ព័ត៌មានអន្ដរជាតិ

ការនាំចេញ-ចូលរបស់ចិន ខ្សោយជាងការរំពឹងទុកនៅខែមករា-កុម្ភៈ

បានផុស

២៣ វិនាទី មុន

នៅ

ថ្ងៃសុក្រ ៧ មីនា ២០២៥

ដោយ

ទិន្នន័យគយចិនចេញផ្សាយនៅថ្ងៃសុក្រនេះ បានបង្ហាញថា ការនាំចេញរបស់ប្រទេសចិនក្នុងអំឡុងខែមករា ដល់ខែកុម្ភៈ បានកើនឡើងត្រឹមតែ ២,៣ ភាគរយ ប៉ុណ្ណេះ ក្នុងអត្រាប្រចាំឆ្នាំ ខណៈការនាំចូលវិញបានធ្លាក់ចុះហួសការរំពឹងទុករហូតដល់ ៨,៤ ភាគរយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលស្ទង់មតិរបស់រ៉យទ័របានបង្ហាញថា សេដ្ឋវិទូបានរំពឹងថា ការនាំចេញនឹងកើនឡើង ៥ ភាគរយ ខណៈការនាំចូលកើនឡើង ១ ភាគរយ ធៀបនឹងកំណើនការនាំចេញ ១០,៧ និងការនាំចូល ១ ភាគរយ នៅក្នុងខែធ្នូ ឆ្នាំ ២០២៤។

ការនាំចេញទៅក្រៅប្រទេសរបស់ចិន បានបាត់បង់សន្ទុះបន្ទាប់ពីកើនឡើងខ្ពស់ក្នុងរយៈពេលប្រាំ ៩ ខែជាប់ៗគ្នា ខណៈសង្គ្រាមពាណិជ្ជកម្មជាថ្មីជាមួយសហរដ្ឋអាមេរិកកាន់តែតានតឹង ជុំវិញគោលនយោបាយដំឡើងពន្ធ។

អ្នកជំនាញលើកឡើងថា ភាពយឺតយ៉ាវនៃពាណិជ្ជកម្មរបស់ចិន អាចគម្រាមកំហែងដល់ការងើបឡើងវិញនៃសេដ្ឋកិច្ចរបស់ប្រទេសនេះ ខណៈរដ្ឋាភិបាលទើបតែបានប្រកាសពីគោលដៅកំណើនសេដ្ឋកិច្ចប្រហែល ៥ ភាគរយ សម្រាប់ឆ្នាំ ២០២៥។

សេដ្ឋកិច្ចចិនបានប្រឈមមុខនឹងបញ្ហាជាច្រើន ជាពិសេសកម្សោយតម្រូវការក្នុងស្រុក និងការបន្តជាប់គាំងនៃវិបត្តិអចលនទ្រព្យ ដែលធ្វើឱ្យកំណើនរបស់វាត្រូវពឹងផ្អែកលើការនាំចេញ ខណៈរដ្ឋាភិបាលចិនបានដាក់ចេញគោលនយោបាយផ្សេងៗនាពេលកន្លងមក ដើម្បីជំរុញតម្រូវការ និងការវិនិយោគ៕