ព័ត៌មានអន្ដរជាតិ

វៀតណាមកត់ត្រាពីឱនភាពពាណិជ្ជកម្ម «កម្រ» នៅខែមុន

បានផុស

៣២ វិនាទី មុន

នៅ

ថ្ងៃព្រហស្បតិ៍ ៦ មីនា ២០២៥

ដោយ

ទិន្នន័យពីរដ្ឋាភិបាលវៀតណាមបានបង្ហាញថា វៀតណាមបានកត់ត្រាពីឱនភាពពាណិជ្ជកម្មដ៏កម្រ កាលពីខែកុម្ភៈ ចំពេលដែលការនាំចូលកើនឡើង ខណៈអតិរេកពាណិជ្ជកម្មជាមួយសហរដ្ឋអាមេរិកនៅតែបន្តកើនឡើង ដែលធ្វើឱ្យហានិភ័យពីពន្ធរបស់ប្រធានាធិបតីអាមេរិក ដូណាល់ ត្រាំ នៅតែមាន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យស្ថិតិទូទៅរបស់វៀតណាម បាននិយាយថា វៀតណាមបានប្រកាសឱនភាពពាណិជ្ជកម្មចំនួន ១,៥៥ ប៊ីលានដុល្លារ នៅខែកុម្ភៈ ធៀបនឹងអតិរេកពាណិជ្ជកម្ម ៣,០២ ប៊ីលានដុល្លារ នៅខែមករា។ យោងតាមទិន្នន័យរបស់ GSO និងក្រុមហ៊ុនហិរញ្ញវត្ថុ London Stock Exchange Group នេះគឺជាឱនភាពពាណិជ្ជកម្មប្រចាំខែទី ៣ រាប់តាំងពីដើមឆ្នាំ ២០២៣។

GSO បាននិយាយថា ការនាំចេញនៅខែកុម្ភៈ បានកើនឡើង ២៥,៧ ភាគរយ ធៀបនឹងរយៈពេលដូចគ្នាកាលពីឆ្នាំមុន ខណៈការនាំចូលវិញបានកើនឡើង ៤០ ភាគរយ ដោយសារតែកំណើននៃការនាំចូលផលិតផលទឹកដោះគោ យានយន្ត និងផលិតផលដែក។

យ៉ាងណាមិញ ក្នុងរយៈពេល ២ ខែដើមឆ្នាំនេះ GSO បានកត់ត្រាពីអតិរេកពាណិជ្ជកម្មចំនួន ១,៤៧ ប៊ីលានដុល្លារ។

គួរគូសបញ្ជាក់ថា វៀតណាមជាមជ្ឈមណ្ឌលផលិតកម្មក្នុងតំបន់ ពឹងផ្អែកយ៉ាងខ្លាំងលើការនាំចេញដើម្បីជំរុញកំណើនសេដ្ឋកិច្ច ហើយពេលនេះ កំពុងប្រឈមមុខនឹងហានិភ័យពីជម្លោះពាណិជ្ជកម្មសកល រួមទាំងលទ្ធភាពនៃការដាក់ពន្ធរបស់សហរដ្ឋអាមេរិក ជុំវិញគោលនយោបាយកាត់បន្ថយឱនភាពពាណិជ្ជកម្មរបស់ ត្រាំ។

ក្នុងរយៈពេល ២ ខែដំបូងនៃឆ្នាំ ២០២៥ អតិរេកពាណិជ្ជកម្មរបស់វៀតណាមជាមួយសហរដ្ឋអាមេរិកបានកើនឡើងដល់ ១៧ ប៊ីលានដុល្លារ កើនឡើង ១៦,៣ ភាគរយ ធៀបនឹងឆ្នាំមុន ខណៈឱនភាពរបស់ប្រទេសនេះជាមួយចិនវិញ បានកើនឡើង ៣៦,៩ ភាគរយ ដល់ ១៥,៤ ប៊ីលានដុល្លារ។ សហរដ្ឋអាមេរិក គឺជាទីផ្សារនាំចេញដ៏ធំបំផុតរបស់វៀតណាម ខណៈចិន គឺជាប្រទេសដែលនាំទំនិញចូលវៀតណាមច្រើនបំផុត។

កន្លងមក វៀតណាមបានបារម្ភពីលទ្ធភាពការដំឡើងពន្ធឆ្លើយតបពីរដ្ឋាភិបាលអាមេរិក ក៏ដូចជាលទ្ធភាពនៃពន្ធទូទៅដែលលោក ត្រាំ អាចដាក់ចំពោះប្រទេសដែលមានអតិរេកពាណិជ្ជកម្មជាមួយអាមេរិក។ វៀតណាមក៏រងការចោទប្រកាន់ ថាធ្វើជាមជ្ឈមណ្ឌលដឹកជញ្ជូនទំនិញចិនទៅអាមេរិកផងដែរ ដោយសារតែបរិមាណដ៏ច្រើននៃទំនិញកម្រិតមធ្យម ដែលប្រទេសនេះនាំចូលពីចិន៕