យុទ្ធនាការហូបពងទា បំផុសគំនិតប្រជាពល​រដ្ឋឱ្យជួយគាំទ្រការចិញ្ចឹមសត្វក្នុងស្រុក

យុទ្ធនាការហូបពងទា បង្កើតឡើងដើម្បីបំផុសគំនិតប្រជាពលរដ្ឋជួយគាំទ្រការចិញ្ចឹមសត្វក្នុងស្រុក និងចូលរួមចំណែកជួយកសិករខ្មែរដែលជាអ្នកចិញ្ចឹមទាយកពង ខណៈមួយរយៈពេលចុងក្រោយនេះពងទារបស់កសិករ ហាក់មិនសូវមានទីផ្សារ។

លោក ចេង ឌីណា អភិបាលនៃគណៈអភិបាលស្រុកខ្សាច់កណ្ដាល ខេត្តកណ្តាល បានប្រាប់ឱ្យ កម្ពុជាថ្មី ដឹងថា យុទ្ធនាការហូបពងទានេះ ត្រូវបានដាក់ចេញដោយលោក គួច ចំរើន អភិបាលនៃគណៈអភិបាលខេត្តកណ្ដាល ខណៈដែរមួយរយៈចុងក្រោយនេះ កសិករដែលជាអ្នកចិញ្ចឹមទាយកពង ដែលស្ថិតនៅក្នុងមូលដ្ឋានស្រុកខ្សាច់កណ្ដាល បានជួបប្រទះនូវបញ្ហាទីផ្សារពងទាមិនអាចលក់ចេញទាន់ពេលវេលា ដែលជាហេតុនាំឱ្យពងទាសល់ច្រើន។

លោកបន្តថា ឃុំដែលមានអ្នកចិញ្ចឹមទាយកពងច្រើន ក្នុងមូលដ្ឋានស្រុកខ្សាច់កណ្ដាលមានចំនួន៤ឃុំ ក្នុងនោះមាន៖  ឃុំស៊ីធរ ឃុំវិហារសួគ៌ ឃុំសន្លុង និងឃុំកំពង់ចំលង ដែលភាគច្រើនឃុំទាំងនេះគឺសម្បូរទៅដោយកសិករចិញ្ចឹមទាយកពង។

លោក ចេង ឌីណា បានឱ្យដឹងទៀតថា បន្ទាប់ពីមានការយកចិត្តទុកដាក់ពីថ្នាក់ដឹកនាំគ្រប់ជាន់ថ្នាក់ ក្នុងនោះក៏ឃើញមានសប្បុរសជនជាច្រើននាក់ទៀត បានរួមគ្នាជួយទិញពងទាពីកសិករដែលកំពុងជួបការលំបាក ដោយក្នុងពងទា១គ្រាប់ តម្លៃ៣៥០រៀល។

លោកស្រី ណេង ដាលីន មេឃុំសន្លុង បានប្រាប់ឱ្យ កម្ពុជាថ្មី ដឹងដែរថា ដោយមានការចង្អុលបង្ហាញ និងយកចិត្តទុកដាក់ ពីថ្នាក់ដឹកនាំគ្រប់ជាន់ថ្នាក់ រដ្ឋបាលឃុំសន្លុង ក៏បានជួយសម្រួលទិញពងទាពីប្រជាកសិករក្នុងមូលដ្ឋានឃុំសន្លុង ដែលកំពុងជួបបញ្ហាពងទាធ្លាក់ថ្លៃ និងដើម្បីជួយសម្រួលដោះបន្ទុករបស់កសិករបានមួយគ្រា។

លោកស្រី បន្តថា ចំពោះពងទាដែលប្រមូលទិញពីកសិករ រដ្ឋបាលឃុំសន្លុង ក៏បានយកទៅចែកជូនដល់មន្រ្តីឃុំ មេភូមិ អនុភូមិ សមាជិភូមិ ប្រជាការពារភូមិ និងបងប្អូនប្រជាពលរដ្ឋទីទាល់ក្រ ដែលរស់នៅក្នុងមូលដ្ឋានឃុំសន្លុងបានយកទៅចម្អិនធ្វើម្ហូបតាមផ្ទះរៀងៗខ្លួន ផងដែរ៕

អត្ថបទ ៖ សួស សិត