រដ្ឋចាប់ដៃជាមួយឯកជន កែលម្អសុវត្ថិភាពចំណី​អាហារតាមស្ដង់ដាអន្តរជាតិ

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម នៅថ្ងៃទី ២៨ ខែកុម្ភៈ ឆ្នាំ ២០២៥ បាន​ចុះ​អនុស្សរណៈនៃការ​យោគយល់គ្នារវាងសហព័ន្ធស្វាយចន្ទីកម្ពុជា តំណាងដោយ លោក អាន តារា ប្រធានសហព័ន្ធស្វាយចន្ទីកម្ពុជា និងក្រុមហ៊ុន Control Union (Cambodia) Co., Ltd. តំណាងដោយលោក Dilum Wijenayaka ក្នុងកំឡុងពេលពិព័រណ៍ផលិតផលខ្មែរ និង​បន្លែ​ផ្លែ​ឈើ លើកទី ១៨ ឆ្នាំ២០២៥ នៅខេត្តសៀមរាប។

អនុស្សរណៈនេះ មានគោលបំណងសហការគ្នាដើម្បីកែលម្អ​សុវត្ថិភាពចំណី​អាហារ​អន្តរ​ជាតិ​ប្រព័ន្ធគ្រប់គ្រង និងវិញ្ញាបនប័ត្របន្ថែមតម្លៃសម្រាប់សមាជិកសហព័ន្ធស្វាយចន្ទីកម្ពុជា។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផល​គ្រាប់​ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើនឡើង ២១ ភាគរយ ធៀបនឹងឆ្នាំ ២០២៣ គិត​ជា​ទឹក​ប្រាក់​​ ១,១៥០ ពាន់លាន​ដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់​តោន៕