍នេះ ក៏វាស់វែងចំនួនចំណូលផ្ទាល់ខ្លួនរបស់ប្រជាជន ដែលត្រូវបង់ពន្ធជូនរដ្ឋាភិបាលផងដែរ៕