ព័ត៌មានអន្ដរជាតិ

ជប៉ុនគ្រោងវិនិយោគ ២០ ប៊ីលានដុល្លារ លើវិស័យថាមពលស្អាតវៀតណាម

បានផុស

២៩ វិនាទី មុន

នៅ

ថ្ងៃសុក្រ ៧ មីនា ២០២៥

ដោយ

ទូរទស្សន៍ជប៉ុន NHK បានរាយការណ៍ថា ជប៉ុនគ្រោងនឹងវិនិយោគរហូតដល់ ២០ ប៊ីលានដុល្លារ លើវិស័យថាមពលស្អាតនៅក្នុងប្រទេសវៀតណាម ចំពេលមានការជំរុញក្នុងតំបន់សម្រាប់អព្យាក្រឹតកាបូន ដើម្បីប្រយុទ្ធប្រឆាំងការប្រែប្រួលអាកាសធាតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងនេះបង្ហាញឡើងក្នុងកិច្ចប្រជុំនៅទីក្រុងហាណូយកាលពីថ្ងៃពុធ រវាងអនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម លោក Nguyen Hoang Long និងឯកអគ្គរដ្ឋទូតជប៉ុនប្រចាំវៀតណាម លោក Ito Naoki។

ធនាគារជប៉ុនសម្រាប់កិច្ចសហប្រតិបត្តិការអន្តរជាតិ (JBIC) និងក្រុមហ៊ុនឯកជនជប៉ុន នឹងដឹកនាំការវិនិយោគទៅក្នុងគម្រោងចំនួន ១៤ រួមទាំងរោងចក្រថាមពលខ្យល់ផងដែរ។

លោកឯកអគ្គរដ្ឋទូត Ito Naoki បាននិយាយថា៖ «ប្រទេសជប៉ុនចង់ផ្តល់ការគាំទ្រជាអតិបរមា ដូច្នេះក្រុមហ៊ុនជប៉ុនអាចទាញយកអត្ថប្រយោជន៍ពីឱកាសទាំងនេះ និងចូលរួមក្នុងទីផ្សារលើការកាត់បន្ថយកាបូនរបស់វៀតណាម»។

ក្នុងជំនួបដាច់ដោយឡែកមួយជាមួយអ្នកការទូតជប៉ុនកាលពីខែកុម្ភៈ ឧបនាយករដ្ឋមន្ត្រីវៀតណាម លោក Tran Hong Ha បានអំពាវនាវឱ្យមានការគាំទ្ររបស់ជប៉ុនក្នុងការអនុវត្តវិធានការដើម្បីសម្រេចបានគោលដៅអព្យាក្រឹតរបស់វៀតណាមនៅឆ្នាំ ២០៥០។ នេះរួមបញ្ចូលទាំងកិច្ចសហប្រតិបត្តិការតាមរយៈគំនិតផ្តួចផ្តើមសហគមន៍គ្មានការបំភាយនៅអាស៊ី (AZEC) ក្រោមយន្តការផ្តល់ឥណទានរួម (JCM)។

រហូតមកដល់បច្ចុប្បន្ន ជប៉ុនបានផ្តល់ប្រាក់កម្ចីដល់វៀតណាមជាង ២០ ប៊ីលានដុល្លារ ជំនួយដែលមិនអាចដកវិញបានជិត ៧៥០ លានដុល្លារ និងជំនួយបច្ចេកទេសចំនួន ១,៣៤ ប៊ីលានដុល្លារ៕