ក្រុមហ៊ុនក្នុងស្រុកមួយ​បោះទុនរាប់លានដុល្លារ​វិនិយោគលើស្ថានីយបញ្ចូលថាមពលរថយន្តអគ្គិសនីនៅទូទាំងប្រទេស

ក្រុមហ៊ុនដឹកជញ្ជូនក្នុងស្រុកឈានមុខគេមួយរបស់កម្ពុជា វីរៈ ប៊ុនថាំ គ្រោងនឹងវិនិយោគនូវទឹកប្រាប់រាប់លានដុល្លារក្នុងការសាងសង់ស្ថានីយបញ្ចូលថាមពលរថយន្តអគ្គិសនីនៅទូទាំងប្រទេសកម្ពុជានៅក្នុងឆ្នាំនេះ ដើម្បីឆ្លើយតបទៅនឹងការកើនឡើងនៃការប្រើប្រាស់រថយន្តប្រភេទនេះ។

លោក ស៊ូ វិរៈ ប្រធានអគ្គនាយកនៃក្រុមហ៊ុនដឹកទំនិញ និងអ្នកដំណើរវីរៈប៊ុនថាំ បានថ្លែងមកកាន់កម្ពុជាថ្មី នៅព្រឹកថ្ងៃទី៥ ខែមីនាថា ដោយមើលឃើញអំពីការកើនឡើងនៃការប្រើប្រាស់រថយន្តអគ្គិសនីនៅកម្ពុជា ក្រុមហ៊ុនលោកបានសម្រេចក្នុងការបោះទុនវិនិយោគទៅលើស្ថានីយសាកថ្មនេះនៅទូទាំងប្រទេសកម្ពុជា ខណៈដែលតម្លៃនៃស្ថានីយ៍និមួយៗត្រូវចំណាយទុនក្នុងរង្វង់១៦០ ០០០ ដុល្លារ។

លោកបានថ្លែងថា៖« មូលហេតុដែលយើងត្រូវសាងសង់ស្ថានីយសាកថ្ម ដោយសារតែនៅ​ប្រទេស​​​យើងមានរថយន្តច្រើនប្រភេទ ហើយយើងក៏មានរថយន្តប្រភេទអគ្គិសនីច្រើនដែរទាំង​រថយន្ត​ប្រើប្រាស់ផ្ទាល់ខ្លួន ដឹកទំនិញ និងអ្នកដំណើរ»។

លោកថា៖«នៅក្នុងឆ្នាំ២០២៥នេះ​ យើងនឹងនាំចូលរថយន្ត​អគ្គិសនី២០០គ្រឿងទៀត ដូច្នេះហើយបានជាតម្រូវការសាកថ្មរថយន្តអគ្គិសនីចាំបាច់ ហេតុដូច្នេះហើយបានមក​ទាល់ដល់ពេលនេះយើងកំពុងធ្វើការសាងសង់ស្ថានីយ៍សាកថ្មរថយន្តអគ្គិសនីបន្ថែមទៀត»។

បើយោងតាមលោក ស៊ូ វីរៈ សម្រាប់ជំហ៊ានដំបូង​ក្រុមហ៊ុននឹងចាប់ផ្តើមពីរាជធានីភ្នំពេញ ដោយក្រុមហ៊ុនកំពុងសាងសង់នៅតំបន់ជ្រោយចង្វារដោយមានកន្លែងសាក​រហូតទៅដល់១២ឡានក្នុងមួយពេល។  ជាមួយគ្នានេះដែរ ក្រុមហ៊ុនក៏កំពុងសាងសង់នៅក្បែរក្រុងពោធិសាត់នៅតាមបណ្តោយផ្លូវជាតិមានកន្លែងសាករាល់ថ្ងៃបាន៦គ្រឿង;  នៅបាត់ដំបង មាន១កន្លែងដែរ ដែលកំពុងចាប់ផ្តើមរៀបចំសាកដែលអាចសាកបាន​៦គ្រឿងម្តង។ សម្រាប់នៅខេត្តកំពង់ធំ   មានរួចហើយនៅម្តុំព្រៃប្រស់ និងនៅកំពង់សោម​ក៏កំពុងចាប់ផ្តើមសាងសង់ដែរ។ សម្រាប់គោលដៅបន្ទាប់ក្រុមហ៊ុននឹងសាងសង់ស្ថានីយ៍សាកថ្ម​​នៅខេត្ត​កំពត និងកំពង់ចាម។

