អតីតបុគ្គលិកសណ្ឋាគារម្នាក់ ចាប់យករបរចិញ្ចឹមកង្កែប កំពុងមានទីផ្សារខ្ពស់

អតីតបុគ្គលិកសណ្ឋាគារម្នាក់ ចាប់យករបរចិញ្ចឹមកង្កែប ជាមួយនឹងបច្ចេកទេសបង្កាត់ពូជកង្កែបធម្មជាតិ នៅស្រុកកំណើតខ្លួន កំពុងទទួលបានទីផ្សារខ្ពស់។

ស្ថិតក្នុងវ័យ ៣០ឆ្នាំ លោក ផុង សុភ័ក្រត្រា ម្ចាស់កសិដ្ឋានចិញ្ចឹមកង្កែប ខេត្តសៀមរាប បានប្រាប់ កម្ពុជាថ្មីថា មុខរបរចិញ្ចឹមកង្កែបនេះ លោកបានចាប់ផ្តើមធ្វើវាឡើងមកតាំងពីឆ្នាំពី២០២០ ពោលគឺចាប់ពីពេលដែលលោកបានបោះបង់ការងារជាបុគ្គលិកសណ្ឋាគារមួយកន្លែងដែលស្ថិតនៅក្នុងក្រុងសៀមរាប។

សុភ័ក្រត្រា បានឱ្យដឹងទៀតថា បន្ទា​ប់ពីបោះបង់ការងារជាបុគ្គលិកសណ្ឋាគារ លោកបានចាប់យកការចិញ្ចឹមកង្កែបនៅជុំវិញផ្ទះរបស់ខ្លួន ដែលជំនាញ និងបច្ចេកទេសនេះ សុភ័ក្រត្រា បានចេះវាឡើងមកពីបងប្រុសបង្កើតរបស់ខ្លួន ដែលជាអ្នកចិញ្ចឹមកង្កែបស្រាប់។

មូលហេតុដែល សុភ័ក្រត្រា ចាប់យករបរចិញ្ចឹមកង្កែបនេះ ដោយសារតែរបរនេះវាមិនទាមទារដើមទុនច្រើន ពោលគឺគ្រាន់តែមានប្រាក់ត្រឹម២០០ដុល្លារ ក៏អាចចាប់ផ្ដើមរបរមួយនេះបានផងដែរ។

សុភ័ក្រត្រា បន្តថា របរចិញ្ចឹមកង្កែប ជារបរមួយដែលងាយស្រួលជាងការចិញ្ចឹមសត្វផ្សេងៗ ជាក់ស្ដែងគឺគ្រាន់តែមាន ទីធ្លា និងដីស្រែក្នុងទំហំសមរម្យមួយ ក៏អាចចាប់ផ្ដើមធ្វើវាឡើងមកបានដែរ។

ម្ចាស់កសិដ្ឋានរូបនេះ បានបង្ហើបឱ្យដឹងទៀតថា សម្រាប់ពេលបច្ចុប្បន្ននេះ កង្កែបកំពុងតែមានតម្រូវការទីផ្សារខ្ពស់ នេះក៏ដោយសារតែ នៅតាមបណ្ដាហាង ភោជនីយដ្ឋាន និងសណ្ឋាគារមួយចំនួន ក៏កំពុងតែត្រូវការកង្កែបដើម្បីយកទៅចម្អិនធ្វើម្ហូបផ្សេងៗ សម្រាប់ជូនភ្ញៀវ ឬអតិថិជន ជាប្រចាំថ្ងៃ។ ចំពោះទីផ្សារវិញ សុភ័ក្រត្រា ក៏បានបញ្ជាក់ដែរថា កង្កែបអាចលក់ចេញទៅកាន់ទីផ្សារបានចន្លោះពី ៨០០០រៀល ទៅ១០០០០រៀល ក្នុងមួយគីឡូកា្រម តាមតម្រូវការជាក់ស្ដែង។

ចំពោះ សុភ័ក្រត្រាវិញ ការចិញ្ចឹមកង្កែបក្នុងកសិដ្ឋានរបស់លោក ធ្វើការបែកចែកចេញជា២ផ្នែក ដោយកន្លែងខ្លះលោកត្រូវរៀបចំចិញ្ចឹមតាមតង់ក្បែរផ្ទះ និងកន្លែងខ្លះទៀតត្រូវចិញ្ចឹមតាមវាលស្រែក្រោយផ្ទះ។

ម្ចាស់កសិដ្ឋានរូបនេះ ក៏បានលើកទឹកចិត្តដល់កសិករដទៃទៀតឱ្យងាកមកចាប់យកការចិញ្ចឹមកង្កែប បន្ទាប់ពីការងារស្រែចម្ការ ពីព្រោះការងារនេះ មិនចាំបាច់ចំណាយដើមទុនច្រើន ឬត្រូវដើរឆ្ងាយពីផ្ទះ ពោលគឺគ្រាន់តែធ្វើវានៅផ្ទះក៏អាចរកចំណូលបានសមរម្យ ផងដែរ។

កសិដ្ឋានចិញ្ចឹមកង្កែប សៀមរាប ជាកសិដ្ឋានលក្ខណៈគ្រួសារមួយ ដែលមានទីតាំងស្ថិតនៅក្នុងភូមិខ្នាត ឃុំខ្នាត ស្រុកពួក ខេត្តសៀមរាប បច្ចុប្បន្នកសិដ្ឋាននេះអាចចិញ្ចឹមកង្កែប សម្រាប់ផ្គត់ផ្គង់ទៅកាន់ទីផ្សារក្នុងខេត្តសៀមរាប បានចន្លោះពី ៨តោន ទៅ១០តោន ក្នុងមួយរដូវកាល៕

អត្ថបទ ៖​ សួស សិត