លោកថា ៖«ចំពោះតាមបណ្តោយផ្លូវជាតិនានាដែលក្រុមហ៊ុនយើងរត់ខ្សែឡានទៅក៏យើងនឹងមានស្ថានីយសាកថ្មដែរ ដោយយើងមើលឃើញថាឡានយើងមិនអាចរត់ដល់ទិសដៅទាំងអស់ទេ ដោយសារឡានរត់របស់យើងជូនកាលបាន៤០០គីឡូ ៣០០គីឡូ ឬ២០០គីឡូ ដូច្នេះហើយដើម្បីបំពេញតម្រូវការទាំងរថយន្តរបស់ក្រុមហ៊ុនខ្ញុំ​ និងសាធារណជន យើងក៏សម្រេចចិត្ត​វិនិយោគទៅលើស្ថានីយសាកនេះនៅក្នុង២៥រាជធានី ខេត្ត​ក្រុង គ្រាន់តែជំហានទី១នេះគឺយើង​សាងសង់នៅតាមបណ្តារាជធានី ខេត្តដែលចាំបាច់សិន ជាពិសេសខេត្តដែលឆ្ងាយៗ និងលើផ្លូវជាតិដែលឆ្លងកាត់។ ហើយទន្ទឹមនេះដែរ រាល់ស្ថានីយដែលឆ្លងកាត់គឺយើងមិនត្រឹមតែមានស្ថានីយសាកប៉ុណ្ណោះទេ យើងក៏នឹងមានសាងសង់ភោជណីយដ្ឋាន និងហាងកាហ្វេផងដែរ»។

លោក ផន រឹម អ្នកនាំពាក្យក្រសួងសារធារណការ និងដឹកជញ្ជូន ធ្លាប់បានមានប្រសាសន៍ថា នៅក្នុងឆ្នាំ២០២៤ មានរថយន្តអគ្គិសនី(EV)ចុះបញ្ជីសរុប ២ ២៥៣គ្រឿង កើនលើសឆ្នាំ២០២៣ ចំនួន៦២០%(ឆ្នាំ២០២៣ ចំនួន​ ៣១៣គ្រឿង) ខណៈដែលត្រីចក្រយាន និងទោចក្រយាន ក៏មានការកើនឡើងផងដែរ។

ការប្រើប្រាស់យានយន្តអគ្គិសនី ត្រូវបានគេមើលឃើញថា ចំណាយប្រចាំថ្ងៃតិច, ផាសុភាព, កម្រិតបំពុលក្នុងបរិយាកាលទាបបំផុត។ ក្រុមហ៊ុនយានយន្តខ្លះបានអះអាងពីកម្រិត នៃការបំភាយឧស្ម័នពុលកម្រិតសូន្យថែមទៀត។

​ជាមួយគ្នានេះដែរ លោក ស៊ូ វីរៈ រំពឹងថា​រដ្ឋាភិបាល ជាពិសេស​អាជ្ញាធរអគ្គិសនីកម្ពុជា​នឹងធ្វើការពិចារណាក្នុងការលើកទឹកចិត្ត​ក្នុងបញ្ចុះថ្លៃត្រង់ហ្វូតម្លើងអគ្គិសនីសម្រាប់​ស្ថានីយ៍សាកថ្ម ដែលជាការលើកទឹកចិត្ត​ដល់ក្រុមហ៊ុនដែលបានវិនិយោគ។

លោកស៊ូ វីរះ​បានថ្លែងបញ្ជាក់ថា៖«បញ្ហាប្រឈមរបស់យើងនាពេលនេះ គឺតម្លៃអគ្គិសនី​យើងនៅថ្លៃ ដោយសារយើងពុំទាន់មានគោលការណ៍ពីខាងអគ្គិសនីកម្ពុជា​លើការបញ្ជុះថ្លៃ​ក្នុងការតម្លើងត្រង់ហ្វូសម្រាប់ការប្រើរថយន្តអគ្គិសនីនោះទេ យើងសង្ឃឹមថាអាជ្ញាធរអគ្គិសនី​កម្ពុជានឹងមានតម្លៃពិសេសសម្រាប់ការប្រើត្រង់ហ្វូសម្រាប់សាករថយន្តអគ្គិសនី ព្រោះរឿងនេះមិនត្រឹមតែធ្វើឱ្យ​ក្រុមហ៊ុនយើងចំណាយច្រើនប៉ុណ្ណោះទេ​ ប៉ុន្តែវាក៏ធ្វើឱ្យ​ថ្លៃសាកថ្ម​នោះថ្លៃទៅលើអ្នកប្រើប្រាស់ផងដែរ»។

ក្នុងការ​សម្រេច​ជា​ប្រទេស​អព្យាក្រឹត្យកាបូន រាជរដ្ឋាភិបាល​កម្ពុជា​ដាក់ចេញ​យុទ្ធសាស្ត្រ​រយៈ​ពេល​វែង ​​ដើម្បី​ជំរុញ​សម្រេច​ឱ្យ​បាន​នូវ​ការ​ប្រើប្រាស់​យានយន្ត​អគ្គិសនី​ក្នុង​អត្រា ៤០​% និង​ទោចក្រយាន​អគ្គិសនី​ក្នុង​អត្រា ៧០​% នៅ​ឆ្នាំ​២០៥០៕